ເຊກອງ ເກັບລາຍຮັບພົບຫຼາຍຂໍ້ຫຍຸ້ງຍາກ 9 ເດືອນພູດທ້ອງຖິ່ນຫຼຸດແຜນ

ສະພາບການຈັດຕັ້ງປະຕິບັດແຜນງົບປະມານແຫ່ງລັດແຂວງເຊກອງໃນໄລຍະ 9 ເດືອນຜ່ານມາເຫັນວ່າຍັງມີຫຼາຍດ້ານພົບຄວາມຫຍຸ້ງຍາກ ແລະທ້າທາຍສູງ, ບັນຫາລວມແມ່ນຍັງເປັນແຜນສືບຕໍ່ແກ້ໄຂສະພາບຟືດເຄືອງທາງດ້ານການເງິນ-ງົບປະມານທີ່ເກີດຂຶ້ນໃນຫຼາຍສົກປີຜ່ານມາ ແລະ ຍັງເປັນແຜນຂາດດູນສູງ, ລາຍຮັບບໍ່ກຸ້ມລາຍຈ່າຍຕ້ອງໄດ້ຮັບດຸ່ນຈາກສູນກາງ.

  ຕໍ່ກັບສະພາບດັ່ງກ່າວຄະນະພັກ-ການນໍາຂອງແຂວງຕ້ອງໄດ້ເອົາໃຈໃສ່ຊຸກຍູ້ຢ່າງໃກ້ຊິດຕິດແທດ, ພ້ອມທັງຮີບຮ້ອນຈັດຕັ້ງຜັນຂະຫຍາຍດ້ວຍການຈັດແບ່ງງົບປະມານປະຈໍາປີມອບໃຫ້ບັນດາພະແນກການ,ອົງການຈັດຕັ້ງອ້ອມຂ້າງແຂວງ ແລະບັນດາເມືອງນໍາໄປສ້າງເປັນແຜນຂອງຕົນຢ່າງລະອຽດໃນການຈັດເກັບລາຍຮັບ ແລະປະຕິບັດລາຍຈ່າຍໃຫ້ໄປຕາມກອບເພດານ, ພ້ອມທັງກໍານົດລະບຽບຫຼັກການ, ມາດຕະການກ່ຽວກັບການຕິດຕາມກວດກາ,ຄຸ້ມຄອງລາຍຮັບ-ລາຍຈ່າຍໃຫ້ມີຄວາມໜັກແໜ້ນ, ເຂັ້ມແຂງ,ຮັດກຸ່ມ ແລະມີປະສິດທິພາບ-ປະສິດທິຜົນ, ແນໃສ່ຮັບປະກັນຄວາມໝັ້ນທ່ຽງທາງດ້ານງົບປະມານ-ການເງິນ ໄດ້ຢ່າງຖ່ວງທັນ ແລະທົ່ວເຖິງຕາມແຜນການທີ່ວາງໄວ້.

  ທ່ານ ຄຳຮູ້ ອ່ອນມະນີ ຫົວໜ້າພະແນກການເງິນແຂວງເຊກອງໃຫ້ຮູ້ວ່າ: ຜ່ານໄປ 3 ໄຕມາດການຈັດຕັ້ງປະຕິບັດແຜນງົບປະມານແຫ່ງລັດໂດຍສະເພາະແຜນການຈັດເກັບລາຍຮັບຢູ່ແຂວງເຊກອງ (ພູດທ້ອງຖິ່ນ) ບັນລຸໄດ້ທັງໝົດ 46,34 ຕື້ກີບ, ທຽບໃສ່ແຜນເບື້ອງຕົ້ນເທົ່າກັບ 61%,ທຽບໃສ່ແຜນດັດແກ້ເທົ່າກັບ 65%, ທຽບໃສ່ໄລຍະດຽວຂອງປີຜ່ານມາຫຼຸດລົງ 1% ໃນນັ້ນມີລາຍຮັບຈາກສ່ວຍສາອາກອນ 39,52 ຕື້ກີບ, ທຽບໃສ່ແຜນເບື້ອງຕົ້ນເທົ່າກັບ 58%, ທຽບໃສ່ແຜນດັດແກ້ເທົ່າ ກັບ 62%, ທຽບໃສ່ໄລຍະດຽວປີຜ່ານມາຫຼຸດລົງ 10% ແລະລາຍຮັບຈາກຊັບສິນ 6,82 ຕື້ກີບ, ທຽບໃສ່ແຜນປີເບື້ອງຕົ້ນເທົ່າກັບ 86%, ທຽບໃສ່ໄລຍະດຽວປີຜ່ານມາເພີ່ມຂຶ້ນ 16%.

