ອະຫິວາໜູຍັງລະບາດຢູ່ 2 ບ້ານ ເມືອງຫຼວງນໍ້າທາ

ພາຍຫຼັງທີ່ມີການລະບາດເຊື້ອພະຍາດອະຫິວາໝູຢູ່ເມືອງສິງ ໃນທ້າຍເດືອນກໍລະກົດ ປີ 2019 ນີ້, ໄດ້ມີໝູຕິດເຊື້ອພະຍາດ ແລະຖືກຂ້າທໍາລາຍທັງໝົດ 4,56 ພັນໂຕ ໃນຈໍານວນ 26 ບ້ານ, ມີ 550 ຄອບຄົວໄດ້ຮັບຜົນກະທົບ, ຫຼ້າສຸດໃນວັນ ທີ 10 ຕຸລາ 2019 ໄດ້ພົບການລະບາດເຊື້ອພະຍາດອະຫິວາໝູອາຟຣິກາຢູ່ບ້ານວຽງທອງ ແລະບ້ານ ທົ່ງອົ້ມເມືອງຫຼວງນໍ້າທາ ມີໝູຕາຍເອງ 79 ໂຕ ແລະໝູຖືກຂ້າທໍາລາຍຖິ້ມ 50 ໂຕ, ລວມທັງໝົດ 129 ໂຕ, ໄດ້ຮັບຜົນກະ ທົບ 2 ຄອບຄົວ, ໃນສອງບ້ານ ຕໍ່ສະພາບ ດັ່ງກ່າວທາງພາກສ່ວນທີ່ກ່ຽວຂ້ອງກໍ່ຄື ຂະແໜງລ້ຽງສັດ ແລະການປະມົງຂອງ ພະແນກກະສິກໍາ ແລະປ່າໄມ້ແຂວງ ແລະ ເມືອງໄດ້ລົງກວດກາ, ເກັບກໍາຂໍ້ມູນ ແລະຈັດຕັ້ງປະຕິບັດຕາມຫຼັກວິຊາການ.

ມາໃນວັນທີ 17 ຕຸລາ 2019 ທີ່ພະແນກກະສິກໍາ ແລະປ່າໄມ້ແຂວງຫຼວງນໍ້າທາ ກໍໄດ້ຈັດກອງປະຊຸມປຶກສາຫາລືກ່ຽວກັບການເຝົ້າລະວັງ ແລະຕອບໂຕ້ພະຍາດອະຫິ ວາໝູ ຢູ່ພາຍໃນແຂວງຫຼວງນໍ້າທາ, ໂດຍການເປັນປະທານຂອງທ່ານ ພິມ ແກ້ວ ທໍາລະສິນ ຮັກສາການຫົວໜ້າພະ ແນກກະສິກໍາ ແລະປ່າໄມ້ແຂວງ, ເຂົ້າຮ່ວມມີທ່ານ  ບຸນລ້ອມ ດວງເງິນ ຫົວໜ້າ ສູນວິໄຈພະຍາດສັດ, ກົມລ້ຽງສັດ ແລະ ການປະມົງ ກະຊວງກະສິກໍາ ແລະປ່າ ໄມ້ມີຕາງໜ້າບັນດາພະແນກການອ້ອມ ຂ້າງແຂວງ, 2 ກອງບັນຊາການ, ຫ້ອງການກະສິກໍາ ແລະປ່າໄມ້ເມືອງຫຼວງນໍ້າທາ, ຫ້ອງການຄຸ້ມຄອງຕະຫຼາດອຸດສາຫະກໍາ-ກະສິກໍາແຂວງ-ເມືອງ, ຜູ້ປະກອບການເກັບຊື້ສັດ, ຂ້າ ສັດ-ຂາຍຊີ້ນ, ຜູ້ປະກອບການລ້ຽງໝູຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.

