ຍອດສົ່ງອອກເຂົ້າຫວຽດນາມ ມີມູນຄ່າຫຼຸດລົງ 9,8%

  ຍອດສົ່ງອອກເຂົ້າຂອງ ສສ ຫວຽດນາມ ໃນໄລຍະ 9 ເດືອນທຳອິດຂອງປີນີ້ ມີມູນຄ່າ ຫຼຸດລົງ 9,8% ເມື່ອທຽບກັບປີກ່ອນໜ້ານີ້ຢູ່ທີ່ 2.240 ລ້ານໂດລາສະຫະລັດ ເນື່ອງຈາກ ຄວາມຕ້ອງການຈາກ ສປ ຈີນ ແລະຕະຫຼາດ ອື່ນໆຫຼຸດລົງ.

ຕາມຂ່າວຕ່າງປະເທດລາຍງານວ່າ ກະຊວງກະສິກຳ ແລະການພັດທະນາຊົນນະບົດ ລະບຸວ່າ ລາຄາເຂົ້າປະສົມຫັກ 5% ຂອງຫວຽດ ນາມປັບຕົວຫຼຸດລົງຢູ່ທີ່ 325 ໂດລາຕໍ່ໂຕນໃນ ເດືອນທີ່ຜ່ານມາ ນັບເປັນຕົວເລກຕໍ່າສຸດໃນຮອບ 12 ປີ, ທ່ານ ຫງວຽນ ກວ໊ກ ຕວນ ຜູ້ອຳນວຍການກົມການພັດທະນາຕະຫຼາດກະສິກຳ ແລະການແປຮູບຂອງກະຊວງລະບຸວ່າ ຈີນກຳ ລັງຂະຫຍາຍຕະຫຼາດນໍາເຂົ້າເຂົ້າໄປສູ່ຕະຫຼາດໃໝ່ເຊັ່ນ: ມຽນມາ ແລະກຳປູເຈຍ ເຮັດ ໃຫ້ເປັນເລື່ອງຍາກສຳລັບຫວຽດນາມທີ່ຈະ ແຂ່ງຂັນ, ນອກຈາກນັ້ນ ຈີນຍັງເຂັ້ມງວດໃນ ເລື່ອງມາດຕະຖານການນໍາເຂົ້າຂອງປະເທດ ເພື່ອຮັບປະກັນຄຸນນະພາບ ແລະຄວາມປອດໄພ, ເຈົ້າໜ້າທີ່ຫວຽດນາມກ່າວວ່າ ຕະຫຼາດໃຫຍ່ ລາຍອື່ນໆເຊັ່ນ ອິນໂດເນເຊຍ ແລະບັງກາລາເທດ ຍັງປັບຫຼຸດການນໍາເຂົ້າເຂົ້າຂອງຕົນເອງ ເນື່ອງ ຈາກການເຕີບໂຕຂອງເສດຖະກິດໂລກລໍຕົວລົງເປັນຜົນໃຫ້ຄວາມຕ້ອງການຫຼຸດລົງ.

ທ່ານ ຕວນ ກ່າວຕື່ມວ່າ ຫວຽດນາມຈຳເປັນຕ້ອງສ້າງຄວາມຫຼາກຫຼາຍຂອງຕະຫຼາດ ແລະສົ່ງອອກໄປຍັງຟິລິບປິນໃຫ້ຫຼາຍຂຶ້ນ ເນື່ອງຈາກເປັນຜູ້ຊື້ລາຍໃຫຍ່ຂອງຫວຽດນາມ ລວມທັງອິນໂດເນເຊຍ ແລະອາຟຣິກາ, ເມື່ອ ປີທີ່ຜ່ານມາ ຫວຽດນາມສົ່ງອອກເຂົ້າເປັນມູນຄ່າທັງໝົດ 3.030 ລ້ານໂດລາ ເພີ່ມຂຶ້ນ 16% ຈາກປີ 2017.

 

-------------------------------------------

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์