ເຊກອງສືບຕໍ່ລົງຊຸກຍູ້ເສຍຄ່າທາງ ແລະທີ່ດິນ, 9 ເດືອນເກັບໄດ້ 61,29% ຂອງແຜນປີ

 ວັນທີ 17 ຕຸລາ 2019 ສ່ວຍສາອາກອນປະຈໍາແຂວງ, ທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາເຊກອງ ແລະເຈົ້າໜ້າທີ່ຕໍາຫຼວດຈາລະຈອນກອງບັນຊາການ ປກສ  ແຂວງໄດ້ຮ່ວມກັນລົງເປີດຂະບວນການຊຸກຍູ້ເສຍຄ່າທໍານຽມທາງ ແລະພາສີທີ່ດິນປະຈໍາປີ 2019 ຜ່ານລະບົບທະນາຄານຢູ່ຈຸດບ້ານຫ້ວຍຊາດ ເມືອງທ່າແຕງ ໂດຍມີທ່ານ ຄອນປະເສີດ ຫຼວງສຸວັນນະວົງ ຫົວໜ້າ ທຄຕລ ສາຂາເຊກອງ, ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງເຊກອງ; ພ້ອມນີ້ກໍມີຜູ້ຕາງໜ້າຫ້ອງການໆເງິນເມືອງທ່າແຕງ, ອົງການປົກຄອງບ້ານ ແລະວິຊາການກ່ຽວຂ້ອງເຂົ້າຮ່ວມ.

  ທ່ານ ຄອນປະເສີດ ຫຼວງສຸວັນນະວົງ ກ່າວວ່າ: ວຽກງານພັດທະນາເສດຖະກິດ-ສັງຄົມແຫ່ງຊາດແມ່ນວຽກງານໜຶ່ງທີ່ສໍາຄັນ ແລະເປັນພື້ນຖານໃຫ້ແກ່ຄາດໝາຍຂອງການພັດທະນາ,ການປະຕິບັດພັນທະເຂົ້າງົບປະມານແຫ່ງລັດແມ່ນໜ້າທີ່ຂອງທຸກພາກສ່ວນນັບທັງອົງການຈັດຕັ້ງພັກ-ລັດ, ອົງການຈັດຕັ້ງມະຫາຊົນ,ຫົວໜ່ວຍທຸລະກິດ ແລະພົນລະເມືອງທຸກໆຄົນຕ້ອງມີສ່ວນຮ່ວມ.

  ການເປີດຂະບວນການຊຸກຍູ້ຄັ້ງນີ້ແມ່ນປະຕິບັດຕາມແຈ້ງການຂອງຜູ້ອໍານວຍການໃຫຍ່ ທຄຕລ ສະບັບເລກທີ 210/ທຄຕລ, ລົງວັນທີ 3 ກັນຍາ 2019 ໂດຍຈຸດ ປະສົງແມ່ນເພື່ອໂຄສະນາກະຕຸກຊຸກຍູ້ບັນດາພະນັກງານ-ລັດຖະກອນ, ທະຫານ-ຕໍາຫຼວດ, ຫົວໜ່ວຍທຸລະກິດ ແລະປະຊາຊົນບັນດາເຜົ່າໃຫ້ມີຄວາມຕື່ນຕົວມາຊໍາລະຄ່າພາສີທີ່ດິນ ແລະຄ່າທໍານຽມທາງປະຈໍາປີ2019 ຕາມແຜນການເກັບລາຍຮັບຂອງແຂວງທີ່ຂຶ້ນໄວ້ໃຫ້ສໍາເລັດ.

 ແຂວງເຊກອງໄດ້ຮັບມອບໝາຍຕົວເລກການເກັບລາຍຮັບຈາກພາສີທີ່ດິນ ແລະຄ່າທໍານຽມທາງໃນປີ 2019 ທັງໝົດ 1,8 ຕື້ກີບ ຜ່ານການປະຕິບັດໃນ 9 ເດືອນສາ ມາດເກັບໄດ້ທັງໝົດ 1,1 ຕື້ກີບ, ທຽບໃສ່ແຜນເທົ່າກັບ 61,29% ໃນນີ້ລາຍຮັບຈາກພາສີທີ່ດິນເກັບໄດ້ 751 ລ້ານກວ່າກີບ, ທຽບໃສ່ແຜນເທົ່າ ກັບ 57,82% ແລະຄ່າທໍານຽມທາງເກັບໄດ້ 391 ລ້ານກວ່າກີບ, ທຽບໃສ່ແຜນການປີເທົ່າກັບ 69,31%.

  ຕອນທ້າຍທ່ານຫົວໜ້າ ທຄຕລ ສາຂາເຊກອງຍັງໄດ້ຮຽກຮ້ອງມາຍັງອົງການຈັດຕັ້ງທຸກພາກສ່ວນ, ຫົວໜ່ວຍທຸລະກິດ ແລະປະຊາຊົນບັນດາເຜົ່າໃຫ້ພ້ອມກັນມາປະ ກອບສ່ວນມອບພັນທະເຂົ້າງົບປະມານແຫ່ງລັດດ້ວຍການແຈ້ງເສຍຄ່າ ທໍານຽມທາງແລະພາສີທີ່ດິນ, ທັງຮຽກຮ້ອງໃຫ້ຜູ້ຮັບຜິດຊອກວຽກງານນີ້ຈົ່ງພ້ອມກັນເອົາໃຈໃສ່ເຮັດໜ້າທີ່ ແລະຮັບປະກັນໃຫ້ໄດ້ໝາກຜົນແລະປະສິດທິພາບສູງຕາມຈຸດປະສົງ ແລະລະດັບຄາດໝາຍແຜນການທີ່ວາງໄວ້.

_____________

ຂຽນໂດຍ: ສັນຍາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์