ຣັດເຊຍ-ຊາອຸດິດ ອາຣັບບີຮ່ວມມືດ້ານພະລັງງານ

  ທ່ານ ວະລາດິເມຍ ປູຕິນ ປະທານາທິບໍດີຂອງຣັດເຊຍເດີນ ທາງໄປຢ້ຽມຢາມຊາອຸດິດອາຣັບ ບີ ເປັນເທື່ອທຳອິດນັບຕັ້ງແຕ່ປີ 2007 ເພື່ອຮັດແໜ້ນ ແລະຍົກ ລະດັບຄວາມສຳພັນລະດັບທະວີ ພາຄີຫຼາຍດ້ານ ໂດຍສະເພາະດ້ານ ພະລັງງານ.

ຕາມຂ່າວຕ່າງປະເທດລາຍ ງານວ່າ ທ່ານ ປູຕິນ ຜູ້ນໍາຣັດເຊຍເດີນທາງເຖິງນະຄອນຫຼວງ ຣິຢາດ ໃນວັນທີ 14 ຕຸລາທີ່ຜ່ານມາ ຖື ເປັນການຢ້ຽມຢາມຊາອຸດດອາຣັບບີຢ່າງເປັນທາງການຄັ້ງທຳອິດໃນຮອບ 12 ປີຂອງຜູ້ນໍາຣັດ ເຊຍ ໂດຍທ່ານ ປູຕິນ ພ້ອມດ້ວຍຄະນະໄດ້ຮັບການຕ້ອນຮັບຢ່າງສົມກຽດ, ໂດຍຜູ້ແທນລະດັບສູງ ຂອງທັງສອງປະເທດລົງນາມຮ່ວມກັນໃນບັນທຶກຄວາມເຂົ້າໃຈ (ເອັມໂອຢູ) ປະມານ 20 ສະບັບ ຄວບຄຸມການຍົກລະດັບຄວາມຮ່ວມມືລະດັບທະວີພາຄີທັງໃນດ້ານອາກາດສະຍານ, ເຕັກໂນໂລ ຊີ, ກະສິກຳ, ສາທາລະນະສຸກ, ການສຶກສາ ແລະວັດທະນາທຳ ການແລກປ່ຽນການຢ້ຽມຢາມລະຫວ່າງກັນ ແລະສຳຄັນທີ່ສຸດຄືການ ຮ່ວມມືດ້ານພະລັງງານ ຊຶ່ງເຈົ້າ ຊາຍ ອັລດຸນ ອາຊິບບິນ ຊັລມາລັດຖະມົນຕີວ່າການກະຊວງພະລັງງານລະບຸວ່າ: ມີພຽງຄວາມຕາຍເທົ່ານັ້ນທີ່ຈະສາມາດພັດພາກຄວາມຮ່ວມມືດ້ານພະລັງງານລະຫວ່າງທັງສອງປະເທດໄດ້.

ທັງນີ້ ຊາອຸດິດ ອາຣັບບີ ເປັນປະເທດຜູ້ຜະລິດນໍ້າມັນລາຍໃຫຍ່ທີ່ສຸດຂອງໂລກ ແລະເປັນສະມາຊິກທີ່ມີອິດທິພົນທີ່ສຸດຂອງອົງ ການກຸ່ມປະເທດຜູ້ສົ່ງອອກນໍ້າມັນ (ໂອເປັກ) ສ່ວນຣັດເຊຍຢູ່ໃນຖານະປະເທດຜູ້ຜະລິດນໍ້າມັນລາຍໃຫຍ່ສຸດແຕ່ບໍ່ໄດ້ເປັນສະມາຊິກ ໂອເປັກ.

--------------------

 ໜັງສືພິມເສດຖະກິດ-ສັງຄົມ

แชร์