  ສ່ວນການປະຕິບັດລາຍຈ່າຍ 9 ເດືອນ ເທົ່າກັບ 274,45 ຕື້ກີບທຽບ ໃສ່ແຜນ ດັດແກ້ເທົ່າກັບ 70% ທຽບໃສ່ໄລຍະດຽວເພີ່ມຂຶ້ນ 6% ໃນນີ້ຈ່າຍເງິນເດືອນ-ເງິນອຸດໜູນ 136,46 ຕື້ກີບ; ຈ່າຍເງິນ ນະໂຍບາຍ 22,6 ຕື້ກີບ; ຈ່າຍເງິນບໍລິ ຫານ-ວິຊາການ20,91 ຕື້ກີບ; ຈ່າຍເງິນດັດສົມ 8,72 ຕື້ກີບັ; ຈ່າຍເງິນແຮແຂວງ 1,24 ຕື້ກີບ; ຈ່າຍເງິນຊື້ຊັບສົມບັດ ຄົງທີ່ຮັບໃຊ້ບໍລິຫານ 26 ຮ້ອຍລ້ານກີບ ແລະຈ່າຍເງິນລົງທຶນ 84,21 ຕື້ກີບ.

  ທ່ານ ຄໍາຮູ້ ອ່ອນມະນີ ໃຫ້ຮູ້ຕື່ມວ່າ: ໂດຍລວມແລ້ວການຈັດຕັ້ງປະຕິບັດການເກັບລາຍຮັບ 9 ເດືອນຜ່ານມາພູດຂອງທ້ອງຖິ່ນບໍ່ບັນລຸໄດ້ຕາມແຜນ 10% ທັງນີ້ກໍຍ້ອນການຄຸ້ມຄອງການຈັດເກັບລາຍຮັບຈາກບັນດາຂະແໜງການບໍລິຫານວິຊາການ, ພາສີທີ່ດິນ, ລາຍຮັບວິຊາການ, ລາຍຮັບທີ່ຕິດພັນກັບໂຄງການແມ່ນຫຼຸດລົງ ແລະຄວາມເອົາໃຈໃສ່ ຄວາມກະຕືລືລົ້ນ, ຄວາມເປັນເຈົ້າການ ຂອງພະນັກງານຂະແໜງການເງິນນັບ ແຕ່ຂັ້ນແຂວງລົງຮອດຂັ້ນເມືອງຍັງບໍ່ ທັນໄດ້ດີ, ເຮັດໃຫ້ການເກັບລາຍຮັບເຂົ້າງົບປະມານຍັງບໍ່ທັນຄົບຖ້ວນ ແລະທ່ວງທັນກັບເວລາ, ສະນັ້ນໃນແຜນຄາດຄະເນ 3 ເດືອນຂ້າງໜ້າຈະຕ້ອງໄດ້ມີມາດຕະການຢ່າງລະອຽດເພື່ອສຸມໃສ່ໃຫ້ບັນລຸຕາມ ແຜນທີ່ວາງໄວ້.

___________

ຂຽນໂດຍ: ສັນຍາ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

   

แชร์