  ຈຸດປະສົງຂອງກອງປະຊຸມເພື່ອເຜີຍແຜ່ຄວາມຮູ້ກ່ຽວກັບການລະບາດ ແລະ ຄວາມອັນຕະລາຍຮ້າຍແຮງຂອງພະຍາດອະຫິວາໝູທີ່ສົ່ງຜົນກະທົບຕໍ່ເສດຖະກິດ ແລະ ສະພາບແວດລ້ອມຂອງຊາດ ແລະເພື່ອປຶກສາຫາລືກັບຫຼາຍພາກສ່ວນຂະແໜງການຕ່າງໆຂອງພາກລັດ ແລະເອກະຊົນໄດ້ມີສ່ວນຮ່ວມເປັນເຈົ້າການເຝົ້າລະວັງ, ຄວບ ຄຸມ ແລະ ໂຕ້ຕອບພະຍາດຢູ່ແຂວງຫຼວງນໍ້າທາໃຫ້ເຂົ້າສູ່ສະພາບປົກກະຕິໂດຍໄວ.

ສະໜັບສະໜຸນໂດຍ: ສ່ວນບຸກຄົນ

----------

 ທ່ານ ຄໍາແພງ ພານະວັນ ຫົວໜ້າຂະແໜງລ້ຽງສັດ ແລະການປະມົງພະແນກກະສິກໍາ ແລະປ່າໄມ້ແຂວງໄດ້ຍົກໃຫ້ເຫັນເຖິງສະພາບການລະບາດຂອງພະຍາດອະຫິ ວາໝູຢູ່ຕ່າງປະເທດ ແລະ ແຜ່ລາມເຂົ້າສູ່ປະເທດລາວ, ຄວາມຮ້າຍແຮງຂອງພະຍາດ, ການຕິດຕໍ່, ສາເຫດ, ອາການຂອງພະຍາດອະຫິວາໝູອາຟຣິກາ, ການປິ່ນ ປົວ, ສະພາບການລະບາດບັນດາ ແຂວງພາຍໃນປະເທດລາວ ແລະການ ລະບາດຢູ່ 2 ເມືອງພາຍໃນ ແຂວງຫຼວງ ນໍ້າທາ, ວິທີປ້ອງກັນ, ມາດຕະການຕອບໂຕ້ຄວບຄຸມເມື່ອເກີດມີການລະບາດ, ມາດຕະການຂ້າສັດ ແລະທໍາລາຍຊາກສັດເພື່ອຄວບຄຸມການລະບາດຂອງພະຍາດ, ມາດຕະການທາງດ້ານເຕັກນິກວິຊາການໃນການໂຕ້ຕອບ, ສັງລວມຂໍ້ສະດວກ, ຂໍ້ຫຍຸ້ງຍາກໃນການຈັດຕັ້ງປະຕິບັດຈາກນັ້ນຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາຄິດຄໍາເຫັນ ແລະປຶກສາຫາລືໃນການຈັດຕັ້ງປະຕິບັດໂຕ້ ຕອບພະຍາດດັ່ງກ່າວ.

   ສະໜັບສະໜຸນໂດຍ: HONDA   -------------

  ປະຈຸບັນ ທົ່ວແຂວງຫຼວງນໍ້າທາມີຟາມລ້ຽງໝູຂະໜາດໃຫ່ຍ 1 ແຫ່ງ ຈໍານວນໝູ 2,8 ພັນໂຕ, ຟາມລ້ຽງໝູຂະໜາດກາງ 6 ແຫ່ງ ມີໝູ 1,5 ພັນໂຕ, ຟາມ ລ້ຽງໝູຂະໜາດນ້ອຍ 30 ແຫ່ງ ມີໝູ 1,3 ພັນໂຕແລະການລ້ຽງໝູຂອງປະຊາຊົນ 1,3 ແສນໂຕ, ລວມທົ່ວແຂວງມີໝູທັງໝົດ 1,38 ແສນໂຕ, ໃນນີ້ຕາຍຍ້ອນພະຍາດອະຫິວາໝູແລ້ວ 4,69 ພັນໂຕ.

__________

ຂຽນໂດຍ: ອຸ້ມ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์