ໄຂ້ຍຸງຍັງສືບຕໍ່ລະບາດເພີ່ມຂື້ນດຽວນີ້ມີເກືອບ 36 ພັນຄົນ

  ສະພາບການລະບາດຂອງເຊື້ອພະຍາດໄຂ້ຍຸງລາຍໃນຂອບເຂດທົ່ວປະເທດມາຮອດປະຈຸບັນເຫັນວ່າຍັງມີການເພີ່ມຂຶ້ນຢ່າງຕໍ່ເນື່ອງ ແລະແກ່ຍາວມາເລື້ອຍໆ, ໂດຍຫຼ້າສຸດໜ່ວຍງານທີ່ຮັບຜິດຊອບເກັບກຳມາຮອດວັນທີ 22 ຕຸລາ ທົ່ວປະເທດມີຜູ້ເປັນໄຂ້ຍຸງແລ້ວເກືອບ 36 ພັນຄົນ ແລະ ເສຍຊີວິດ 70 ຄົນ, ໃນນັ້ນຮ້າຍແຮງກວ່າໝູ່ແມ່ນຢູ່ນະຄອນຫຼວງວຽງຈັນ, ເນື່ອງຈາກເປັນເຂດສູນລວມຂອງຜູ້ຄົນ.

  ອີງຕາມສະຖິຕິຈາກທີມງານທີ່ກ່ຽວ ຂ້ອງຂອງກະຊວງສາທາລະນະສຸກ ແຈ້ງ ໃຫ້ຮູ້ວ່າ ນັບແຕ່ວັນທີ 29 ທັນວາ 2018 ຈົນມາຮອດວັນທີ 22 ຕຸລາ 2019 ເຫັນ ວ່າຕົວເລກສະສົມຂອງຜູ້ເປັນໄຂ້ຍຸງ ລາຍໃນຂອບເຂດທົ່ວປະເທດມີທັງໝົດ 35,98 ພັນຄົນ, ເສຍຊີວິດແລ້ວ 70 ຄົນ, ໃນນັ້ນ ສະເພາະນະຄອນຫຼວງວຽງຈັນ ຖືວ່າເປັນອັນດັບທີ່ຮ້າຍແຮງກວ່າໝູ່ໃນບັນດາ 18 ແຂວງທົ່ວປະເທດ, ຊຶ່ງມີຜູ້ ເປັນໄຂ້ຍຸງທັງໝົດ 9,75 ພັນຄົນ ແລະ ເສຍຊີວິດຮອດ 23 ຄົນ, ຮອງລົງມາແມ່ນ ແຂວງສະຫວັນນະເຂດ ໂດຍຈັດຢູ່ໃນ 6 ແຂວງທີ່ຖືກນໍ້າຖ້ວມກໍມີຕົວເລກຜູ້ເປັນໄຂ້ຍຸງສູງເຊັ່ນກັນ 6,14 ພັນຄົນ ແລະ ເສຍຊີວິດແລ້ວ 21 ຄົນ, ທັງເປັນແຂວງທີ່ມີປະຊາ ກອນອາໄສຢູ່ຢ່າງໜາແໜ້ນ, ສ່ວນບັນດາແຂວງອື່ນໆ ເຖິງວ່າຈະບໍ່ມີປະ ຊາກອນອາໄສຢູ່ໜາແໜ້ນກໍຕາມ, ແຕ່ການລະບາດກໍຍັງໜັກໜ່ວງສົມຄວນຢູ່ໂດຍສະເພາະແມ່ນແຂວງສາລະວັນ, ຄຳມ່ວນ, ຈຳປາສັກ, ວຽງຈັນ, ອັດຕະປື ແລະແຂວງອື່ນໆ.

ສະໜັບສະໜຸນໂດຍ: ສ່ວນບຸກຄົນ

 

  ສຳລັບສະຖິຕິການລະບາດຂອງພະຍາດໄຂ້ຍຸງລາຍມາຮອດປະຈຸບັນຖືໄດ້ວ່າເປັນພະຍາດໜຶ່ງທີ່ຍັງບໍ່ສາມາດຢັບຢັ້ງໄດ້, ຊຶ່ງເຫັນໄດ້ຈາກຕົວເລກການເພີ່ມຂຶ້ນ ແລະຫຼຸດ ລົງໃນແຕ່ລະວັນ ເປັນຕົ້ນ ໃນວັນທີ 10 ຕຸລາທີ່ຜ່ານມາ ທົ່ວປະເທດ ມີການລະບາດເຖິງ 594 ຄົນ, ວັນທີ 17 ຕຸລາ ມີ 164 ຄົນ, ຕົກມາໃນທິດນີ້ວັນທີ 21 ຜ່ານມາ ມີ 96 ຄົນ ໂດຍໂຊກດີທີ່ບໍ່ມາຜູ້ເສຍຊີວິດ, ແຕ່ມາຮອດວັນທີ 22 ຕຸລາ ຈຳນວນຜູ້ເປັນໄຂ້ຍຸງພັດຢູ່ໃນລະດັບເກົ່າ 96 ຄົນ, ແຕ່ມີຜູ້ເສຍຊີວິດ 1 ຄົນ ແລະທີ່ຮ້າຍ ແຮງກວ່ານັ້ນ ນະຄອນຫຼວງ ວຽງຈັນ ຍັງເປັນເຂດທີ່ມີຄວາມສ່ຽງສູງ, ເນື່ອງຈາກການເພີ່ມຂຶ້ນຂອງພະຍາດ ດັ່ງກ່າວບໍ່ຕ່ຳກວ່າ 50 ຄົນຕໍ່ວັນ, ສະນັ້ນຫາກບໍ່ມີການເອົາໃຈໃສ່ຊ່ວຍກັນ ແລະສຸມໃສ່ການທຳລາຍແຫຼ່ງເພາະພັນຂອງຍຸງລາຍແລ້ວກໍອາດຈະເຮັດໃຫ້ພະຍາດຊະນິດນີ້ມີຈຳນວນເພີ່ມຂຶ້ນຢ່າງຕໍ່ເນື່ອງ, ພ້ອມນັ້ນກໍຈະທຳລາຍຊີວິດຂອງຜູ້ຄົນອີກຈຳນວນຫຼາຍ, ແຕ່ໃນຂະນະດຽວກັນການປ້ອງກັນເພື່ອບໍ່ເຮັດໃຫ້ພະຍາດດັ່ງກ່າວມີລະບາດໄດ້ແມ່ນເລີ່ມຈາກຄົວເຮືອນກໍຄືໝັ່ນທຳຄວາມສະອາດພາ ຊະນະທີ່ໃຊ້ເກັບກັກນໍ້າ, ທຳລາຍກະໂປ໊ະກະປ໋ອງຕ່າງໆຢ່າງເປັນປະຈຳເພື່ອບໍ່ໃຫ້ມີນໍ້າຂັງອັນເປັນສາເຫດຂອງໜອນນໍ້າຍຸງ ລາຍທີ່ນຳໄຂ້ຍຸງລາຍມາສູ່ຄົນ.

ສະໜັບສະໜຸນໂດຍ: HONDA

 

____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์