ອ່າງເກັບນໍ້າບ້ານໃຫຍ່ນາຈະເລີນ ສະໜອງນໍ້າໄດ້ 250 ເຮັກຕາ

ໂຄງການພັດທະນາຊົນນະບົດ ແລະສູນບໍລິການເຕັກນິກກະສິກໍາບ້ານໃຫຍ່ນາຈະເລີນເມືອງສັງທອງ ເປັນໂຄງການຊ່ວຍເຫຼືອລ້າຈາກລັດຖະບານ ສ. ເກົາ ຫຼີ ເພື່ອເຮັດໃຫ້ປະຊາຊົນໄດ້ນໍາໃຊ້ນໍ້າເຂົ້າໃນການຜະລິດກະສິກໍາ, ຊຶ່ງໂຄງການເປັນຫົວງານອ່າງເກັບນໍ້າ (ເຂື່ອນດິນ) ເນື້ອທີ່ອ່າງໂຕ່ງ 450 ເຮັກຕາ, ບໍລິມາດເກັບນໍ້າໄດ້ທັງໝົດ 2,79 ລ້ານແມັດກ້ອນ, ສາມາດສະໜອງນໍ້າໄດ້ 250 ເຮັກຕາ.  

 ອີງຕາມຂໍ້ມູນຈາກເມືອງສັງທອງໃຫ້ຮູ້ວ່າ: ໂຄງການພັດທະນາຊົນນະບົດ ແລະສູນບໍລິການເຕັກນິກກະສິກໍາບ້ານໃຫຍ່ນາຈະເລີນ ເມືອງສັງທອງ ນະຄອນຫຼວງວຽງ ຈັນ ເປັນໂຄງການຊ່ວຍເຫຼືອລ້າຈາກລັດຖະບານ ສ.ເກົາຫຼີ ມູນ ຄ່າ 4,02 ລ້າໂດລາສະຫະລັດ ຫຼື ປະມານ 34,5 ຕື້ກີບ ໃນນັ້ນມູນຄ່າການກໍ່ສ້າງໂຄງການ 2,64 ລ້ານໂດລາ ແລະ ສີດຊີມັງແກນເຂື່ອນ 2 ແສນໂດລາ, ສ່ວນທີ່ເຫຼືອເປັນຄ່າບໍລິຫານຂອງບໍລິສັດ DA SAN CONSUL TANTS ແລະ ຈັດຝຶກອົບຮົມໃຫ້ຊາວນາ, ໂຄງການດັ່ງກ່າວໄດ້ດໍາເນີນການກໍ່ສ້າງ 3 ປີ ເລີ່ມແຕ່ຕົ້ນປີ 2016 ຫາເດືອນເມສາ 2019 ໃນນັ້ນມີບໍລິສັດທີ່ປຶກສາ DASAN CO NSUL TANTS ຈາກ ສ. ເກົາ ຫຼີ ຕາງໜ້າໃຫ້ລັດວິສາຫະກິດຊຸມຊົນນະບົດ (KRC) ເປັນຜູ້ສ້າງແຜນດຳເນີນງານ ແລະເຊັນສັນຍາກໍ່ສ້າງລະຫວ່າງ DASAN CONSUL TANTS ແລະບໍລິສັດລາວຈະເລີນກໍ່ສ້າງຈຳກັດໂດຍສົມທົບກັບກົມຊົນລະປະທານພະແນກກະສິກຳ ແລະປ່າໄມ້ນະຄອນຫຼວງວຽງຈັນ, ຫ້ອງການກະສິກຳ ແລະປ່າໄມ້ ເມືອງສັງທອງ ເພື່ອດຳເນີນການຈັດຕັ້ງປະຕິບັດໂຄງການປະກອບມີກິດຈະກຳສຳຫຼວດ-ອອກແບບກໍ່ສ້າງຫົວງານ (ເຂື່ອນດິນ) ແລະຄອງເໝືອງແມ່ (ທໍ່ຢາງດຳຟີອີ ແລະຄອງເໝືອງເບຕົງ) ກໍ່ສ້າງສູນເຕັກນິກກະສິກຳ ແລະຝຶກອົບຮົມໃຫ້ຊາວນາ.

 ສໍາລັບໂຄງການແມ່ນມີທີ່ຕັ້ງຫ່າງຈາກໃຈກາງນະຄອນຫຼວງວຽງຈັນໄປທາງທິດເໜືອປະມານ 75 ກິໂລ, ຫົວງານຕັ້ງຢູ່ບ້ານໃຫຍ່ນາຈະເລີນໂດຍມີແມ່ນໍ້າສອງສາຍໄຫຼຈອດກັນໃນນັ້ນແມ່ນໍ້າເບື້ອງຂວາເອີ້ນຕາມກະແສໄຫຼຂອງນໍ້າແມ່ນຫ້ວຍເຮ້ຍ ແລະ ແມ່ນໍ້າຢູ່ເບື້ອງຊ້າຍເອີ້ນວ່ານໍ້າພຸກ, ໂຄງການເປັນຫົວງານອ່າງເກັບນໍ້າ (ເຂື່ອນດິນ) ເນື້ອທີ່ອ່າງໂຕ່ງ 450 ເຮັກຕາ, ບໍລິມາດເກັບນໍ້າໄດ້ທັງໝົດ 2,79 ລ້ານແມັດກ້ອນ, ປະລິມານນໍ້າທີ່ສາມາດໃຊ້ໃນການຜະລິດຕົວຈິງ 2,59 ລ້ານແມັດກ້ອນ, ຄວາມ ສູງຂອງເຂື່ອນ21,5 ແມັດ, ຄວາມຍາວ 260 ແມັດ, ຄວາມກວ້າງສັນເຂື່ອນ 5 ແມັດ, ຄອງເໝືອງແມ່ຍາວ 5.200 ແມັດ,ສາມາດສະໜອງນໍ້າໄດ້ 250 ເຮັກຕາ ໃນລະດູແລ້ງ ແລະລະດູຝົນຊຶ່ງເປັນໂຄງການທີ່ມີລັກສະນະນໍ້າໄຫຼເອງໂດຍບ້ານທີ່ໄດ້ຮັບຜົນປະໂຫຍດມີບ້ານເຕົາໄຫ,ນາໜ້ຽງ, ນາທຽມ ແລະບ້ານນາລາດລວມທັງໝົດ 120 ຄອບຄົວ; ປະຈຸບັນໂຄງການໄດ້ສຳເລັດການກໍ່ສ້າງ 100% ແລະຈະມີການເປີດນໍາໃຊ້ໃນເດືອນພະຈິກ 2019 ນີ້.

_____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์