ລາວຈະລຶບລ້າງຄວາມທຸກຍາກ ແລະໄພອຶດຫິວໃນ 2030

 ການສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກປີນີ້ແມ່ນຢູ່ໃນເງື່ອນໄຂທີ່ບັນດາປະເທດໄດ້ມີຜົນສຳເລັດເບື້ອງ ຕົ້ນໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ຄຽງຄູ່ກັນນັ້ນຫຼາຍປະເທດກໍໄດ້ຖືກຜົນກະທົບຂອງໄພພິບັດຢ່າງໜັກໜ່ວງຊຶ່ງໄດ້ກາຍເປັນອຸປະສັກຕໍ່ການສູ້ຊົນບັນລຸເປົ້າໝາຍໃນການລຶບລ້າງຄວາມທຸກຍາກແລະໄພອຶດຫິວຂອງໂລກທີ່ວາງໄວ້ວ່າໃຫ້ສຳເລັດໂດຍພື້ນຖານໃນປີ 2030.

  ໃນວັນທີ 17 ຕຸລາ 2019 ທີ່ນະຄອນຫຼວງວຽງຈັນໄດ້ມີກອງປະຊຸມການປາຖະກາຖາເນື່ອງໃນໂອກາດການສະເຫຼີມສະຫຼອງວັນອາຫານໂລກ, ລະນຶກວັນສາກົນ ແລະສັບປະດາແຫ່ງຊາດເພື່ອລຶບລ້າງຄວາມທຸກຍາກປີ 2019 ໂດຍການເປັນປະທານຂອງທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະປ່າໄມ້, ມີບັນດາຄະນະນຳກະຊວງ, ຮອງເລຂາຄະນະພັກ, ບັນດາພະນັກງານ ແລະອົງການອ້ອມຂ້າງຂອງສູນກາງພັກເຂົ້າຮ່ວມ.

 ສຳລັບປະເທດລາວເຮົາການສະເຫຼີມສະຫຼອງ ແລະລະນຶກດັ່ງກ່າວແມ່ນມີຂຶ້ນໃນເງື່ອນໄຂປະຊາຊົນເຮົາພາຍໃຕ້ການນຳພາຂອງພັກ ແລະການຄຸ້ມຄອງຂອງລັດສາມາດຍາດໄດ້ຜົນສຳເລັດຫຼາຍດ້ານ ໃນຕະຫຼອດໄລຍະ 16 ປີ ຂອງການຈັດ ຕັ້ງປະຕິບັດຍຸດທະສາດການເຕີບໂຕ ແລະລຶບລ້າງຄວາມທຸກຍາກແຫ່ງຊາດ (NGPES) ແຕ່ປີ (2003-2019) ກໍ່ຄືໄລຍະເຄິ່ງສະໄໝຂອງແຜນການພັດ ທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ VIII, ເປັນຕົ້ນແມ່ນ ສປປ ລາວ ໄດ້ບັນລຸເງື່ອນໄຂຂອງການຫຼຸດພົ້ນອອກ ຈາກສະຖານະພາບປະເທດດ້ອຍພັດທະ ນາສືບຕໍ່ມີສະຖຽນລະພາບທາງດ້ານ ການເມືອງ, ເສດຖະກິດມີການເຕີບໂຕຢ່າງຕໍ່ເນື່ອງ ແລະໝັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ດັ່ງນັ້ນການສະເຫຼີມສະຫຼອງວັນອາຫານໂລກ, ວັນສາກົນ ແລະສັບປະດາແຫ່ງຊາດເພື່ອລຶບລ້າງຄວນທຸກຍາກແມ່ນມີຄວາມໝາຍຄວາມສຳຄັນທີ່ສຸດແນໃສ່ປຸກລະດົມຂະບວນການຮັກຊາດ ແລະພັດທະນາຍົກສູງຈິດໃຈເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ແກ້ ໄຂ ແລະ ຟື້ນຟູຜົນກະທົບຈາກໄພພິບັດ, ປູກຈິດສຳນຶກ ແລະເພື່ອເຮັດໃຫ້ວຽກງານຄໍ່າປະກັນສະບຽງອາຫານ, ສົ່ງເສີມການຜະລິດໃຫ້ກາຍເປັນສິນຄ້າ, ພັດທະນາຊົນ ນະບົດ ແລະລຶບລ້າງຄວາມທຸກຍາກເປັນໜ້າທີ່ຂອງທົ່ວພັກທົ່ວລັດທົ່ວພວງຊົນຢ່າງແທ້ຈິງສູ້ຊົນລຶບລ້າງຄວາມທຸກຍາກ ແລະໄພອຶດຫິວໃຫ້ໄດ້ພາຍໃນປີ 2030.

 ສຳລັບ ສປປ ລາວ ໃນຖານະເປັນລັດສະມາຊິກຂອງອົງການສະຫະປະຊາຊາດທີ່ຖືເອົາການແກ້ໄຂຄວາມທຸກຍາກເປັນບູລິມະສິດອັນດັບຕົ້ນຂອງນະໂຍບາຍເວລາໃດກໍຍຶດ ໝັ້ນອຸດົມການໃນການນຳເອົາຄວາມສົມບູນພູນສຸກມາໃຫ້ປະຊາຊົນບັນດາເຜົ່າໄດ້ສະແດງອອກເຖິງຄວາມມຸ່ງໝັ້ນໃນການຕໍ່ສູ້ລຶບລ້າງຄວາມທຸກຍາກຕະຫຼອດມາ, ກອງປະຊຸມວຽກງານລຶບລ້າງຄວາມທຸກຍາກທົ່ວປະເທດຄັ້ງທີ່ I ໃນໄລຍະວັນທີ 17-19 ມີນາ 2003 ພາຍໃຕ້ການເປັນປະທານຂອງທ່ານນາຍົກລັດຖະມົນຕີທ່ານບຸນຍັງ ວໍລະຈິດໄດ້ຮັບຮອງເອົາວັນທີ 17 ຫາ ວັນທີ 24 ຕຸລາ ເປັນວັນສາກົນ ແລະສັບປະດາແຫ່ງຊາດເພື່ອລຶບລ້າງຄວາມທຸກຍາກຢ່າງເປັນທາງການ.

______________

ຂຽນໂດຍ: ລຸນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์