ເຕັກນິກປູກດອກດາວເຮືອງ

  ດອກດາວເຮືອງ ເປັນສິນຄ້າຊະນິດໜຶ່ງທີ່ປະຊາຊົນລາວນິຍົມນໍາໃຊ້ເຂົ້າໃນການປະດັບປະດາເອ້ຢ້ອງພາຂວັນ, ຂັນໝາກເບັງ... ເປັນດອກໄມ້ທີ່ສາມາດປູກໄດ້ງ່າຍທັງໃນເນື້ອທີ່ນ້ອຍ ຫຼືຫຼາຍກໍ່ສາມາດປູກໄດ້ຄືກັນ, ແຕ່ຈະປູກໃຫ້ໄດ້ຮັບຜົນຫຼາຍໜ້ອຍນັ້ນກໍ່ຂຶ້ນຢູ່ກັບເຕັກນິກການປູກ.  

  ອີງຕາມຂໍ້ມູນການປູກຝັງໃຫ້ຮູ້ວ່າ: ເຕັກນິກການປູກດອກດາວເຮືອງກ່ອນອື່ນຄວນໄຖດິນແລ້ວຫວ່ານຝຸ່ນຄອກ ຫຼື ປຸ໋ຍໝັກລົງໄປປະມານ1 ໂຕນຕໍ່ໄລ່ຈາກນັ້ນໃຫ້ຍົກຮ່ອງໜານປູກກວ້າງ 1 ແມັດ ແລະຫົດນ້ຳໜານໄວ້ລ່ວງ ໜ້າ 1 ວັນ, ຫຼັງຈາກນັ້ນ ກໍ່ຂຸດຂຸມ ກວ້າງ 15 ຊັງຕີແມັດແລະເຮັດໜານລະ 3 ແຖວ, ໄລຍະລະຫວ່າງແຖວແມ່ນ 30 ຊັງຕີແມັດ, ໄລຍະລະຫວ່າງຕົ້ນ 30 ຊັງຕີແມັດ ແລ້ວໃສ່ປຸ໋ຍສູດ 15-15-15 ປະມານ 1 ບ່ວງຊາ ເພື່ອຮອງກົ້ນຂຸມ ຈາກນັ້ນໃຊ້ດິນບໍລິເວນຂ້າງຂຸມ ຖົມລົງໄປເລັກນ້ອຍ ເພື່ອປ້ອງກັນ ບໍ່ໃຫ້ຮາກດອກດາວເຮືອງສໍາ ຜັດກັບປຸ໋ຍໂດຍກົງ, ຫຼັງຈາກນັ້ນ ໃຫ້ນໍາເອົາຕົ້ນກ້າທີ່ມີອາຍຸ 7-10 ວັນ (ນັບຈາກມື້ເພາະເມັດ) ໂດຍ ຖອນຕົ້ນກ້າໃຫ້ມີດິນຕິດຫຸ້ມມານໍາ ເພື່ອປ້ອງກັນຮາກກະທົບກະເທືອນ ນໍາມາປູກໃນແຕ່ລະຂຸມທີ່ກຽມໄວ້ ແລະຫົດນໍ້າໃຫ້ຊຸ່ມ ພ້ອມທັງຫົດ ນ້ຳເຊົ້າ-ແລງປະມານ 7 ວັນຊຶ່ງຕົ້ນກ້າຈະຕັ້ງຕົວໄດ້ດີແລ້ວຈິ່ຶງຫົດພຽງວັນລະ 1 ຄັ້ງໃນຕອນເຊົ້າ (ໃນໄລຍະທີ່ດອກດາວເຮືອງເລີ່ມບານບໍ່ຄວນຫົດນ້ຳໃຫ້ຖືກດອກເພື່ອປ້ອງກັນດອກເປັນພະ ຍາດ).

