ລັດຈະໃຊ້ງົບ 1,12 ພັນຕື້ກີບ ຍົກລະດັບທາງ 13 ເໜືອ ແຕ່ສີເກີດຫາໂພນໂຮງ

ລັດຖະບານກຽມໃຊ້ງົບພັນຕື້ກວ່າກີບເພື່ອນຳໃຊ້ເຂົ້າໃນໂຄງການປັບປຸງ ແລະສ້ອມແປງເສັ້ນທາງ 13 ເໜືອແຕ່ສີເກີດນະຄອນຫຼວງວຽງຈັນ ຫາໂພນໂຮງແຂວງວຽງຈັນ ລວມໄລຍະທາງ 58 ກີໂລແມັດ ດ້ວຍການຈະຍົກລະດັບໂຄງສ້າງເປັນເບຕົງເສີມເຫຼັກ ແລະຂະຫຍາຍໜ້າທາງຕາມແລວທາງເກົ່າໃຫ້ກວ້າງອອກຕື່ມເພື່ອໃຫ້ສາມາດຮັບນໍ້າໜັກການບັນທຸກຕາມມາດຕະຖານຂອງອາຊຽນຄື: 11 ໂຕນຕໍ່ເພົາແລະສາມາດຮັບປະກັນລະບາຍການສັນຈອນໄດ້ເຖິງປີ 2030 ໂດຍມີເວລາປະຕິບັດໂຄງການ 10 ປີ.

  ວັນທີ 18 ຕຸລາຜ່ານມາທີ່ນະຄອນຫຼວງວຽງຈັນ ໄດ້ມີພິທີເຊັນສັນຍາວຽກງານຟື້ນຟູ ແລະບູລະນະຮັກສາທາງເລກ 13 ເໜືອ ໄລຍະສີເກີດແລະໂພນໂຮງລະຫວ່າງກົມຂົວທາງກະຊວງໂຍທາທິການ ແລະຂົນສົ່ງ ແລະບໍລິສັດຮູເປີຍຊາງຈຽງກໍ່ສ້າງຂົວທາງໂດຍການເຂົ້າຮ່ວມເປັນສັກຂີພິຍານຂອງທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະຂົນສົ່ງ (ຍທຂ), ທ່ານ ລັດສະໝີ ອະລິຍະວົງສິງ ຫົວໜ້າໂຄງການ, ທ່ານ ລີເລີຍ ປະທານບໍລິສັດຮູເປີຍຊາງຈຽງກໍ່ສ້າງຂົວທາງພ້ອມພາກ ສ່ວນກ່ຽວຂ້ອງເຂົ້າຮ່ວມ.

  ໃນພິທີໄດ້ມີການເປີດເຜີຍຂໍ້ມູນໃຫ້ຮູ້ວ່າ: ໂຄງການປັບປຸງ ແລະສ້ອມແປງ ເສັ້ນທາງເລກທີ 13 ເໜືອ ແຕ່ສີເກີດຫາ ໂພນໂຮງມີຄວາມຍາວທັງໝົດ 58 ກິໂລ ແມັດ ໂດຍໄດ້ຮັບການສະໜັບສະໜູນ ເງິນກູ້ດອກເບ້ຍຕໍ່າຈາກ 3 ສະຖາບັນ ການເງິນຄື: ທະນາຄານໂລກມູນຄ່າ 40 ລ້ານໂດລາ, ທະນາຄານການລົງທຶນພື້ນຖານໂຄງລ່າງອາຊີມູນຄ່າ 40 ລ້ານໂດ ລາ, ກອງທຶນນໍດີເພື່ອການພັດທະນາ ມູນຄ່າ 9,5 ລ້ານໂດລາ ແລະລັດຖະ ບານລາວສົມທົບທັງໝົດມູນຄ່າ 38,5 ລ້ານໂດລາ ລວມມູນຄ່າການກໍ່ສ້າງທັງໝົດ 128 ລ້ານໂດລາ ຫຼືປະມານ 1,12 ພັນຕື້ກີບ ໃນມູນຄ່ານີ້ແມ່ນປະກອບມີຄ່າກໍ່ສ້າງ ແລະບູລະນະຮັກສາທາງ,ຄ່າເວນຄືນທີ່ດິນ ແລະສິ່ງກີດຂວາງຄ່າທີ່ປຶກສາ ແລະອື່ນໆ.

