ຊົມເຊີຍກອງຄຸ້ມຄອງພາສີ II ລາຍຮັບ 9 ເດືອນ ລື່ນແຜນປີແລ້ວ 16,21% ຄາດໝົດ 2019 ຈະເກັບໄດ້ເກືອບ ຕື້ກີບ

ການຈັດຕັ້ງປະຕິບັດເກັບລາຍຮັບເຂົ້າງົບປະມານແຫ່ງລັດປີ 2019 ຂອງກອງຄຸ້ມຄອງພາສີ II (ແຂວງອຸດົມໄຊ-ແຂວງຜົ້ງສາລີ) ເພີ່ມຂຶ້ນແຕ່ລະເດືອນ,ສະແດງອອກໃນ 9 ເດືອນມານີ້ສາມາດປະຕິບັດໄດ 52,29 ຕື້ກວ່າກີບ ເທົ່າກັບ 116,21% ຂອງແຜນການປີ, ລື່ນແຜນການແລ້ວ 16,21%, ສ່ວນອີກ 3 ເດືອນຈະສູ້ຊົນເກັບລາຍຮັບໃຫ້ໄດ້ 5 ຕື້ກີບ ແລະຄາດຄະເນໝົດປີຈະປະຕິບັດໄດ້ 58 ຕື້ກີບເທົ່າກັບ 128,88% ຂອງແຜນການປີ.

  ທ່ານ ບຸນເພັງ ສຸພັດທອນ ຫົວໜ້າກອງຄຸ້ມຄອງພາສີ II ເປີດເຜີຍວ່າ: ກອງຄຸ້ມຄອງພາສີ II ປະກອບມີຂະແໜງບໍລິຫານແລະກວດກາພາຍໃນ, ຂະແໜງຕ້ານ ແລະກວດສອບຄືນການແຈ້ງພາສີ, ມີ ກອງກວດກາພາສີປະຈຳແຂວງອຸດົມ ໄຊ, ມີ 2 ດ່ານພາສີສາກົນຄື: ດ່ານພາ ສີສາກົນລານຕູ້ຍ, ດ່ານພາສີສາກົນປາງຫົກ ແລະ 2 ດ່ານພາສີທ້ອງຖິ່ນຄື: ດ່ານພາສີທ້ອງຖິ່ນປ່າຄາ,ດ່ານພາສີທ້ອງຖິ່ນພູຫຼັກຄໍາ,ປະກອບມີພະນັກງານ-ເຈົ້າໜ້າພາສີປະຈຳທັງໝົດ 41 ທ່ານ, ຍິງ 4 ທ່ານ,ມີສະມາ ຊິກພັກທັງໝົດ 35 ສະຫາຍ, ຍິງ 3 ສະຫາຍ.

ສຳລັບການຈັດຕັ້ງປະຕິບັດວຽກງານວິຊາສະເພາະໃນໄລຍະ 9 ເດືອນຜ່ານມາກອງຄຸ້ມຄອງພາສີ II ໄດ້ຖືສຳຄັນວຽກເອົາວຽກງານການເມືອງແນວຄິດເປັນຫຼັກ, ສຶກສາອົບຮົມການເມືອງ-ແນວຄິດໃຫ້ບັນດາຄະນະດ່ານ, ກອງກວດກາພາສີປະຈຳແຂວງ, ພະນັກງານ-ເຈົ້າໜ້າທ່ີພາສີມີຄວາມເຂົ້າໃຈ,ເຊື່ອມຊຶມຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເຮັດໃຫ້ມີຄວາມອຸ່ນອ່ຽງທຸ່ນທ່ຽງ, ມີຄວາມເຊື່ອໝັ້ນຕໍ່ການຈັດຕັ້ງ, ມີຄວາມສາມັກຄີເປັນເອກະພາບ ແລະ ມີລະບຽບວິໄນຢ່າງເຂັ້ມ ງວດ, ຕ້ານການສວຍໃຊ້ສິດໜ້າທີ່ເພື່ອຫາຜົນປະໂຫຍດສ່ວນຕົວ, ມີຄວາມໂປ່ງໃສຮອບດ້ານ; ປັບປຸງ ແລະສ້າງກົນໄກການຄຸ້ມຄອງ, ຕິດຕາມ, ກວດກາ-ກວດການການຈັດຕັ້ງປະຕິບັດວຽກງານວິຊາສະເພາະຂອງບັນດາດ່ານ, ພະນັກງານວິຊາການພາຍໃນຄວາມຮັບຜິດຊອບຂອງກອງຄຸ້ມຄອງພາສີ II, ປັບປຸງແບບແຜນວິທີເຮັດວຽກຢູ່ບັນດາດ່ານພາສີຊາຍແດນຄືນໃໝ່ໃຫ້ມີຄວາມລະອຽດ, ເພື່ອແນໃສ່ການອຳນວຍຄວາມສະດວກໃຫ້ແກ່ຜູ້ປະກອບການ ແລະບໍລິການໃຫ້ມີຄວາມວ່ອງໄວ.

