ກຽມເປີດການແຂ່ງຂັນບານເຕະເຍົາວະຊົນຊາຍ ຊີງຂັນ ສຕລ

   ວັນທີ 15 ຕຸລາ 2019 ທີ່ຫ້ອງປະຊຸມໃຫຍ່ສະຫະພັນບານເຕະແຫ່ງຊາດລາວ (ສຕລ) ໄດ້ມີການຈັບສະຫຼາກປະຄົບຄູ່ການແຂ່ງຂັນບານເຕະເຍົາວະຊົນຊາຍ (ຮຸ່ນອາຍຸບໍ່ເກີນ 15 ປີ) ຊີງຂັນ ສຕລ ປະຈໍາປີ 2019 ໂດຍມີທ່ານ ໂພທອນ ຖານະວະດີ ຫົວໜ້າພະ ແນກຈັດການແຂ່ງຂັນ ສຕລ, ພ້ອມດ້ວຍພະນັກງານວິຊາການທີ່ກ່ຽວຂ້ອງ ແລະບັນດາທີມທີ່ເຂົ້າຮ່ວມການແຂ່ງຂັນ.

   ສຳລັບທີມທີ່ເຂົ້າຮ່ວມໃນປີນີ້ມີທັງໝົດ 15 ທີມປະກອບມີ: ສະໂມສອນເອສະຣາ (ແຊ້ມເກົ່າ) ສະໂມສອນລາວໂຕໂຢຕ້າເອັຟຊີ (ອັນດັບ 3), ສະໂມສອນລ໋ອບສະເຕ ດ໋ຽມເອັຟຊີ (ອັນດັບ 4), ມາສເຕີ້ເຊເວັ້ນເອັຟຊີ, ເຄພີເອັສເອັຟ ຊີ, ແບລາວເອັຟຊີ, ວຽງຈັນເອັຟ ຊີ, ທຣີນີຕີເອັຟຊີ, ດີເຄເອັຟຊີ, ຊ້າງນ້ອຍເອັຟຊີ, ເອສທີທີເອັຟຊີ, ວຽງຈັນ ເອັຟທີ, ໄຊເສດຖາສະເຕດ໋ຽມເອັຟຊີ, ທະເວັນຕີຊິກຢູໄນເຕັດແລະແຄນລາວຢູໄນເຕັດ.

ຈຸດປະສົງຂອງການຈັດແຂ່ງ ຂັນກໍເພື່ອເປັນການພັດທະນາກີລາ ບານເຕະໃຫ້ມີການເຄື່ອນໄຫວຢ່າງ ເປັນປົກກະຕິ ແລະຕໍ່ເນື່ອງພ້ອມທັງ ປະຕິບັດຕາມແຜນການຈັດແຂ່ງ ຂັນປະຈຳປີ 2019 ໃຫ້ບັນລຸເປົ້າໝາຍ, ຮູບແບບແບ່ງກຸ່ມ 2 ກຸ່ມ ໂດຍແຂ່ງຂັນແບບພົບກັນໝົດຮອບດຽວ, ທີມທີ່ມີຄະແນນເປັນອັນດັບໜຶ່ງ ແລະອັນດັບສອງຂອງແຕ່ລະກຸ່ມຈະຜ່ານເຂົ້າຮອບຮອງຊະນະເລີດຕໍ່ໄປ.

 ຜົນການຈັບສະຫຼາກປະກົບຄູ່ການແຂ່ງຂັນມີດັ່ງນີ້: ກຸ່ມເອມີເຄພີເອັສເອັຟຊີ, ທຣີນີຕີເອັຟຊີ, ແຄນລາວຢູໄນເຕັດ, ວຽງຈັນເອັຟທີ, ລ໋ອບສະເຕດ໋ຽມເອັຟຊີ, ດີເຄເອັຟຊີ, ແບລາວເອັຟຊີ ແລະໄຊເສດຖາ ສະເຕດ໋ຽມເອັຟຊີ, ກຸ່ມບີປະກອບມີລາວໂຕໂຢຕ້າເອັຟຊີ,ວຽງຈັນເອັຟຊີ, ມາສເຕີ້ເຊເວັ້ນ ເອັຟຊີ, ເອັສທີທີເອັຟຊີ, ທະເວັນຕີຊິກຢູໄນເຕັດ, ເອສະຣາເອັຟຊີ ແລະຊ້າງນ້ອຍເອັຟຊີ, ລະບຽບການແຂ່ງຂັນຈະໃຊ້ເວລາທັງໝົດ 80 ນາທີຕໍ່ນັດໂດຍແບ່ງເປັນເຄິ່ງລະ 40 ນາທີ ແລະພັກເຄິ່ງເວລາ 15 ນາ ທີ, ໂດຍຈະແຂ່ງຂັນໃນສະໜາມຂະໜາດມາດຕະຖານ 11 ຄົນ.

  ທີມທີ່ເຂົ້າຮ່ວມການແຂ່ງຂັນແມ່ນບໍ່ໄດ້ເສຍຄ່າສະໝັກ ແລະ ຈະໄດ້ຮັບເງິນອຸດໜູນທີມ 3 ລ້ານ ກີບ ພ້ອມທັງໄດ້ຮັບບານສຳລັບການຝຶກຊ້ອມຈຳນວນ 10 ໜ່ວຍຕໍ່ທີມໃນການເຂົ້າຮ່ວມການແຂ່ງຂັນ, ສະໂມສອນຊະນະເລີດຈະໄດ້ຮັບເງິນລາງວັນຈໍານວນ 15 ລ້ານ ກີບພ້ອມດ້ວຍຂັນລາງວັນຊະນະເລີດ ແລະຫຼຽນລາງວັນ, ອັນດັບ 2 ແລະອັນດັບ 3 ຈະໄດ້ຮັບຫຼຽນລາງວັນ ແລະເງິນລາງວັນຕາມກົດລະບຽບ.          

       

  ການແຂ່ງຂັນບານເຕະເຍົາວະຊົນຊາຍ (ຮຸ່ນອາຍຸບໍ່ເກີນ 15 ປີ) ຊີງຂັນ ສຕລ 2019 ແມ່ນຈະ ເລີ່ມແຂ່ງຂັນໃນວັນເສົາ 19 ຕຸລາ 2019 ຊຶ່ງຈະແຂ່ງຂັນຢູ່ສະ ໜາມຫຍ້າທຽມສະຫະພັນບານເຕະແຫ່ງຊາດລາວ, ສ່ວນຕາຕະລາງປະກົບຄູ່ການແຂ່ງຂັນແມ່ນຈະແຈ້ງໃຫ້ຮັບຊາບຕາມພາຍຫຼັງ.

----------------------

ໜັງສືພິມເສດຖະກິດ-ສັງຄົມ

แชร์