ສ.ເກົາຫຼີ ຈະຂາຍລົດແບບບໍ່ມີຄົນຂັບປີ 2027

ທ່ານ ມຸນແຈອິນ ປະທານາທິບໍດີຂອງ ສ. ເກົາຫຼີ ກ່າວວ່າ ສ.ເກົາຫຼີ ຕັ້ງເປົ້າຈຳໜ່າຍ ລົດ ແບບບໍ່ມີຄົນຂັບໃນທາງການຄ້າໃຫ້ສຳເລັດພາຍ ໃນປີ 2027 ແລະຂະຫຍາຍອັດຕາສ່ວນຍອດ ຂາຍລົດໄຟຟ້າ ແລະລົດພະລັງງານໄຮໂດຣ ເຈນໃຫ້ເປັນ 1 ຕໍ່ 3 ຂອງລົດທັງໝົດພາຍ ໃນປີ 2030.

ຕາມຂ່າວຕ່າງປະເທດລາຍງານວ່າ ທ່ານ ມຸນ ຜູ້ນໍາ ສ.ເກົາຫຼີ ກ່າວວ່າ ສ.ເກົາຫຼີ ຕັ້ງເປົ້າ ເປັນປະເທດທຳອິດໃນໂລກທີ່ສາມາດຈຳໜ່າຍລົດແບບບໍ່ມີຄົນຂັບດ້ານການຄ້າໃນປີ 2027 ດ້ວຍການສ້າງໂຄງສ້າງພື້ນຖານທີ່ຈຳເປັນ ເຊັ່ນ: ເຄືອຂ່າຍສື່ສານບໍ່ມີສາຍລະຫວ່າງຖະໜົນ ແລະລົດລະບົບຄວບຄຸມແບບບູລະນາການ ແລະແຜນທີ່ຄວາມແມ່ນຢໍາລະດັບສາມມິຕິ ພາຍໃນປີ 2024, ນອກຈາກນີ້ ຍັງຕັ້ງເປົ້າໝາຍຊຸກຍູ້ອັດຕາສ່ວນຍອດຂາຍລົດພະລັງ ງານໄຟຟ້າ ແລະໄຮໂດຣເຈນໃຫ້ໄດ້ເຖິງ 33% ຂອງຍອດຂາຍລົດທັງໝົດພາຍໃນປີ 2027 ພ້ອມທັງຄອງສ່ວນແບ່ງຕະຫຼາດໂລກ 10%, ເພື່ອໃຫ້ບັນລຸເປົ້າໝາຍດັ່ງກ່າວລັດຖະບານ ສ.ເກົາຫຼີ ຈຶ່ງວາງແຜນຕິດຕັ້ງເຄື່ອງສາກແບັດ ເຕີລີຄວາມໄວສູງໃຫ້ໄດ້ປະມານ 15.000 ເຄື່ອງ ພາຍໃນປີ 2025 ແລະສະຖານີສາກໄຮ ໂດຣເຈນຈຳນວນ 330 ແຫ່ງທົ່ວປະເທດພາຍ ໃນປີ 2030, ທ່ານ ມຸນ ລະບຸວ່າ ຖ້າຫາກຄວາມ ພະຍາຍາມບັນລຸຜົນຍານພາຫະນະເປັນມິດຕໍ່ ສິ່ງແວດລ້ອມນີ້ ຈະຊ່ວຍຫຼຸດການປ່ອຍອາຍພິດ ເຮືອນແກ້ວ ແລະຝຸ່ນລະອອງໄດ້ເຖິງ 36% ແລະ 11% ຕາມລໍາດັບ.

ນອກຈາກນີ້ ບໍລິສັດຕ່າງໆໃນ ສ.ເກົາຫຼີ ຍັງວາງແຜນການລົງທຶນມູນຄ່າລວມ 60 ພັນຕື້ວອນ ເພື່ອພັດທະນາເຕັກໂນໂລຊີທີ່ກ່ຽວຂ້ອງກັບລົດສຳລັບອະນະຄົດອີກ 10 ປີຕໍ່ໜ້າ, ພ້ອມ ກັນນັ້ນລັດຖະບານຈະລົງທຶນແຍກຕ່າງຫາກຈຳນວນ 2,2 ພັນຕື້ວອນເພື່ອຊ່ວຍບໍລິສັດຕ່າງໆ ໃນທ້ອງຖິ່ນ ພັດທະນາສ່ວນປະກອບ ແລະວັດສະດຸຕົ້ນຕໍໃນຂະແໜງອຸດສາຫະກຳລົດໃນອະນະຄົດ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์