ນໍ້າກັດຢໍລະປາ ດຶງດູດນັກທ່ອງທ່ຽວໄດ້ເພີ່ມຂື້ນທຸກປີ

  ແຫຼ່ງທ່ອງທ່ຽວນໍ້າຕົກຕາດນໍ້າກັດຢໍລະປາເປັນອີກສະຖານທີ່ທ່ອງທ່ຽວທາງທຳມະຊາດແບບອະລັກປະຊາຊົນມີສ່ວນຮ່ວມຂອງແຂວງອຸດົມໄຊທີ່ຜູ້ພັດທະນາໄດ້ລົງທຶນພັດທະນາສ້າງສິ່ງອຳນວຍຄວາມສະດວກຕ່າງໆ ເປັນຕົ້ນພື້ນຖານໂຄງລ່າງ, ກິດຈະກຳການທ່ອງທ່ຽວ ແລະອື່ນໆເພື່ອເຮັດໃຫ້ໄດ້ມາດຖານລະດັບສາກົນສາມາດດຶງດູດເອົານັກທ່ອງທ່ຽວຈາກຕ່າງປະເທດເຂົ້າມາທ່ຽວຊົມປະເທດລາວກໍຄືນໍ້າກັດຢໍລະປາໃຫ້ນັບມື້ນັບຫຼາຍຂຶ້ນຂະນະທີ່ປີນີ້ມີນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາ ທ່ຽວຊົມນໍ້າກັດຢໍລະປາເພີ່ມຂຶ້ນປະມານ 50% ສ່ວນໃຫຍ່ມາຈາກຝຣັ່ງ ແລະເອີຣົບ.

ທ່ານ ສົມເພັດ ມ້າວປະເສີດ ປະທານແຫຼ່ງທ່ອງທ່ຽວນໍ້າຕົກຕາດນໍ້າກັດຢໍລະປາໃຫ້ສຳພາດວ່າ: ພາຍຫຼັງທີ່ໄດ້ມີການສຶກສາສຳຫຼວດ ແລະກໍໄດ້ລົງມືພັດທະນາພື້ນຖານໂຄງລ່າງຕ່າງໆ ເພື່ອເປັນການອຳນວຍຄວາມສະດວກໃຫ້ແກ່ບັນດານັກທ່ອງທ່ຽວທີ່ຈະເຂົ້າມາທ່ຽວຊົມນໍ້າກັດຢໍລະປາຊຶ່ງໃນປີ 2016 ໄດ້ເປີດໃຫ້ບໍລິການແກ່ນັກທ່ອງ ທ່ຽວຢ່າງເປັນທາງການໂດຍນັກທ່ອງທ່ຽວທັງພາຍໃນ ແລະຕ່າງປະເທດກໍເຂົ້າມາທ່ຽວຊົມຢ່າງຫຼວງຫຼາຍເນື່ອງຈາກມີຫຼາກຫຼາຍກິດຈະກຳໃຫ້ແກ່ນັກທ່ອງທ່ຽວນອກນັ້ນຍັງມີເຮືອນພັກ, ຣີສອດ, ໝູ່ບ້ານກຶມມຸ, ການຍ່າງປ່າ ແລະອື່ນໆທີ່ສ້າງຄວາມປະທັບໃຈໃຫ້ແກ່ນັກທ່ອງທ່ຽວເມື່ອໄດ້ມາໂດຍສະເພາະທຳມະຊາດທີ່ສວຍສົດງົດງາມ ອັນເປັນທີ່ຈັບໃຈຂອງນັກທ່ອງທ່ຽວ.

  ພາຍຫຼັງທີ່ເປີດໃຫ້ບໍລິການນັກທ່ອງທ່ຽວໄດ້ເຂົ້າມາເພີ່ມຂຶ້ນໃນແຕ່ລະປີໂດຍປີ 2017-2018 ນັກທ່ອງທ່ຽວເພີ່ມຂຶ້ນກວ່າ 100% ແລະ ໃນປີນີ້ເຫັນວ່າມີນັກທ່ອງ ທ່ຽວເຂົ້າມາທ່ຽວຊົມນ້ຳກັດຢໍລະປາເພີ່ມຂຶ້ນເກີນ 50% ຂອງແຜນການແລ້ວຊຶ່ງສ່ວນໃຫຍ່ແມ່ນນັກທ່ອງທ່ຽວຈາກຝຣັ່ງ, ເອີຣົບ ແລະ ບັນດາປະເທດໃກ້ຄຽງໃນອາຊຽນລວມທັງຄົນລາວພາຍໃນແຂວງ ແລະຕ່າງແຂວງກໍໃຫ້ຄວາມສົນໃຈຫຼາຍ, ມີຕົວເລກທີ່ເພີ່ມຂຶ້ນໃນທຸກໆປີ.

ທ່ານ ສົມເພັດ ມ້າວປະເສີດ ກ່າວຕື່ມວ່າ: ແຫຼ່ງທ່ອງທ່ຽວນ້ຳກັດຢໍລະປາແມ່ນມີສິ່ງອຳນວຍຄວາມສະດວກຫຼາຍຢ່າງໄວ້ຄອຍບໍລິການລູກຄ້າໂດຍໄດ້ລົງທຶນພັດທະນາແຫຼ່ງທ່ອງທ່ຽວດັ່ງກ່າວໃຫ້ໄດ້ລະດັບມາດຖານສາກົນເພື່ອໃຫ້ຕ່າງປະເທດໄດ້ມາເຫັນແລ້ວຢາກກັບມາທ່ຽວອີກຊຶ່ງເປັນການທ່ອງທ່ຽວແບບທຳມະຊາດ, ການຍ່າງປ່າ, ຂີ່ສະລິງ,ຂົວອູ່,ຂີ່ລົດແລະອື່ນໆ ຊຶ່ງມີຫຼາຍກວ່າ 50 ລາຍການທ່ອງທ່ຽວ,ແຕ່ລະກິດຈະກຳແມ່ນມີລາຄາທີ່ເໝາະສົມບໍ່ແພງເກີນໄປ, ນໍ້າກັດຢໍລະປາຕັ້ງຢູ່ເມືອງໄຊ ແຂວງອຸດົມໄຊ ໂດຍຫ່າງຈາກສະໜາມບິນ 16 ກິໂລແມັດໃຊ້ເວລາເດີນທາງພຽງແຕ່ 20 ນາທີເທົ່ານັ້ນຫາກທ່ານໃດໄດ້ມາແຂວງອຸດົມໄຊກໍຢ່າລືມແວ່ໄປທ່ຽວຊົມນໍ້າກັດຢໍລະປາແລ້ວທ່ານຈະໄດ້ເຫັນກັບທຳມະຊາດທີ່ສວຍສົດງົດງາມດັ່ງທີ່ບໍ່ເຄີຍເຫັນມາກ່ອນ.

_____________

 ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์