   ສະໜັບສະໜຸນໂດຍ: HONDA

  ---------------

 ໄລຍະກະກຽມໂຄງການ 1 ປີ (2018) ແລະໄລຍະປະຕິບັດໂຄງການແມ່ນ 10 ປີ (ແຕ່ປີ 2019-2028 ) ໄລຍະນີ້ກໍ່ສ້າງ ແລະໄລຍະບູລະນະຮັກສາ 7 ປີ, ການອອກແບບເພື່ອປັບປຸງ, ຍົກລະດັບຕອນທາງເປັນການປັບປຸງ, ຍົກລະດັບໂຄງສ້າງ ແລະຂະຫຍາຍໜ້າທາງຕາມແລວທາງເກົ່າໃຫ້ກວ້າງອອກຕື່ມເພື່ອໃຫ້ສາມາດຮັບນໍ້າ ໜັກການບັນທຸກຕາມມາດຕະຖານຂອງອາຊຽນຄື: 11 ໂຕນຕໍ່ເພົາ ແລະສາມາດຮັບປະກັນລະບາຍການສັນຈອນໄດ້ເຖິງປີ 2030.

   ສຳລັບໂຄງສ້າງທາງໄດ້ອອກແບບເປັນໜ້າທາງເບຕົງເສີມເຫຼັກແບ່ງອອກເປັນ 2 ສັນຍາ, ສັນຍາທີ 1 ແຕ່ສາມແຍກສີເກີດ (ກິໂລແມັດທີ12) ຫາບ້ານສົງເປືອຍ (ກິໂລແມັດທີ 31) ປັບປຸງ ແລະຂະຫຍາຍໜ້າທາງຈາກ 2 ເລນ ເປັນ 4 ເລນໃຫຍ່, ມີເລນສຳລັບລົດຈັກສອງເບື້ອງເພີ່ມຕື່ມ, ມີທາງຍາງສອງເບື້ອງສຳລັບຊຸມຊົນ ແລະ ມີດອນກາງທາງຊຶ່ງຄວາມກວ້າງຂອງໜ້າທາງທັງໝົດແມ່ນ 23 ແມັດ,

ສະໜັບສະໜຸນໂດຍ: ສ່ວນບຸກຄົນ

----------- 

ສັນຍາທີ 2 ແຕ່ບ້ານສົງເປືອຍ (ກິໂລແມັດທີ 31) ຫາໂພນໂຮງ (ກິໂລແມັດທີ 70) ປັບປຸງເປັນທາງສອງເລນໃຫຍ່, ມີສອງເລນນ້ອຍສຳລັບລົດຈັກສອງເບື້ອງເພີ່ມຕື່ມບໍ່ມີດອນກາງທາງແຕ່ມີໄລຍະຫ່າງໃນການແລ່ນສວນກັນ ແລະທາງຄົນຍ່າງສຳລັບຊຸມຊົນສຳລັບເຂດບໍ່ມີຊຸມຊົນຈະເປັນບ່າທາງທຳມະດາບໍ່ມີທາງຄົນຍ່າງຊຶ່ງຄວາມກວ້າງໜ້າທາງທັງໝົດແມ່ນແຕກຕ່າງກັນຈາກ 13 ແມັດ ຫາ 16 ແມັດ ເປັນໄລຍະໆໄປ.

  ການຄັດເລືອກຜູ້ຮັບເໝົາວຽກງານຟື້ນຟູ ແລະບູລະນະຮັກສາທາງໃນຄັ້ງນີ້ແມ່ນນຳໃຊ້ຮູບແບບການຈັດຊື້-ຈັດຈ້າງດ້ວຍການປະມູນເປີດກວ້າງ (ສາກົນ) ຕາມລະບຽບການຂອງຜູ້ໃຫ້ທຶນ, ເອກະສານການປະມູນທີ່ນຳໃຊ້ແມ່ນ ເອກະສານມາດຕະຖານຂອງທະນາ ຄານໂລກໃນຮູບສັນຍາແບບມອບເໝົາ, ໝາຍຄວາມວ່າຜູ້ຮັບເໝົາເປັນຜູ້ດຳເນີນການກໍ່ສ້າງສຳເລັດແລ້ວສືບຕໍ່ບູລະນະຮັກສາໄປອີກ 7 ປີ ຈຶ່ງມອບໃຫ້ເຈົ້າຂອງໂຄງການ, ຜ່ານການປະມູນທີ່ໄດ້ເລີ່ມຕົ້ນດຳເນີນມາແຕ່ເດືອນມັງກອນປີ 2019 ຈົນເຖິງເດືອນສິງຫາ 2019 ຈຶ່ງສຳເລັດ ແລະ ໄດ້ຮັບເອົາບໍລິສັດຮູເປີຍຊາງຈຽງກໍ່ສ້າງຂົວທາງເປັນຜູ້ທີ່ມີເງື່ອນໄຂຄົບຖ້ວນ ແລະ ມີລາຄາຕໍ່າກວ່າໝູ່ເປັນຜູ້ຊະນະການປະມູນສໍາລັບສັນຍາ 1 ມີມູນຄ່າ 31,5 ລ້ານໂດລາ ແລະສັນຍາທີ 2 ມີມູນຄ່າ 36,9 ລ້ານໂດລາ ລວມມູນຄ່າທັງໝົດ 68,57 ລ້ານໂດລາ.

______________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์