ປີນີ້ອາກອນແຂວງວຽງຈັນ ຈະເກັບລາຍຮັບໄດ້ລື່ນແຜນ 2,65%

 ວຽງຈັນແມ່ນອີກແຂວງໜຶ່ງທີ່ມີຄວາມເອົາໃຈໃສ່ຕໍ່ການຈັດຕັ້ງປະຕິບັດຈັດເກັບລາຍຮັບເຂົ້າງົບປະມານຂອງລັດຊຶ່ງໄດ້ເຮັດໃຫ້ວຽກງານບັນລຸໄດ້ໝາກຜົນສຳເລັດຕາມລະ ດັບຄາດໝາຍວາງໄວ້ສະເພາະອາກອນແຂວງໃນ 9 ເດືອນຜ່ານມານີ້ເກັບໄດ້ແລ້ວ 144,2 ຕື້ກີບ ຄາດວ່າໝົດປີຈະລື່ນແຜນການປະມານ 2,65% ຈາກຕົວເລກທີ່ຕັ້ງໄວ້ທັງໝົດ 188,1 ຕື້ກີບ.

   ທ່ານ ພູເຂົາທອງ ທອງສະຫວັນ ຮອງຫົວໜ້າສ່ວຍສາອາກອນແຂວງວຽງຈັນ ເປີດເຜີຍຕໍ່ທິມຂ່າວໜັງສືພິມເສດຖະກິດ-ສັງຄົມ ຮູ້ວ່າ: ຜ່ານມາຄະນະພັກ, ຄະນະນຳພະແນກການເງິນສາຍຕັ້ງ ແລະ ສາຍຂວາງນັບແຕ່ຂັ້ນສູນກາງລົງຮອດທ້ອງຖິ່ນໄດ້ເອົາໃຈໃສ່ຊີ້ນຳໆພາຢ່າງໃກ້ຊິດຕິດແທດເປັນພິເສດຕໍ່ການເຄື່ອນໄຫວວຽກງານ ຊ່ວຍຊຸກຍູ້ຂຸດຄົ້ນລາຍຮັບພາຍໃນແຂວງຕາມທ່າແຮງທີ່ບົ່ມຊ້ອນ ແລະ ແກ້ໄຂບັນຫາຢ່າງທັນການພ້ອມດຽວກັນນັ້ນກໍໄດ້ມີການປັບປຸງແບບແຜນວິທີການເຮັດວຽກໃຫ້ສອດຄ່ອງພ້ອມຊັບຊ້ອນຈັດວາງພະນັກງານ ແລະ ບຸກຄະລາກອນຄືນໃໝ່ມີການແບ່ງງານ ແລະ ແບ່ງຄວາມຮັບຜິດຊອບຕົວຈິງຕາມຄວາມເໝາະສົມຂອງແຕ່ລະຄົນ ເຮັດໃຫ້ການຈັດຕັ້ງປະຕິບັດວຽກງານໄດ້ຮັບໝາກຜົນສຳເລັດຕາມລະດັບຄາດໝາຍໂດຍໃນ 9 ເດືອນຜ່ານມາອາກອນແຂວງສາມາດຈັດເກັບລາຍຮັບໄດ້ທັງໝົດ 144 ,2 ຕື້ກີບ ເທົ່າກັບ 76,67% ຂອງແຜນການປີທີ່ວາງໄວ້ 188,1 ຕື້ກີບ.

 ຂະນະທີ່ໃນ 3 ເດືອນທ້າຍປີອາກອນ ແຂວງວຽງຈັນຈະສູ້ຊົນເກັບໃຫ້ໄດ້ຕື່ມອີກ 49 ຕື້ກີບ ຄາດຄະເນລວມໝົດປີຈະໄດ້ 193 ຕື້ກີບລື່ນແຜນການປະມານ 2,65% ແຕ່ເພື່ອເຮັດໃຫ້ບັນໄດ້ຕາມຕົວເລກດັ່ງກ່າວ ທ່ານ ພູເຂົາທອງ ທອງສະຫວັນ ຢໍ້າວ່າ:  ຈະຕ້ອງໄດ້ເພີ່ມທະວີໃນການຄຸ້ມຄອງຕິດຕາມກວດກາຊຸກຍູ້ຫົວໜ່ວຍວິສາຫະ ກິດ, ບຸກຄົນ ແລະ ນິຕິບຸກຄົນທີ່ເຄື່ອນໄຫວທຸລະກິດພາຍໃນແຂວງໃຫ້ແຈ້ງ-ມອບອາກອນເປັນປົກກະຕິ, ເອົາໃຈໃສ່ຄຸ້ມຄອງເກັບອາກອນຂອດເຄື່ອນຍ້າຍສິນຄ້າໃຫ້ມີຄວາມຮັດກຸມໂດຍນຳໃຊ້ເຄື່ອງມືທີ່ທັນສະໄໝເພື່ອຄວາມສະດວກວ່ອງໄວໂປ່ງໃສ ແລະ ສຳລັບຫົວໜ່ວຍທີ່ລະເມີດບໍ່ມາແຈ້ງກໍຕ້ອງໄດ້ນຳໃຊ້ມາດຕະການຢ່າງເດັດຂາດທາງດ້ານກົດໝາຍ.

-----------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์