ສະຫຼອງວັນອາຫານໂລກ, ວັນສາກົນ ແລະສັບປະດາແຫ່ງຊາດ

  ເພື່ອສືບຕໍ່ການຮ່ວມມືກັບບັນດາປະຊາຊາດໃນໂລກພ້ອມກັນສົ່ງແຮງໃຈ ແລະສະໜັບສະໜູນໄປເຖິງຜູ້ທຸກຍາກ ແລະຜູ້ອຶດຫິວ, ຄົ້ນຄວ້າຊອກຫາວິທີການ ແລະ ມາດຕະການເພື່ອສູ້ຊົນຈັດຕັ້ງຜັນຂະຫຍາຍເນື້ອໃນຄໍາຂວັນຂອງ 3 ວັນດັ່ງກ່າວ, ໃນວັນທີ 16 ຕຸລາ 2019 ກະຊວງກະສິກໍາ ແລະ ປ່າໄມ້ຮ່ວມກັບອົງການສະຫະປະຊາ ຊາດໄດ້ຈັດພິທີສະເຫຼີມສະຫຼອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກປະຈໍາປີ 2019 ຂຶ້ນຢູ່ທີ່ສູນການຄ້າລາວ-ໄອເຕັກ, ນະຄອນຫຼວງວຽງຈັນ 

ໂດຍການໃຫ້ກຽດເຂົ້າຮ່ວມຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້, ທ່ານ ນາງຊາຣາ ເຊັກເກັນສ ຜູ້ປະສານງານອົງ ການສະ ຫະປະຊາຊາດປະຈໍາ ສປປ ລາວ, ພ້ອມ ນີ້ຍັງມີທ່ານຮອງເຈົ້າຄອງນະຄອນຫຼວງວຽງຈັນ, ທ່ານຮອງລັດຖະມົນຕີກະຊວງກະສິກໍາ ແລະປ່າໄມ້, ຜູ້ຕາງໜ້າຈາກອົງການອາຫານ ແລະການກະເສດປະຈຳລາວ, ອົງການເພື່ອການພັດທະນາຂອງສະຫະປະຊາຊາດປະຈໍາລາວ ແລະ ບັນດາເອກອັກຄະລັດຖະທູດ, ທູຕານຸທູດ, ແລະຄູ່ຮ່ວມພັດທະນາພ້ອມດ້ວຍແຂກທີ່ຖືກເຊີນເຂົ້າຮ່ວມຢ່າງເປັນຂະບວນຟົດຟື້ນ.

  ທ່ານ ລຽນ ທິແກ້ວ ກ່າວວ່າ: ການສະເຫຼີມສະຫຼອງວັນອາຫານໂລກປີ 2019 ນີ້ ແມ່ນຄົບຮອບ 39 ປີ ພາຍໃຕ້ຄຳຂວັນ: “ການກະທຳຂອງພວກເຮົາຄືອະນາຄົດຂອງພວກເຮົາ, ສົ່ງເສີມການກິນອາຫານທີ່ດີມີຄຸນຄ່າຕໍ່ສຸຂະພາບເພື່ອການລຶບລ້າງຄວາມອຶດຫິວໃນໂລກ”; ການລະນຶກວັນສາກົນລຶບລ້າງຄວາມທຸກຍາກແມ່ນຄົບຮອບ 27 ປີ ພາຍໃຕ້ຄຳຂວັນ: “ຮ່ວມກັນສ້າງຄວາມເຂັ້ມແຂງ ໃຫ້ກັບເດັກນ້ອຍ, ຄອບຄົວ ແລະຊຸມຊົນ ເພື່ອລຶບລ້າງຄວາມທຸກຍາກ” ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກຄົບຮອບ 16 ປີ ພາຍໃຕ້ຄໍາຂວັນ: “ແຂ່ງຂັນຮັກຊາດ ແລະພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນ”.

