ພູວົງລາວເທວ ຄວ້າ 2 ລາງວັນດີເດັ່ນອາຊຽນ

 ສະພາບເສດຖະກິດ-ສັງຄົມມີການພັດທະນາຢ່າງໄວວາເຮັດໃຫ້ພຶດຕິກຳຂອງຄົນໂດຍສະເພາະລູກຄ້າມີການປ່ຽນແປງໄປນຳຫາກທຸລະກິດໃດບໍ່ມີການພັດທະນາຕົນເອງຕາມສະພາບຄວາມເປັນຈິງຂອງສັງຄົມກໍເຮັດໃຫ້ເສຍໂອກາດແລະລູກຄ້າໄປແຕ່ຖ້າຫາກທຸລະກິດໃດເຫັນມູມອງການປ່ຽນແປງແລ້ວຫັນມາພັດທະນາດ້ວຍນະວັດຕະກຳໃໝ່ເພີ່ມຊ່ອງທາງເຂົ້າເຖິງລູກຄ້າໄປພ້ອມກັບຄຸນນະພາບຂອງສິນຄ້າບວກໃສ່ການບໍລິການທີ່ດີກໍຈະເຮັດໃຫ້ເປັນທີ່ຮູ້ຈັກຂອງລູກຄ້າຫຼາຍຂຶ້ນເໝືອນດັ່ງກັບທຸລະກິດພູວົງ ລາວເທວໂຄໂປເລເຊີນຈຳກັດທີ່ຖືສຳຄັນໃນເລື່ອງນີ້ຈົນເຮັດໃຫ້ສິນຄ້າກາຍເປັນທີ່ຍອມຮັບແລະສາມາດຄວ້າ 2 ລາງວັນດີເດັ່ນລະດັບອາຊຽນ.

  ທ່ານ ຈັນທະວົງ ພະມິສິດ ຜູ້ບໍລິຫານກຸ່ມບໍລິສັດພູວົງກ່າວວ່າ: ບໍລິສັດພູວົງ ລາວເທວ ໂຄໂປເລເຊີນ ຈຳກັດ ແມ່ນໜຶ່ງໃນຫຼາຍກິດຈະການທີ່ນອນໃນກຸ່ມບໍລິສັດ ພູວົງກຣຸບ ຊຶ່ງໄດ້ດຳເນີນທຸລະກິດກ່ຽວກັບອາຫານ ແລະກະເຟດ້ວຍ 3 ຫຍີ່ຫໍ້ສິນຄ້າຫຼັກມີຊື່ສຽງດັງລະດັບໂລກຈາກປະເທດຍີ່ປຸ່ນ ແລະໄທຄື sushi mega, kamu tea, NB pancake ລວມຫຼາຍກວ່າ 100 ລາຍການຈຳໜ່າຍຢູ່ 10 ສາຂາໃນນະຄອນຫຼວງວຽງຈັນ.

  ປະຈຸບັນແມ່ນເປັນປີທີ 3 ຂອງການດຳເນີນທຸລະກິດດ້ານນີ້ ມີພະນັກງານທັງ ໝົດ 80 ຄົນ ຊຶ່ງໃນປີໜ້າ ຫຼື ປີ 2020 ຈະ ຂະໜາຍຕາໜ່າງບໍລິການສະເພາະຢູ່ນະ ຄອນຫຼວງໃຫ້ທົ່ວເຖິງ ຫຼື ໄດ້ຕື່ມອີກ 10 ສາຂາ ກ່ອນກ້າວໄປຫາບັນດາແຂວງໃນຂອບເຂດທົ່ວປະເທດແຕ່ທັງນີ້ທັງນັ້ນແມ່ນຈະຕ້ອງເບິ່ງສະພາບເສດຖະກິດ ແລະຄວາມເໝາະສົມວ່າຈະເລີ່ມໄປທີ່ແຂວງໃດກ່ອນເພື່ອເຈາະຕະຫຼາດໃຫ້ຖືກເປົ້າໝາຍ.

ທ່ານ ຈັນທະວົງ ພະມິສິດ ກ່າວຕື່ມວ່າ: ເບິ່ງອາຍຸຂອງທຸລະກິດແມ່ນຍັງເປັນນ້ອງໃໝ່ໃນວົງການນີ້ແຕ່ເພື່ອໃຫ້ທັນກັບສະພາບການຂະຫຍາຍຕົວຂອງເສດຖະກິດ-ສັງ ຄົມ ແລະສາມາດແຂ່ງຂັນກັບຕະຫຼາດ ສິນຄ້າຂອງເຮົາຕ້ອງມີຄຸນນະພາບ, ລົດຊາດແຊບ, ສະອາດ, ສະຖານທີ່ເໝາະ ສົມ ແລະກ່ອນຈະລົງມືເຮັດສີ່ງໃດໜຶ່ງກໍຕ້ອງມີການວາງແຜນທີ່ດີ, ຄິດຄົ້ນ ແລະພັດທະນາທີ່ດີ, ມີທີມງານບໍລິຫານຈັດການ ແລະທີມງານສົ່ງເສີມທີ່ດີແລ້ວມີການວັດຜົນຢ່າງຕໍ່ເນື່ອງພ້ອມກັບຮັບຟັງຄຳຕຳນິຕິຊົມຈາກລູກຄ້າມາພັດທະນາຕົນເອງ.

ນອກຈາກນັ້ນແລ້ວການດຳເນີນທຸລະກິດຄ້າຂາຍແມ່ນປາສະຈາກບໍ່ໄດ້ນະວັດຕະກຳໃໝ່ໃນການນຳໃຊ້ເຕັກໂນໂລຊີທັນສະໄໝເຂົ້າໃນການບໍລິການ, ຄວບຄຸມຄຸນນະພາບ ແລະການໂຄສະນາ ດ້ວຍການ ພັດທະນາເວບໄຊ ແລະແອັບຕ່າງໆ ເພື່ອ ໃຫ້ລູກຄ້າມີຄວາມສະດວກສະບາຍ ແລະມີຊ່ອງທາງເຂົ້າເຖິງສິນຫຼາຍຂຶ້ນຂະນະທີ່ໃນອະນາຄົດທາງບໍລິສັດຍັງມີແຜນຈະຂະຫຍາຍທຸລະກິດໃຫ້ເຕີບໃຫຍ່ຂຶ້ນໄປເລື້ອຍໆຢ່າງບໍ່ຢຸດຢັ້ງໃນອະນາຄົດທ່ານ ຈັນທະວົງ ພະມິສິດ ກ່າວ.

  ແນວໃດກໍດີ ທັງໝົດທັງມວນນັ້ນຈື່ງເຮັດໃຫ້ພູວົງລາວເທວ ໂຄໂປເລເຊີນ ຈຳກັດ ກາຍເປັນໜຶ່ງໃນເກືອບ 20 ບໍລິສັດທົ່ວປະເທດໄດ້ຮັບ 2 ລາງວັນດີເດັ່ນອາຊຽນຂອງ ສປປ ລາວ ປະຈຳປີ 2019 ໃນສາຂາລາງວັນດ້ານນະວັດຕະກຳ ແລະ ສາຂາລາງວັນຂະແໜງອາຫານ ແລະເຄື່ອງດື່ມດີເດັ່ນທີ່ມີພິທີມອບ-ຮັບລາງ ວັນຢ່າງເປັນທາງ ການໃນວັນທີ 4 ຕຸລາ ຜ່ານມາທີ່ນະຄອນຫຼວງວຽງຈັນ.

________________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์