ເຂົ້າໜົມຫວານໄທທ່າຊ້າງຂະຫຍາຍສາຂາມາລາວ

ເຂົ້າໜົມຫວານໄທທ່າຊ້າງ ຫຼືເຂົ້າໜົມຄົກທ່າຊ້າງສູດວີແກນຊຶ່ງເປັນນະວັດຕະກໍາອາຫານເພື່ອສຸຂະພາບທັງເປັນຜະລິດຕະພັນເຂົ້າໜົມຊື່ດັງຂອງເມືອງໄທໄດ້ຂະຫຍາຍສາຂາມາລາວ, ຊຶ່ງມີພິທີຖະແຫຼງຂ່າວເປີດສາຂາໃໝ່ຂຶ້ນໃນວັນທີ 14 ຕຸລາ 2019 ທີ່ມະຫາວິທະຍາໄລແຫ່ງຊາດໂດຍມີ ທ່ານ ຂວັນປະຊາ ທອງວິປູສະນະ ເຈົ້າຂອງຮ້ານເຂົ້າໜົມຫວານໄທທ່າຊ້າງ, ທ່ານ ອາທິດພັດ ນິພິດຖາພັດ ຜູ້ສ້າງຕັ້ງເຂົ້າໜົມຫວານໄທທ່າຊ້າງ ແລະພາກສ່ວນກ່ຽວຂ້ອງເຂົ້າຮ່ວມ.

   ທ່ານ ອາທິດພັດ ນິພິດຖາພັດ ໃຫ້ຮູ້ວ່າ: ເຂົ້າໜົມຫວານໄທທ່າຊ້າງເປັນນະວັດຕະກໍາອາຫານເພື່ອສຸຂະພາບປາສະຈາກຜະລິດຕະພັນສັດ 100%, ເປັນເຂົ້າໜົມທີ່ມີລົດຊາດຫວານນ້ອຍເນັ້ນຄວາມຫອມ, ອ່ອນນຸ້ມຊຶ່ງເກີດຈາກກິ່ນ ແລະສີຈາກທໍາມະຊາດ, ມີແຄລໍຣີຕໍ່າຊຶ່ງພັດທະນາສູດຈາກຜູ້ຊ່ຽວຊານ ແລະນັກໂພຊະນາການດ້ານການແພດ; ມີສ່ວນປະສົມມາຈາກແປ້ງ 8 ຊະນິດຄື: ແປ້ງສາລີ, ເຂົ້າກ້ອງ, ມັນຕົ້ນ... ນອກນີ້ຍັງມີນໍ້າຕານ, ໄຂ່ ແລະງາດໍາຊຶ່ງມາປະສົມເປັນຜະລິດຕະພັນເຂົ້າໜົມເພື່ອສຸຂະພາບໂດຍກົງ; ສໍາລັບຈຸດເດັ່ນແມ່ນລົດຊາດ ແລະສີສັນໃນນັ້ນມີລົດຊາດໝາກພ້າວ, ໃບເຕີຍ, ຊາໄທ, ໝາກມ່ວງ, ກາລົດ, ໝາກອຶ, ມັນດ້າງ ແລະ ອື່ນໆ, ຊຶ່ງປະຈຸບັນຖືວ່າໄດ້ຮັບຄວາມນິຍົມບໍລິໂພກກັນຢ່າງຫຼວງຫຼາຍ ແລະເມື່ອບໍ່ດົນມານີ້ເຂົ້າໜົມຫວານໄທທ່າຊ້າງກໍໄດ້ກາຍເປັນໜຶ່ງໃນຜະລິດຕະພັນເຂົ້າໜົມຂອງປະເທດໄທທີ່ໄດ້ເຂົ້າຮັບໃຊ້ໃນກອງປະຊຸມອາຊຽນຄັ້ງທີ 34 ທີ່ປະເທດໄທເປັນເຈົ້າພາບ.

  ຄຽງຄູ່ກັບເຂົ້າໜົມດັ່ງກ່າວຮ້ານເຂົ້າໜົມຫວານໄທທ່າຊ້າງຍັງມີຜະລິດຕະພັນເຄື່ອງດື່ມຊາກຸຫຼາບຊຶ່ງເປັນຜະລິດຕະພັນທີ່ຂັດສັນມາຈາກກີບກຸຫຼາບໂດຍມີການຄົ້ນຄິດຈາກຜູ້ຊ່ຽວຊານ ແລະນັກໂພຊະນາການຊຶ່ງມີສັບພະຄຸນໃນການຊ່ວຍລະບົບຂັບຖ່າຍ, ນອກນີ້ຍັງມີຊາກາເຟ ແລະຜະລິດຕະພັນເຄື່ອງດື່ມອື່ນໆອີກ.

  ທ່ານ ຂວັນປະຊາ ທອງວິປູສະນະ ກ່າວວ່າ: ນອກຈາກການຂະຫຍາຍສາຂາມານະຄອນຫຼວງວຽງຈັນແລ້ວຍັງມີແຜນຈະຂະຫຍາຍໄປບັນດາແຂວງທົ່ວປະເທດອີກ ໂດຍຜ່ານປໍ້ານໍ້າມັນ ptt, ມິນິມາກນອກນັ້ນໃນເດືອນພະຈິກ 2019 ນີ້ ຈະຂະຫຍາຍໄປປະເທດ ສສ ຫວຽດນາມ, ກໍາປູເຈຍ, ມຽນມາ ແລະເອີຣົບຕາມລໍາລັບ.

  ສໍາລັບການຂະຫຍາຍສາຂາມານະຄອນຫຼວງວຽງຈັນ ກໍຄືປະເທດລາວຄັ້ງນີ້ຖືເປັນໂອກາດທີ່ດີ ແລະໄດ້ເປັນສ່ວນໜຶ່ງໃນການເຮັດອາຫານເພື່ອສຸຂະພາບ,ຊຶ່ງກຸ່ມລູກຄ້າສ່ວນໃຫຍ່ແມ່ນເນັ້ນໃສ່ກຸ່ມຄົນຍຸກໃໝ່ ຫຼືໄວໜຸ່ມເພາະເຂົາເຈົ້າຈະມັກຮັກໃນການສາສຸຂະພາບພິເສດແມ່ນການຄວບຄຸນນໍ້າໜັກ; Tha Chang Thai Dessert ມີສະຖານທີ່ຕັ້ງຢູ່ສູນອາຫານມະຫາວິທະຍາໄລແຫ່ງຊາດ ນະຄອນຫຼວງວຽງຈັນ, ຖ້າທ່ານໃດສົນໃຈສາມາດຕິດຕໍ່ໄດ້ທີ່ ເຟສບຸກTha Chang Thai Dessert.

______________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์