ເຜີຍແຜ່ນະໂຍບາຍໃຫ້ວັກຊິນກັນພະຍາດໄຂ້ຫວັດລະດູການ

  ວັນທີ 16 ຕຸລາຜ່ານມາທີ່ນະຄອນຫຼວງວຽງຈັນ ກົມອະນາໄມ ແລະສົ່ງເສີມສຸຂະພາບກະຊວງສາທາລະນະສຸກໄດ້ຈັດກອງປະຊຸມເຜີຍແຜ່ນະໂຍບາຍວ່າດ້ວຍການໃຫ້ວັກຊິນກັນພະຍາດໄຂ້ຫວັດລະດູການພາຍໃຕ້ການເປັນປະທານຂອງທ່ານ ຮສດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກມີບັນດາຫົວໜ້າກົມ, ຮອງກົມ, ຫົວໜ້າສູນ, ຮອງສູນ, ຫົວໜ້າພະແນກ, ຮອງພະແນກສາທາລະນະສຸກແຂວງຈາກທົ່ວປະເທດເຂົ້າຮ່ວມ.

  ກອງປະຊຸມເຜີຍແຜ່ນະໂຍບາຍວ່າດ້ວຍການໃຫ້ວັກຊິນກັນພະຍາດໄຂ້ຫວັດລະດູການເພື່ອໃຫ້ການຄຸ້ມຄອງ ແລະການປະຕິບັດວຽກງານການໃຫ້ວັກຊິນກັນພະຍາດໄຂ້ ຫວັດລະດູການໃຫ້ໄປຕາມທິດທາງອັນດຽວກັນກັບກົດໝາຍວ່າດ້ວຍການໃຫ້ວັກຊິນກັນພະຍາດ ແລະ ສອດຄ່ອງກັບນະໂຍບາຍ ແລະ ກົດລະບຽບສາກົນດ້ານສາທາລະ ນະສຸກວາງອອກ,ແນໃສ່ຊຸກຍູ້,ສົ່ງເສີມໃຫ້ປະຊາຊົນບັນດາເຜົ່າເຂົ້າມາຮັບວັກຊິນກັນພະຍາດໄຂ້ຫວັດລະດູການໃຫ້ທັນກັບສະພາບການຮັບປະກັນໃຫ້ປະຊາຊົນບັນດາເຜົ່າມີສຸຂະພາບແຂງແຮງ, ການໃຫ້ວັກຊິນກັນພະຍາດໄຂ້ຫວັດລະດູການໄດ້ຖືກຈັດເຂົ້າໃນລະບົບການໃຫ້ວັກຊິນກັນພະຍາດປົກກະຕິຕາມຕາຕະລາງການໃຫ້ວັກຊິນກັນພະ ຍາດແຫ່ງຊາດຮອດປີ 2030 ແລະເພື່ອກຸ່ມເປົ້າໝາຍໄດ້ຮັບວັກຊິນກັນພະຍາດໄຂ້ຫວັດລະດູການໃນລະບົບບໍລິການແບບປົກກະຕິ, ຍົກອັດຕາການປົກຄຸມຂອງກຸ່ມເປົ້າ ໝາຍໃຫ້ທົ່ວເຖິງໃນຂອບເຂດທົ່ວປະເທດຮອດປີ 2030 ແລະເພື່ອໃຫ້ ສປປ ລາວ ມີຄວາມພ້ອມໃນການຕອບໂຕ້ຕໍ່ການລະບາດຂອງພະຍາດໄຂ້ຫວັດລະດູການທີ່ເກີດ ຫຼືອາດຈະເກີດຂື້ນໃນອະນາຄົດຮ່ວມກັບບັນປະເທດໃນພາກພື້ນ ແລະໃນໂລກ.

  ວັກຊິນກັນພະຍາດໄຂ້ຫວັດລະດູການແມ່ນວັກຊິນທີ່ຈັດໃນກຸ່ມວັກຊິນຊະນິດເຊື້ອຕາຍນຳມາໃຊ້ໃນມະນຸດເພື່ອກະຕຸ້ນຮ່າງກາຍໃຫ້ມີການຜະລິດພູມຄຸ້ມກັນຊຶ່ງວັກຊິນທີ່ນຳໃຊ້ໃນແຕ່ລະປີແມ່ນຂຶ້ນກັບສາຍພັນທີ່ມີການຈໍລະຈອນຂອງເຊື້ອພະຍາດທີ່ແຕກຕ່າງກັນ, ຫຼັງຈາກໄດ້ຮັບວັກຊິນກັນໄຂ້ຫວັດແລ້ວຮ່າງກາຍຈະສ້າງພູມຄຸ້ມກັນພາຍໃນ 1 ຫາ 2 ອາທິດ ແລະຈະຍັງຄົງຕົວຢູ່ໄດ້ປະມານ 1 ປີ ຫຼືດົນກວ່ານັ້ນ, ສໍາລັບກຸ່ມເປົ້າໝາຍໃນການໃຫ້ວັກຊິນກັນພະຍາດໄຂ້ຫວັດລະດູການປະກອບມີ: ແມ່ຍິງຖືພາ, ເດັກນ້ອຍອາຍຸ 6 ເດືອນ ຫາ 5 ປີ, ພະນັກງານສາທາລະນະສຸກລວມທັງບຸກຄະລາກອນກຸ່ມສ່ຽງອື່ນ, ຍິງ-ຊາຍທີ່ມີອາຍຸແຕ່ 55 ປີ ຂຶ້ນໄປ, ຜູ້ທີ່ເປັນພະຍາດຊຳເຮື້ອ ແລະກຸ່ມເປົ້າໝາຍອື່ນໆ.

___________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์