ກັນຍາ ແກ້ວມະນີ ຄົນລາວຄົນທຳອິດ ກັບຕຳແໜ່ງສຳຄັນບານໂລກຮອບຄັດເລືອກ

  ວັນທີ 15 ຕຸລາ 2019  ທ່ານ ນາງກັນຍາ ແກ້ວມະນີ ເລຂາທິການ ສະຫະພັນບານເຕະແຫ່ງ ຊາດລາວ ໄດ້ຖືກແຕ່ງຕັ້ງຈາກສະຫະພັນບານເຕະນາໆ ຫຼື FIFA ໃຫ້ເປັນຜູ້ຄວບຄຸມການແຂ່ງຂັນບານໂລກ 2022 ຮອບຄັດເລືອກຮອບ 2 ໃນຂົງເຂດອາຊີນັດແຂ່ງຂັນລະ ຫວ່າງທີມຊາດສິງກະໂປ ພົບກັບ ທີມຊາດ ອຸສເບກິສຖານທີ່ສະໜາມ ກີລາແຫ່ງຊາດສິງກະໂປ ໃນວັນ ອັງຄານທີ 15 ຕຸລາ 2019 ໂດຍ ເປັນຄົນລາວຄົນທໍາອິດ ແລະຄົນ ດຽວໃນຕໍາແໜ່ງຜູ້ຄວບຄຸມການແຂ່ງຂັນຂອງ FIFA ແລະAFC ຊຶ່ງເປັນຕໍາແໜ່ງອັນສໍາຄັນໃນການ ຈັດການແຂ່ງຂັນບານເຕະທີ່ຕ້ອງ ມີໜ້າທີ່ເປັນຕົວແທນ FIFA ແລະ AFC ຈັດການແຂ່ງຂັນໃຫ້ເປັນໄປ ຕາມລະບຽບການແຂ່ງຂັນທີ່  FIFA  ແລະ AFC ວາງອອກທຸກໆຂັ້ນຕອນ.

ທັງນີ້ທ່ານ ນາງ ກັນຍາ ແກ້ວ ມະນີ ເປັນ 1 ໃນຜູ້ຄວບຄຸມການ ແຂ່ງຂັນຍິງຈໍານວນ 4 ທ່ານຈາກ ທະວີບອາຊີ  ທີ່ໄດ້ຮັບການໄວ້ວາງ ໃຈຈາກ FIFA ໃຫ້ເປັນຜູ້ຄວບຄຸມ ການແຂ່ງຂັນບານໂລກ 2022  ຮອບຄັດເລືອກຖືວ່າເປັນຄັ້ງປະ ຫວັດສາດທີ່ FIFA ໄດ້ຄັດເລືອກຜູ້ຄວບຄຸມການແຂ່ງຂັນຍິງເປັນຜູ້ບໍລິຫານຈັດການແຂ່ງຂັນບານ ໂລກຊາຍໃນໂຊນອາຊີ.

 ປະຫວັດການເປັນຜູ້ຄວບຄຸມການແຂ່ງຂັນ ຫຼື Match Commissioner ຂອງທ່ານນາງ ກັນຍາ ແກ້ວມະນີ ແມ່ນເລີ່ມຕົ້ນມາຕັ້ງແຕ່ປີ 2007 ຈົນເຖິງປະຈຸບັນ ຊຶ່ງມີຜົນງານໃນການຄວບຄຸມການແຂ່ງຂັນທັງບານເຕະຊາຍ ແລະຍິງບໍ່ວ່າຈະເປັນການຄວບຄຸມການແຂ່ງຂັນບານເຕະລາຍການ AFC Champions League, AFC Cup, AFC Futsal Club Championship ນອກນັ້ນຍັງມີ AFC Women’s Asian Cup Finals, AFC Women’s Futsal Cham pshioship ແລະ ທຸກໆການແຂ່ງຂັນບານເຕະຍິງລຸ້ນ ອາຍຸຕ່າງໆຂອງ  AFC,  ນອກຈາກ ນັ້ນຍັງໄດ້ຮັບຄັດເລືອກໃຫ້ເປັນຜູ້ຄວບຄຸມການແຂ່ງຂັນບານເຕະ ຍິງທີ່ກີລາເອຊຽນເກມ 3 ສະໄໝ ຕິດຕໍ່ກັນຄື: ທີ່ກວາງໂຈ່ວປະເທດ ຈີນ ປີ 2010, ອິນຊອນ ສ.ເກົາຫຼີ ປີ 2014,  ຈາກາຕ້າ-ປາເລມບັງປະເທດອິນໂດເນເຊຍປີ 2018 ຕະຫຼອດຮອດການແຂ່ງຂັນ AFFSUZUKI CUP ແລະກີລາຊີເກມອີກດ້ວຍ.

  ໃນປີ 2009 ທ່ານນາງ ກັນຍາ ແກ້ວມະນີ ໄດ້ຮັບການໂຫວດໃຫ້ເປັນຜູ້ຄວບຄຸມການແຂ່ງຂັນດີເດັ່ນໃນອາຊີ ແລະໄດ້ຮັບລາງວັນ AFC Match Commission er of the Year 2009, ໃນໄວໆນີ້ທາງ AFC ຍັງໄດ້ແຕ່ງຕັ້ງ ທ່ານ ນາງ ກັນຍາ ໃຫ້ຮັບໜ້າທີ່ເປັນຜູ້ຄວບຄຸມການແຂ່ງຂັນ AFCCUP Final 2019 ຈະເປັນການຊິງ ແຊັມຄັ້ງທີ 16 ນັບຕັ້ງແຕ່ມີການ ແຂ່ງຂັນລາຍການນີ້ຂຶ້ນມາໃນປີ ນີ້ຈະເປັນການພົບການລະຫວ່າງທີມຊະນະເລີດຈາກໂຊນອາຊີຕາເວັນຕົກຄືສະໂມສອນ Al-Ahed ຈາກເລບານອນພົບກັບທີມຊະນະເລີດຈາກອິນເຕີໂຊນຄືສະໂມສອນ 4.25 ຈາກ ສ.ເກົາຫຼີ ຊຶ່ງການແຂ່ງຂັນນັດຊີງແຊັມນີ້ຈະຈັດຂຶ້ນທີ່ນະຄອນຫຼວງປຽງ ຢາງ ປະເທດ ສ.ເກົາຫຼີ ໃນວັນທີ 2 ພະຈິກ 2019 ນີ້.

--------------------

ໜັງສືພີມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์