ຊາວບ້ານຜູ້ຖືກເຂື່ອນນໍ້າງື່ມ 3 ສະເໜີບໍລິສັດເບີ່ງຄືນດິນຕົກຄ້າງສ່ວນໂຄງການນີ້ສຳເລັດ 72,42%

 ປະຊາຊົນບ້ານຊຽງແດດ ເມືອງພູກູດ ແຂວງຊຽງຂວາງ ຊຶ່ງບ້ານຍົກຍ້າຍຈັດສັນໃໝ່ ທີ່ຖືກເຂື່ອນໄຟຟ້ານ້ຳງື່ມ 3 ໄດ້ສະເໜີໃຫ້ບໍລິສັດກວດກາເກັບກຳຂໍ້ມູນຄືນເນື້ອທີ່ດິນຕົກຄ້າງ ແລະການຍົກຍ້າຍປ່າຊ້າຂອງບ້ານຂະນະທີ່ໜ້າວຽກການກໍ່ສ້າງຂອງໂຄງການເຂື່ອນຮອດເວລານີ້ສຳເລັດແລ້ວ 72,42% ສ່ວນການສ້າງບ້ານໃໝ່ກໍມີ ຜົນສຳເລັດ 64,98% ແນວໃດກໍດີການນຳແຂວງເນັ້ນໜັກໃຫ້ບໍລິສັດຮີບຮ້ອນໃນການຈັດຕັ້ງປະຕິບັດວຽກງານດ້ານປະຊາຊົນກໍຕ້ອງມີຄວາມເຂົ້າໃຈຕໍ່ການພັດທະນາ.

  ໃນວັນທີ 17 ຕຸລາຜ່ານມາ ທ່ານ ບົວ ສອນ ສີນວນທອງ ຮອງເຈົ້າແຂວງໆ ຊຽງຂວາງ ພ້ອມດ້ວຍຄະນະ ແລະທ່ານ ສອນເພັດ ເມືອງວົງ ປະທານບໍລິສັດແສງ ເພັດກໍ່ສ້າງຂົວທາງຈຳກັດ ຜູ້ຮັບເໝົາກໍ່ ສ້າງພື້ນຖານໂຄງລ່າງບ້ານຈັດສັນໃໝ່ (ບ້ານຊຽງແດດ), ທ່ານ ພູວຽງ ພົງສະ ຫວັດ ຮອງຜູ້ອຳນວຍການໃຫຍ່ບໍລິສັດ ໄຟຟ້ານ້ຳງື່ມ 3 ພາວເວີຈຳກັດ, ບໍລິສັດ ພູທີ່ປຶກສາສິ່ງແວດລ້ອມ (ຮັບເໝົາຟື້ນ ຟູຊີວິດການເປັນຢູ່) ໄດ້ກວດກາການກໍ່ ສ້າງບ້ານຈັດສັນ ແລະໂຄງລ່າງພື້ນຖານ ບ້ານຊຽງແດດເມືອງພູກູດ ແຂວງຊຽງຂວາງ ຂອງໂຄງການ ເຂື່ອນໄຟຟ້ານ້ຳງື່ມ 3 ຊຶ່ງການລົງກວດກາຄັ້ງນີ້ໄດ້ກວດກາ ເບິ່ງການກໍ່ສ້າງເຮືອນ, ເສັ້ນທາງ, ສຸກສາລາ, ໂຮງຮຽນ, ສວນສາທິດ, ສິ່ງແວດລ້ອມ ແລະສັງຄົມ.

 ໂອກາດນີ້ທ່ານ ຕິ່ງຄຳ ແກ້ວອາສາວົງ ຫົວໜ້າຫ້ອງການສິ່ງແວດລ້ອມບໍລິສັດນ້ຳງື່ມ 3 ກໍ່ໄດ້ລາຍງານເຖິງຄວາມຄືບໜ້າແຕ່ລະໜ້າວຽກໃນການກໍ່ສ້າງເຂື່ອນໄຟຟ້ານ້ຳງື່ມ 3 ສະເພາະວຽກງານກໍ່ສ້າງ ບ້ານຈັດສັນໃໝ່ບ້ານຊຽງແດດ ສຳເລັດ ແລ້ວ64,98%, ວຽກງານຟື້ນຟູ ແລະປັບ ຊີວິດການເປັນຢູ່ໃຫ້ແກ່ປະຊາຊົນບ້ານຊຽງແດດ ມີຄວາມຄືບໜ້າ 38,78%, ວຽກງານກິດຈະກຳສວນສາທິດຄືບໜ້າ 87,71%, ຄວາມຄືບໜ້າທັງໝົດໃນການ ຜະລິດທໍ່ສົ່ງນ້ຳ71,57% ສ່ວນການກໍ່ ສ້າງເຂື່ອນໄຟຟ້ານ້ຳງື່ມ 3 ຮອດປະຈຸບັນ ໜ້າວຽກໂດຍລວມຂອງໂຄງການໄດ້ 72,42%.

  ການລົງກວດກາຄັ້ງນີ້ປະຊາຊົນບ້ານຊຽງແດດກໍ່ໄດ້ສະເໜີໃຫ້ບໍລິສັດກວດກາເກັບກຳຂໍ້ມູນຄືນເນື້ອທີ່ດິນຕົກຄ້າງ, ການຍົກຍ້າຍປ່າຊ້າຂອງບ້ານ.

ສະໜັບສະໜຸນໂດຍ: ສ່ວນບຸກຄົນ

------------

  ຫຼັງຈາກນັ້ນທ່ານຮອງເຈົ້າແຂວງໆ ຊຽງຂວາງ ກໍ່ໄດ້ມີຄຳຄິດເຫັນໂອ້ລົມປະຊາຊົນ ແລະຊີ້ນຳບໍລິສັດໃຫ້ຮີບຮ້ອນກໍ່ສ້າງນ້ຳລິນ, ສ້າງເສັ້ນທາງໄປປ່າຊ້າ, ກຳນົດບ່ອນຖິ້ມຂີ້ເຫື້ອຍ, ສ້າງໃຫ້ເປັນ ບ້ານຕົວແບບພາຍໃນແຂວງ, ປະຊາຊົນ ຕ້ອງເຂົ້າໃຈໃນການພັດທະນາ, ການດຳ ລົງຊີວິດມີການປ່ຽນແປງ, ຮໍ່າຮຽນເອົາ ວິທີເຕັກນິກການປູກຝັງລ້ຽງສັດຈາກ ສວນສາທິດ, ມີແນວຄິດສ້າງສາພັດທະ ນາ, ກຸ້ມຕົນເອງຕາມທິດສີຂຽວຍືນຍົງ, ຄະນະບ້ານຕ້ອງສຶກສາອົບຮົມແນວຄິດ ຈິດໃຈໃນການຍົກຍ້າຍມາຢູ່ບ້ານຈັດສັນ, ຕ້ອງຮັດແໜ້ນຄວາມສາມັກຄີຊ່ວຍເຫຼືອເຊິ່ງກັນແລະກັນກຳນົດເປັນບ່ອນທ່ອງທ່ຽວພັກແວະກິນປາຂາຍເຄື່ອງປູກຫັດຖະກຳເພື່ອແກ້ໄຂຄວາມທຸກຍາກເທື່ອລະກ້າວ.

   ສະໜັບສະໜຸນໂດຍ: HONDA

________________

ຂຽນໂດຍ: ສັມຄິດ ແກ້ວນວນລາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์