ສະເຫຼີມສະຫຼອງວັນລ້າງມືສາກົນ

  ປະຈຸບັນເຫັນວ່າຍັງມີຫຼາຍພະຍາດທີ່ເປັນໄພຂົ່ມຂູ່ຕໍ່ສຸຂະພາບຂອງເດັກນ້ອຍລາວ ຊຶ່ງເປັນສາ ເຫດເຮັດໃຫ້ນັກຮຽນຈຳນວນໜຶ່ງ ອອກໂຮງຮຽນ, ອັດຕາການປະລະ ໂຮງຮຽນຍັງສູງ ແລະຂາດຮຽນ. ບັນດາພະຍາດທີ່ມັກເກີດຂຶ້ນກັບ ເດັກສ່ວນຫຼາຍແມ່ນພະຍາດໄຂ້ຍຸງ, ອັກເສບລະບົບຫາຍໃຈຮຸນ ແຮງ, ຖອກທ້ອງ, ແມ່ກາຝາກໃນ ລຳໄສ້, ປາກ-ແຂ້ວ, ໄຂ້ຫວັດໃຫຍ່ ແລະ ພະຍາດອື່ນໆ, ສະນັ້ນ, ສຸຂະພາບເປັນປັດໄຈທີ່ສຳຄັນທີ່ອຳນວຍຄວາມສະດວກໃຫ້ແກ່ການສຶກສາຮໍ່າຮຽນເພື່ອປະສົບຜົນສຳ ເລັດ, ຖ້າເດັກມີສຸຂະພາບແຂງແຮງ ບໍ່ເຈັບບໍ່ເປັນ, ບໍ່ອຶດຫິວ, ສະພາບ ຂອງໂຮງຮຽນເປັນທີ່ໜ້າຢູ່, ສະອາດ ແລະປອດໄພເດັກສາມາດ ຮຽນ ແລະມີໂອກາດປະສົບຜົນສໍາເລັດໃນການສຶກສາຈະນຳໄປສູ່ການມີທັກສະໃນການຮັກສາສຸຂະພາບ ແລະການດຳລົງຊີວິດທີ່ດີຂຶ້ນ.

 ໃນວັນທີ 16 ຕຸລາ ຜ່ານມາທີ່ນະຄອນຫຼວງວຽງ ຈັນກະຊວງສຶກສາທິການ ແລະກີລາຮ່ວມກັບອົງການ GIZ ແລະໂຮງຮຽນນິຣະດາໄດ້ຈັດກິດຈະກສະເຫຼີມສະຫຼອງວັນລ້າງມືສາກົນ (15 ຕຸລາ) ເພື່ອເຮັດໃຫ້ວັນດັ່ງກ່າວມີຄວາມໝາຍຄວາມສຳຄັນສຳລັບທຸກຄົນໃຫ້ມີຈິດສຳນຶກ ແລະໃຫ້ກາຍເປັນຄວາມລຶ້ງເຄີຍໃນການລ້າງມືໃສ່ສະບູທຸກຄັ້ງໃນການດຳລົງຊີວິດປະຈຳວັນພ້ອມທັງສົ່ງຜົນສະທ້ອນອັນດີໃຫ້ແກ່ການປະຕິບັດ 5 ຫຼັກມູນການສຶກສາ: ຄຸນສົມບັດສຶກສາ,ປັນຍາສຶກສາ,ສິລະປະສຶກສາ, ພາລະ

ສຶກສາ ແລະແຮງງານ ສຶກສາ, ກອງປະຊຸມສະມັດຊາ ຂອງອົງການສະຫະປະຊາຊາດ ໄດ້ຕົກລົງເອົາປີ 2008 ເປັນປີສຸຂະອະນາໄມ, ໃນນັ້ນສຳນັກງານໃຫຍ່ຂອງອຸຍນິເຊັບປະຈຳນິວຢອກພ້ອມຄູ່ຮ່ວມງານອື່ນໆ ເຫັນດີເອົາວັນທີ 15 ຕຸລາ ຂອງທຸກໆປີເປັນວັນລ້າງມືສາກົນ, ຢູ່ ສປປ ລາວ ໄດ້ເລີ່ມຈັດຕັ້ງປະຕິບັດໂຄງການດັ່ງກ່າວມາແຕ່ປີ 2008 ໂດຍໄດ້ມີການຈັດກິດຈະກຳ ແລະສ້າງຂະບວນການລ້າງມືຢູ່ໃນສາຍສາມັນ ແລະສະຖາບັນສ້າງຄູທົ່ວປະເທດ.

 ໂຮງຮຽນອະນຸບານ, ປະຖົມ ແລະມັດທະຍົມນິຣະດາ ໄດ້ຈັດຕັ້ງປະຕິບັດໂຄງການວຽກງານສົ່ງເສີມສຸຂະພາບດີໃນໂຮງຮຽນມາແຕ່ປີ 2017, ທັງເປັນການເຄື່ອນໄຫວກິດຈະກຳໃນການປູກຈິດສຳນຶກໃຫ້ແກ່ນັກຮຽນໃຫ້ມີຄວາມລຶ້ງເຄີຍເວລາກ່ອນ ຫຼື ຫຼັງກິນອາຫານຕ້ອງລ້າງມືໃຫ້ສະອາດທຸກຄັ້ງເພື່ອເປັນການປ້ອງກັນພະຍາດເຂົ້າມາສູ່ຮ່າງກາຍ.

-----------------

 ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์