  ຫຼັງຈາກການປູກດອກດາວເຮືອງໄດ້ 15 ແລະ 25 ວັນຄວນໃສ່ປຸ໋ຍສູດ15-15-15 ໃນປະລິ ມານ 1 ບ່ວງຕໍ່ຕົ້ນ, ເມື່ອໄດ້ 35- 45 ວັນ ໃສ່ປຸ໋ຍສູດ 12-24-12 ໃນປະລິມານດຽວກັນໂດຍວິທີການຝັງລົງດິນຕື້ນໆຫ່າງຈາກລໍາຕົ້ນປະມານ 20 ຊັງຕີແມັດ ຫຼື ຝ່າມືໜຶ່ງແລ້ວຫົດນໍ້າໃຫ້ຊຸ່ມທຸກໆຄັ້ງທີ່ໃສ່ປຸ໋ຍ, ໃນໄລຍະທີ່ດອກດາວ ເຮືອງໄດ້ 21-25 ວັນ ຊຶ່ງເປັນໄລຍະທີ່ຕົ້ນມີໃບແທ້ຂະໜາດໃຫຍ່ປະມານ 4 ຄູ່ ແລະ ສ່ວນຍອດຈະມີໃບນ້ອຍໆ 1-2 ຄູ່, ດັ່ງນັ້ນ ຈະຕ້ອງເດັດຍອດຖິ້ມເພື່ອໃຫ້ແຕກ ກິ່ງຂ້າງໃໝ່ (ສໍາລັບການເດັດ ຍອດດອກດາວເຮືອງຄວນເດັດ ໃນຕອນເຊົ້າ ເນື່ອງຈາກວ່າດອກ ດາວເຮືອງຈະອົບນໍ້າ) ໂດຍໃຊ້ມື ຊ້າຍຈັບຄູ່ໃບເທິງສຸດທີ່ປະໄວ້ແລ້ວໃຊ້ມືຂວາດຶງສ່ວນຍອດລົງທາງດ້ານຂ້າງຈົນຫຼຸດອອກມາ, ຫຼັງຈາກນັ້ນ 5-7 ວັນ ຕາຂ້າງຈະເລີ່ມແຕກ ແລະຈະເລີ່ມເປັນກິ່ງໃໝ່ຊຶ່ງຈະຕິດຕຸ່ມດອກທັງທີ່ຕາຍອດປາຍກິ່ງ ແລະຕາຂ້າງ.

  ໃນເມື່ອປູກໄດ້ 40-45 ວັນ, ກິ່ງແຕ່ລະກິ່ງຈະເລີ່ມອອກດອກເມື່ອດອກຍອດມີຂະໜາດເທົ່າກັບເມັດສາລີ, ສ່ວນດອກຂ້າງມີຂະໜາດເທົ່າກັບເມັດຖົ່ວຂຽວຕ້ອງຟ້າວເດັດດອກຂ້າງອອກໃຫ້ໝົດພາຍໃນ 2-3 ວັນ ໃຫ້ເຫຼືອແຕ່ດອກຍອດໄວ້ດອກດຽວເພື່ອໃຫ້ດອກມີຂະໜາດໃຫຍ່ຈາກນັ້ນປະມານ 20 ວັນ (ລວມແລ້ວປະມານ 60-65 ວັນ) ກໍ່ຕັດດອກໄປຈໍາໜ່າຍໄດ້ຊຶ່ງຈະໄດ້ປະມານ 10-12 ດອກຕໍ່ຕົ້ນ.

 ດອກດາວເຮືອງເປັນພືດທີ່ມັກນໍ້າຫຼາຍຢູ່ແລ້ວແຕ່ໃນລັກສະນະໃຫ້ໜ້ອຍໆແຕ່ໃຫ້ດົນໆ ແລະມັກຄວາມຊຸ່ມຊື່ນແຕ່ບໍ່ມັກໃຫ້ນໍ້າຂັງຫຼືຖ້ວມສໍາລັບໄລຍະການຈະເລີນເຕີບ ໂຕການໃຫ້ນ້ຳດອກດາວເຮືອງຄວນຈະໃຫ້ທຸກໆ 7 ວັນຕໍ່ 1 ຄັ້ງອັນນີ້ແມ່ນຂຶ້ນຢູ່ກັບສະພາບແວດລ້ອມ ແລະ ໃນໄລຍະກ່ອນຈະຕັດດອກຄວນໃຫ້ນໍ້າກ່ອນຕັດ 2 ວັນ ຖັດໄປເປັນມື້ທີ 3 ຈິ່ຶງຕັດຖ້າປະຕິບັດຕາມນີ້ຈະໄດ້ດອກໃຫຍ່ບໍ່ແຫ່ວງ່າຍ ແລະການໃຫ້ປຸ໋ຍຖ້າເປັນລະດູໜາວຫຼັງຈາກທີ່ຍ້າຍປູກແລ້ວຄວນໃສ່ປຸ໋ຍສູດ 46-0-0 ປະສົມໃນປະລິມານ 1 ກິໂລກຣາມຕໍ່ນ້ຳ 100 ລິດ ຊຶ່ງຄວນໃຫ້ປຸ໋ຍຕົ້ນດອກດາວເຮືອງຕິດຕໍ່ກັນ 2 ຄັ້ງ ໂດຍຄັ້ງທີ 1 ແລະ 2 ຫ່າງກັນ 7-10 ວັນ.

_______________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์