  ສ່ວນການຈັດຕັ້ງປະຕິບັດວຽກງານເກັບລາຍຮັບເຂົ້າງົບປະມານແຫ່ງລັດໃນປີ 2019 ກອງຄຸ້ມຄອງພາສີ II ໄດ້ຮັບຕົວເລກແຜນການທັງໝົດ 45 ຕື້ກວ່າກີບ, ແຕ່ຜ່ານການຈັດຕັ້ງປະຕິບັດໃນ9 ເດືອນປີ 2019 ຜ່ານມາປະຕິບັດໄດ້ 52,29 ຕື້ກີບເທົ່າກັບ116,21% ຂອງ ແຜນການປີ (ລື່ນແຜນການປີແລ້ວ 16,21%) ຖ້າທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 82,96% ໃນນັ້ນ, ລາຍຮັບສ່ວນໃຫຍ່ໄດ້ມາຈາກການນຳເຂົ້າສິນຄ້າປະເພດເຄື່ອງອຸປະໂພກ-ບໍລິໂພກກວມເອົາ 25,2 2%, ນໍາເຂົ້າເພື່ອສົ່ງອອກ 23,85%, ພາຫະນະ 18,19%, ເຄື່ອງກໍ່ສ້າງ 10,94% ຖັດລົງມາແມ່ນເຄື່ອງໄຟຟ້າ, ນໍ້າມັນເຊື້ອໄຟ, ຄ່າຊັກພິເສດ, ຄ່າທຳ ນຽມ ແລະ ຄ່າປັບໃໝ-ຂາຍເຄື່ອງຮິບ, ຊິ້ນສ່ວນອາໄຫຼ່ ແລະອື່ນໆ.

ນອກນັ້ນ, ໃນ 9 ເດືອນປີ 2019 ກອງຄຸ້ມຄອງພາສີ II ສາມາດແກ້ໄຂຄະດີໄດ້ທັງໝົດ 489 ຄະດີ, ສະສາງແລ້ວ 481 ຄະດີ, ຄ້າງສະສາງ 8 ຄະດີ, ໃນນີ້ພາ ຫະນະ 441 ຄະດີ, ສະສາງແລ້ວ 435 ຄະດີ, ຄັ້ງ 6 ຄະດີ; ນ້ຳມັນເຊື້ອໄຟ 4 ຄະ ດີ, ສະສາງແລ້ວ 4 ຄະດີ; ສິນຄ້າທົ່ວໄປ 45 ຄະດີ, ສະສາງແລ້ວ 43 ຄະ ດີ, ຄ້າງ 2 ຄະດີ.

  ຂະນະທີ່ໃນອີກ 3 ເດືອນທ້າຍປີ 2019 ກອງຄຸ້ມຄອງພາສີ II ຈະສູ້ຊົນຂຸດຄົ້ນແຫຼ່ງລາຍຮັບທີ່ບົ່ມຊ້ອນທີ່ມີຂອງແຂວງ, ໃຫ້ໄດ້ຕາມແຜນການທີ່ວາງໄວ້ຈໍານວນ 5 ຕື້ກີບ ແລະຄາດຄະເນໝົດປີ 2019 ຈະປະຕິບັດໄດ້ 58 ຕື້ກີບ ເທົ່າກັບ 128,88% ຂອງແຜນການປີ, ລື່ນແຜນການປີ 28,88%.

______________

ຂຽນໂດຍ: ກະຊວງການເງິນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์