ຫຼວງພະບາງ ຈັດງານບຸນປະເພນີໄຫຼເຮືອໄຟ

 ບຸນປະເພນີໄຫຼເຮືອໄຟແມ່ນວັດທະນະທໍາປະເພນີອັນດີງາມທີ່ໄດ້ປະຕິບັດສືບທອດກັນມາແຕ່ບູຮານນະການ, ຊຶ່ງຈັດຂຶ້ນເພື່ອໄຫຼບູຊາຄຸນພະແມ່ຄົງຄາ ແລະນ້ອມລະນຶກ ເຖິງຄຸນຂອງພະພຸດພະທໍາ ແລະພະສົງຂໍໃຫ້ພົບພໍ້ແຕ່ຄວາມຈະເລີນຮຸ່ງເຮືອງເໜືອນດັ່ງແສງທຽນ-ແສງໄຟທີ່ໄຕ້ບູຊານັ້ນເອງ.

  ງານດັ່ງກ່າວໄດ້ຈັດຂຶ້ນໃນຕອນຄໍ່າຂອງວັນທີ 14 ຕຸລາ 2019 ໂດຍເລີ່ມຈາກການທໍາພິທີທາງ ສາດສະໜາ, ເທດສະຫຼອງເຮືອ ໄຟທີ່ວັດປ່າຮວກ ໜ້າຫໍພິພິທະພັນ ແຫ່ງຊາດຫຼວງພະບາງ ໂດຍເປັນປະທານຈັດງານຂອງທ່ານ ຈັນ ສຸກ ພັນໂດລັກ ເຈົ້ານະຄອນຫຼວງ ພະບາງ, ທ່ານ ບົວທອງ ແພງສະຫວັນ ປະທານກວດກາພັກ-ລັດແຂວງ,ທ່ານ ສຸກັນ ບຸນຍົງ ຮອງເຈົ້າແຂວງໆຫຼວງພະບາງພ້ອມດ້ວຍການນໍາຂອງແຂວງ,ນະຄອນ-ເມືອງ, ຄະນະກຳມະການຕະຫຼອດຮອດມວນຊົນທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.

 ທ່ານ ຈັນສຸກ ພັນໂດລັກ ໄດ້ກ່າວເປີດງານວ່າ: ປະເພນີໄຫຼເຮືອໄຟນີ້ແມ່ນເປັນປາງບຸນໜຶ່ງທີ່ໄດ້ຮັບການຈັດຕັ້ງປະຕິບັດ ແລະສືບທອດກັນມາແຕ່ບູຮານນະການຈົນເຖິງປະຈຸບັນ, ພໍເຖິງແຮມ 1 ຄໍ່າ ເດືອນ 11 ລາວຂອງທຸກໆປີຈະໄດ້ພ້ອມພຽງກັນເຮັດເຮືອໄຟຮູບຊົງຕ່າງໆ ທີ່ສອດຄ່ອງກັບຮີດຄອງ-ປະເພນີ ແລະ ຈັດຕັ້ງພິທີປະກວດ

ເຮືອໄຟງາມຂຶ້ນໂດຍແຫ່ໄປຕາມເສັ້ນທາງຖະໜົນສີສະຫວ່າງວົງຈົນເຖິງທ່ານໍ້າວັດຊຽງທອງແລ້ວໄຫຼລົງສູ່ແມ່ນໍ້າຂອງ, ໃນປີນີ້ມີເຮືອໄຟເຂົ້າຮ່ວມປະກວດທັງໝົດ 52 ລຳ, ມາຈາກບ້ານຕ່າງໆ ພາຍໃນເທສະບານນະຄອນຫຼວງພະບາງ, ສະຖາບັນການສຶກສາ,ຫົວໜ່ວຍທຸລະກິດ ແລະເຮືອໄຟຂອງຊາວໝຸ່ມ-ເຍົາວະຊົນເຂົ້າຮ່ວມ, ພິເສດປີນີ້ມີເຮືອໄຟການທ່ອງທ່ຽວລາວ-ຈີນເຂົ້າຮ່ວມສ້າງສີສັນພາຍໃນງານຖືວ່າມີຄວາມຄຶກຄື້ນມ່ວນຊື່ນກວ່າທຸກປີ.

ຜ່ານການປະກວດເຮືອໄຟປີນີ້ທ່າມກາງບັນຍາກາດອັນເບີກບານມ່ວນຊື່ນຄຶກຄື້ນໄປດ້ວຍຜູ້ຄົນຫຼາກຫຼາຍເຂົ້າມາທ່ຽວຊົມ ແລະສຳພັດໄຟແສງສີຈາກໂຄມໄຟປະດັບປະດາ ສະລັບຊັບຊ້ອນຢ່າງສວຍສົດງົດງາມຕັ້ງແຕ່ເລີ່ມຈົນຮອດປາຍສ່ວນຜົນການປະກວດອັນດັບ 1 ໄດ້ແກ່ ເຮືອໄຟ ມສ ສັນຕິພາບ, ອັນດັບ 2 ເຮືອໄຟ ມສ ພັນຫຼວງ, ອັນ ດັບ 3 ເຮືອໄຟວິທະຍາໄລເຕັກນິກ, ອັນດັບ 4 ເຮືອໄຟບ້ານນາວຽງຄຳ, ອັນດັບ 5 ເຮືອໄຟຮ້ານໜື່ນນາຜ້າໄໜ, ອັນດັບ 6 ເຮືອໄຟບ້ານວັດໝອງ....  

       

 ເຖິງແມ່ນວ່າການປະກວດຈະຈົບໄປແຕ່ຍັງເຫັນເຖິງຄວາມສາມັກຄີມີນໍ້າໃຈຮັກແພງຊ່ວຍເຫຼືອຮ່ວມກັນປະຕິບັດບຸນປະເພນີອັນເປັນມູນເຊື້ອວັດທະນາທຳຮີດຄອງ-ປະ ເພນີອັນດີງາມໃຫ້ຄຽງຄູ່ ຢູ່ກັບປວງຊົນຄົນຫຼວງພະບາງເມືອງມໍລະດົກຕະຫຼອດໄປ.

---------------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์