ທ່ຽວຊົມແຫຼ່ງທ່ອງທ່ຽວ ນ້ຳຕົກຕາດເຈົ້າ

  ນ້ຳຕົກຕາດເຈົ້າຖືເປັນສະຖານທີ່ທ່ອງທ່ຽວທີ່ເໝາະສົມແກ່ການທ່ອງທ່ຽວແບບພັກຜ່ອນຢ່ອນໃຈເພາະອຸດົມສົມບູນໄປດ້ວຍທິວທັດທໍາມະຊາດ, ຊີວະນາໆພັນ,ມີສາຍລົມເຢັນພັດໂຊຍມາຕະຫຼອດເວລາ, ປະກອບກັບນໍ້າທີ່ໃສສະອາດ ແລະ ເຢັນດີໄຫຼລົງມາໜ້າຊະອອນສໍາຜັດແລ້ວມີຄວາມສຸກຈິດໃຈເພີດ ເພີນໄປຈົນລືມອິດລືມເມື່ອຍນ້ຳຕົກຕາດເຈົ້າຕັ້ງຢູ່ບ້ານທ່າເດື່ອ,ຊຶ່ງຫ່າງຈາກຕົວເມືອງໄຊຍະບູລີ ໄປທາງທິດເໜືອປະມານ 30 ກິໂລແມັດ. ການເຂົ້າເຖິງນໍ້າຕົກຕາດເຈົ້າແມ່ນສາມາດເຂົ້າເຖິງດ້ວຍລົດ ແລະ ສາມາດໄປໄດ້ທັງສອງລະດູ.

       ຕາມການບອກເລົ່າໃນເມື່ອກ່ອນນ້ຳຕົກຕາດເຈົ້າແມ່ນສະຖານທີ່ທີ່ປະຊາຊົນຊາວເມືອງໄຊຍະບູລີ ກໍ່ຄືແຂກຕ່າງດ້າວທ້າວຕ່າງແດນນິຍົມໄປທ່ຽວຊົມ, ພັກຜ່ອນຫຼືພາກັນມາອາບນ້ຳໂດຍມີຄວາມເຊື່ອວ່າເມື່ອອາບແລ້ວຈະເຮັດໃຫ້ຮ່າງກາຍແຂງແຮງ ແລະ ສະສາງລ້າງສ່ວຍສິ່ງບໍ່ດີອອກໄປໃນສະໄໝກ່ອນພໍຮອດບຸນກຸດສົງການປີໃໝ່ລາວຂອງທຸກໆປີເຈົ້າຊີວິດຫຼວງພະບາງຈະໃຫ້ຄົນມານຳເອົານ້ຳຢູ່ແຫ່ງນີ້ໄປຫົດສົງພະບາງທີ່ຫຼວງພະບາງ,ລັກສະນະຂອງນ້ຳຕົກເປັນນ້ຳຕົກຕາດທີ່ມີຄວາມສູງປະມານ 12 ແມັດ, ກວ້າງປະມານ 2 ແມັດຢູ່ບໍລິເວນດັ່ງກ່າວແມ່ນຖືກປົກຄຸມໄປດ້ວຍຕົ້ນໄມ້ໃຫຍ່, ຢູ່ຈຸດທີ່ນ້ຳອອກມີພະພຸດທະຮູບປະດິດສະຖານຢູ່ເພື່ອໃຫ້ແຂກຄົນທີ່ໄປທ່ຽວຊົມໄດ້ກາບໄຫວ້ບູຊາ.ມີສາລາໃຫ້ນັກທ່ອງທ່ຽວໄດ້ນັ່ງພັກຜ່ອນ ແລະ ສາມາດຫຼຽວເຫັນທິວທັດທຳມະຊາດທີ່ສວຍງາມຂອງແມ່ນ້ຳຂອງ.

  ທັງນີ້ກໍຍ້ອນສະຖານທີ່ດັ່ງກ່າວມີອາກາດປອດໂປ່ງສົດໃສ ແລະເຢັນດີອັນເນື່ອງຈາກວ່າຢູ່ພາຍໃນຕາດມີຕົ້ນໄມ້ໃຫຍ່ດົກໜາປົກຄຸມບໍລິເວນ, ນັກທ່ອງ ທ່ຽວທຸກຄົນສາມາດລົງໄປນັ່ງຫຼີ້ນຢູ່ຕາມໂງ່ນຫີນທີ່ຕັ້ງລຽນເປັນຈຸດໆຕາມແລວນໍ້າທີ່ມີແກ້ງໄຫຼຜ່ານໃສເຢັນດີ ຫຼື ລົງໄປລອຍຫຼິ້ນໄດ້ຕາມສະບາຍ.

แชร์