ຈາກມູນເຊື້ອກາຍເປັນທ່າແຮງທີ່ສຳຄັນ ພັດທະນາເສດຖະກິດຄອບຄົວ

  ປະຊາຊົນເມືອງຕຸ້ມລານຫຼາຍຄອບຄົວແມ່ນມີມູນເຊື້ອດັ້ງເດີມອັນດີງາມທີ່ໄດ້ສືບທອດກັນມາຍາວນານໂດຍສະເພາະແມ່ນການມູນເຊື້ອການຕໍ່າແຜ່ນແພ, ປະຈຸບັນມີ ການຂະຫຍາຍຕົວຢ່າງຕໍ່ເນື່ອງ ແລະອອກສູ່ທ້ອງຕະຫຼາດເປັນຈຳນວນຫຼວງຫຼາຍ, ທັງເປັນເອກະລັກໜຶ່ງດຽວຂອງແຂວງສາລະວັນ, ໄລຍະຜ່ານມາການຕໍ່າແຜ່ນແພແມ່ນເຮັດພຽງແຕ່ໄດ້ນຳໃຊ້ໃນຄອບຄົວ ແລະເປັນຂອງຝາກຂອງຕ້ອນແຕ່ໃນປະຈຸບັນໄດ້ກາຍເປັນຜະລິດຕະພັນສິນຄ້າທີ່ສຳຄັນທັງທ່າແຮງຕົ້ນຕໍໃນການສ້າງລາຍຮັບໃຫ້ຫຼາຍຄອບຄົວໃນເມືອງຕຸ້ມລານ ແຂວງສາລະວັນ.

  ຄອບຄົວຂອງປ້າຢະທີບ ວົງຄຳຈັນ ຢູ່ບ້ານຕຸກລຸກ ເມືອງຕຸ້ມລານ ຖືເປັນຄອບຄົວໜຶ່ງໄດ້ຢືດຖືອາຊີບດັ່ງກ່າວເປັນກຳລັງໜຶ່ງສ້າງລາຍຮັບໃຫ້ຄອບຄົວ, ເມື່ອກ່ອນໄດ້ເຮັດນາ, ປູກຝັງ-ລ້ຽງສັດ ແລະຕໍ່າແຜ່ນແພເປັນອາຊີບສຳຮອງ, ຕົກມາຮອດປີ 2015 ຈຶ່ງໄດ້ຕັດສິນໃຈເອົາອາຊີບຕໍ່າແຜ່ນແພເປັນຫຼັກ, ເບື້ອງຕົ້ນໄດ້ຜະລິດປະເພດ: ແພຕາກະໂລ, ຜ້າຫູນ, ແພມົນ, ສິ້ນກະໂດ, ສິ້ນໜີ່, ສີ້ນຈົກໄວ້ເພື່ອຂາຍໂດຍສາມາດລາຍໄດ້ສະເລ່ຍ 5 ແສນກີບ ຕໍ່ປີ ແລະໄດ້ເຮັດເປັນປະຈຳ, ປີ 2017 ໄດ້ພັດທະນາແຜ່ນແພໃຫ້ມີຫຼາຍສີສັນ,ອອກແບບຫຼາຍຮູບແບບຕາມຄວາມສົນໃຈຂອງລູກຄ້າທີ່ນັບມື້ນັບເພີ່ມຂຶ້ນ ແລະໄດ້ກູ້ຢືມເງິນຈາກທະນາຄານນະໂຍບາຍ 5 ລ້ານກີບ ມາລົງທຶນ

ເພື່ອເຮັດໃຫ້ຜະລິດຕະພັນອອກສູ່ທ້ອງຕະຫຼາດໃຫ້ໄດ້ຮັບຄວາມນິຍົມຫຼາຍ ຂຶ້ນ, ກວ້າງຂວາງເຊັ່ນ: ໄດ້ນຳໄປ ຂາຍຢູ່ເມືອງສະໝາມໄຊ, ເມືອງ ຊານໄຊ ແຂວງອັດຕະປື, ຕະຫຼາດ ເມືອງແສນ ເມືອງໂຂງ, ເມືອງມຸນ ລະປະໂມກ, ເມືອງສຸຂຸມາ ແລະ ເມືອງອື່ນໆອີກຫຼາຍແຫ່ງ, ທັງໄດ້ ນຳໄປວາງສະແດງ, ຈຳໜ່າຍໃນ ງານຕ່າງໆຕື່ມອີກ, ຊຶ່ງໃນແຕ່ ງານສາມາດຂາຍໄດ້ 100 ກວ່າ ຜືນຕໍ່ຄັ້ງ ແລະແຕ່ລະຄັ້ງຂາຍໄດ້ 2-3 ລ້ານກວ່າກີບ ລວມລາຍ ຮັບໄດ້ 16 ລ້ານກີບຕໍ່ປີສາມາດເຮັດໃຫ້ຄອບຄົວໝັ້ນຄົງ, ມີວຽກເຮັດງານທຳ ແລະມີລາຍໄດ້ໃນແຕ່ລະເດືອນແຕ່ລະປີ, ປ້າຢະທີບຜູ້ທີ່ເປັນຕົ້ນກຳເນີດລີ່ເລີ່ມການຜະລິດແຜ່ນແຜທີ່ເປັນມູນເຊື້ອ ແລະອາໄສຄວາມດຸໜັ່ນຈົນໄດ້ກາຍເປັນຄອບຄົວຕົວແບບ, ປະຈຸບັນປ້າຢະທີບມີອາຍຸ 59 ປີ, ມີຈຳນວນພົນໃນຄອບຄົວທັງໝົດ 11 ຄົນ, ຍິງ 8 ຄົນ, ແຮງງານສົມບູນ 6 ຄົນ, ຍິງ 4 ຄົນ.

ສະໜັບສະໜຸນໂດຍ: ສ່ວນບຸກຄົນ

  ນາງ ລົມ ວົງຄຳຈັນ ຜູ້ເປັນລູກໄດ້ຕາງໜ້າຄອບຄົວໄດ້ຜ່ານບົດປະກອບຄຳເຫັນໃນກອງປະຊຸມໃຫຍ່ຂອງອົງຄະນະພັກເມືອງຕຸ້ມລານ, ທັງໄດ້ສະແດງຄວາມຮູ້ບຸນຄຸນຕໍ່ພັກ-ລັດກໍຄືການນຳທຸກຂັ້ນທີ່ໄດ້ເປັນຫ່ວງເປັນໄຍ ແລະໃຫ້ຊ່ອງທາງໃນການໜູນໃຊ້ມູນເຊື້ອທີ່ຄອບຄົວຕົນເອງມີໃຫ້ກາຍມາເປັນທ່າແຮງທີ່ສຳຄັນເຮັດໃຫ້ຄອບຄົວຂອງຕົນເອງມີຄວາມຜາສຸກ,ມີລາຍຮັບທີ່ໝັ້ນຄົງ,ມີອາຊີບຄົງທີ່ ແລະມີສ່ວນຮ່ວມໃນສັງຄົມຫຼາຍຂຶ້ນ,ທັງໄດ້ກາຍເປັນຕົວແບບທີ່ເປັນຕົວແທນໃຫ້ກັບເມືອງຕຸ້ມລານອີກດ້ວຍ.

ສະໜັບສະໜຸນໂດຍ: HONDA

____________

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์