ງານນັດພົບແຮງງານຈະບັນລຸເຂົ້າຕຳແໜ່ງ 1,5 ພັນຄົນ

ພະແນກແຮງງານ ແລະສະຫວັດດີການສັງຄົມ ນະຄອນຫຼວງວຽງຈັນ ຮ່ວມກັບບໍລິສັດໄອຈ໋ອບຈຳກັດ ແລະບໍລິສັດລາວເວີນມະຫາຊົນຈຳກັດໄດ້ຮ່ວມມືຈັດງານຕະຫຼາດນັດພົບແຮງງານເພື່ອເປັນສ່ວນໜຶ່ງປະກອບໃສ່ໃຫ້ບັນລຸຕົວເລກຄາດໝາຍປີ 2019 ເພື່ອຊ່ວຍຄວບຄຸມອັດຕາການຫວ່າງງານໃຫ້ຢູ່ໃນລະດັບ 2% ຕໍ່ປີສະເພາະງານຕະຫຼາດນັດແຮງງານປີນີ້ຄາດວ່າຜູ້ຊອກວຽກເຮັດງານທຳຈະຖືກຄັດເລືອກບັນຈຸເຂົ້າຕຳແໜ່ງຫວ່າງຈຳນວນ 1,5 ພັນຄົນ.

ພິທີເປີດງານຕະຫຼາດນັດພົບແຮງງານໄດ້ຈັດວັນທີ 16-20 ຕຸລາ 2019 ທີ່ສູນການຄ້າລາວ-ໄອເຕັກນະຄອນຫຼວງວຽງຈັນໂດຍການເຂົ້າຮ່ວມຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີ ການສັງຄົມ, ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນບັນດາທ່ານຫົວໜ້າກົມ, ເຈົ້າເມືອງ, ຫົວ ໜ້າພະແນກ, ຫົວໜ່ວຍແຮງງານ, ສະຖາບັນສຶກສາພາກສ່ວນກ່ຽວຂ້ອງເຂົ້າຮ່ວມ.

  ປີນີ້ມີບັນດາອົງການຈັດຕັ້ງພາກລັດ, ພາກເອກະຊົນ, ຫົວໜ່ວຍແຮງງານ ແລະ ຊາວຄ້າຂາຍເຂົ້າຮ່ວມວ່າງສະແດງທັງໝົດຈຳນວນ 300 ກວ່າຮ້ານໃນນັ້ນຫ້ອງຮັບສະໝັກພະນັກງານ 49 ຮ້ານ, ຫ້ອງວ່າງສະແດງ ແລະໂຄສະນາສິນຄ້າ 31 ຮ້ານແລະຫ້ອງວ່າງສະແດງສິນຄ້າທົ່ວໄປ 220 ຮ້ານຊຶ່ງມີຕຳແໜ່ງວ່າງງານຫຼາຍກວ່າ 5,2 ພັນຕໍາແໜ່ງ ແລະມີນັກຮຽນ-ນັກສຶກສາ,ຜູ້ຊອກວຽກເຮັດງານທຳເຂົ້າຮ່ວມຈຳນວນ 3 ພັນຄົນ ແລະບັນດາມວນຊົນທົ່ວໄປ 5 ພັນຄົນ ແລະຄາດວ່າຜູ້ຊອກວຽກເຮັດງານທໍາຈະຖືກຄັດເລືອກບັນຈຸເຂົ້າຕໍາແໜ່ງຫວ່າງບັນດາຫົວໜ່ວຍແຮງງານ, ໂຄງການ ແລະ ເຂດເສດຖະກິດພິເສດຈຳນວນ 1,5 ພັນຄົນນອກນັ້ນງານຕະຫຼາດນັດພົບແຮງງານປີນີ້ແມ່ນມີກິດຈະກຳຫຼາຍກວ່າປີຜ່ານມາເປັນຕົ້ນແມ່ນການໃຫ້ຂໍ້ມູນຂ່າວສານຕະຫຼາດແຮງງານ, ການຝຶກອົບຮົບວິຊາຊີບ ແລະການແນະນຳສາຍການຮຽນເຜີຍແຜ່ເວັບໄຊຈັດຫາງານສາທາລະນະຊົນພ້ອມນັ້ນຍັງມີກິດຈະກຳແຂ່ງຂັນສີມືແຮງງານຈາກສະຖາບັນຕ່າງໆ, ກິດຈະກຳສະແດງສິລະປະ-ວັນນະຄະດີ, ກິດຈະ ກຳຖາມຕອບ ແລະອື່ນໆ.

  ຈຸດປະສົງເພື່ອສ້າງໂອກາດ ແລະເອື້ອອຳນວຍຄວາມສະດວກໃຫ້ຜູ້ຊອກວຽກເຮັດງານທຳ ແລະບັນດາຫົວໜ່ວຍງານໄດ້ມີເວທີພົບປະກັນແລ້ວນຳໄປສູ່ການຈັດງານ, ສ້າງຜູ້ອອກແຮງງານທີ່ ຕ້ອງການພັດທະນາສີມືແຮງງານສາມາດເຂົ້າເຖິງະຖາບັນຕ່າງໆໄດ້ຮັບຍົກລະດັບສີມືແຮງງານແທດເໝາະສົມຄວາມຕ້ອງການຂອງຕະຫຼາດແຮງງານ, ເປັນເວທີສົ່ງເສີມການຕະຫຼາດບັນດາຫົວໜ່ວຍແຮງງານ,ບັນດາໂຄງການ ແລະອົງການຈັດຕັ້ງສັງຄົມໄດ້ຊອກຄູ່ຮ່ວມທຸລະກິດ ແລະເປັນການຫຼຸດຜ່ອນອັດຕາການວ່າງງານ, ຫຼຸດຜ່ອນການເຄື່ອນຍ້າຍແຮງງານໄປເຮັດວຽກຢູ່ຕ່າງປະເທດແບບບໍ່ຖືກຕ້ອງ.

____________

ຂຽນໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์