 ການສະເຫຼີມສະຫຼອງ 3 ວັນດັ່ງກ່າວໃນປີນີ້ແມ່ນດໍາເນີນໄປຢູ່ໃນເງື່ອນໄຂທີ່ປະເທດເຮົາໄດ້ມີຜົນສຳເລັດເບື້ອງຕົ້ນໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ຄຽງຄູ່ກັນນັ້ນຫຼາຍປະເທດກໍ່ໄດ້ຖືກຜົນກະທົບຈາກໄພພິບັດຕ່າງໆຢ່າງໜັກໜ່ວງຊຶ່ງໄດ້ກາຍເປັນອຸປະສັກຕໍ່ການສູ້ຊົນບັນລຸຄາດໝາຍໃນການລຶບລ້າງຄວາມທຸກຍາກ ແລະໄພອຶດຫິວຂອງໂລກທີ່ວາງໄວ້ໃຫ້ສຳເລັດໂດຍພື້ນຖານໃນປີ 2030.

ທ່ານ ນາຊາຣ໌ ຮາຢັດທ໌ ຜູ້ຕາງໜ້າອົງການອາຫານ ແລະການກະເສດແຫ່ງສະຫະປະຊາຊາດປະຈຳລາວກ່າວວ່າ: ການບໍລິໂພກອາຫານທີ່ບໍ່ດີຕໍ່ສຸຂະພາບບໍ່ວ່າຈະຍ້ອນຄວາມທຸກຍາກ ຫຼື ພຶດຕິ ກຳການກິນອາຫານທີ່ບໍ່ດີບໍ່ພຽງແຕ່ ເປັນສາເຫດຫຼັກ 1 ໃນ 5 ຂອງການຕາຍ ຂອງປະຊາກອນໂລກເທົ່ານັ້ນ, ແຕ່ມັນຍັງໝາຍເຖິງການສູນເສຍງົບປະມານ ແຫ່ງຊາດປະມານ 2 ພັນຕື້ໂດລາສະ ຫະລັດໃນທົ່ວໂລກ, ພະຍາດຕຸ້ຍ ແລະ ຮູບແບບການຂາດໂພຊະນາການອື່ນໆ ຍັງສົ່ງຜົນກະທົບໃຫ້ປະຊາກອນ

ໜຶ່ງສ່ວນສາມຂອງປະຊາກອນໂລກ ແລະມີການຄາດຄະເນວ່າພາຍໃນປີ 2025 ປະມານເຄິ່ງຂອງປະຊາກອນໂລກຈະໄດ້ຮັບຜົນກະທົບຈາກບັນຫາພະຍາດຕຸ້ຍ ແລະຂາດໂພຊະນາການ, ສຳລັບ ສປປ ລາວ ຍັງເປັນປະເທດທີ່ຍັງມີຄວາມ ສ່ຽງຕໍ່ກັບທ່າອ່ຽງນີ້, ອີງຕາມການລາຍງານໃນປີ 2019 ວ່າດ້ວຍສະຖານະຂອງການຄໍ້າປະກັນສະບຽງອາຫານ ແລະໂພຊະນາການໃນໂລກ, ລາວມີອັດ ຕາການແຜ່ກະຈາຍຂອງການຂາດສານ ອາຫານປະມານ 16,5%, ທີ່ຄິດໄລ່ຈາກອັດຕາຂອງປະຊາກອນຜູ້ທີ່ມີການບໍລິໂພກອາຫານປະຈຳວັນຕໍ່າກວ່າລະດັບຄວາມຕ້ອງການຂອງຮ່າງກາຍ, ໂດຍຕົວເລກດັ່ງກ່າວນີ້ເມື່ອທຽບໃສ່ອັດຕາສະເລ່ຍໃນບັນດາປະເທດພາກພື້ນອາຊີຕາ ເວັນອອກສ່ຽງໃຕ້ເຫັນວ່າສູງສົມຄວນສະເລ່ຍ 9,4%.

_____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์