5 ປີ ເມືອງໜອງບົກຈັດຕັ້ງປະຕິບັດ 116 ໂຄງການລົງທຶນ

ເມືອງໜອງບົກແຂວງຄຳມ່ວນມີທ່າແຮງຫຼາຍດ້ານໃນການພັດທະນາເສດຖະກິດ-ສັງຄົມ ໂດຍໄດ້ກາຍເປັນຈຸດສົນໃຈຂອງນັກລົງທຶນທັງພາຍໃນ ແລະຕ່າງປະເທດຢາກເຂົ້າມາລົງທຶນພັດທະນາໂຄງການຕ່າງໆຢູ່ພາຍໃນເມືອງໜອງບົກ ຊຶ່ງໃນ 5 ປີຜ່ານມາເມືອງໄດ້ດຶງດູດເອົາການລົງທຶນຂອງລັດ ແລະເອກະຊົນໄດ້ເຖິງ 116 ໂຄງການມີມູນຄ່າ 171 ຕື້ກີບ ສິ່ງດັ່ງກ່າວໄດ້ເຮັດໃຫ້ເສດຖະກິດ-ສັງຄົມຂອງເມືອງມີການພັດທະນາ ແລະເຕີບໃຫຍ່ຂະຫຍາຍຕົວຢ່າງຕໍ່ເນື່ອງ.

  ທ່ານ ສົມມະລາ ອ່ອນສິລິວົງ ຮອງເຈົ້າເມືອງໜອງບົກ ໄດ້ຜ່ານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 5 ປີຜ່ານມາໃນກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງໜອງບົກໃຫ້ຮູ້ວ່າ: ເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງໃນລະດັບສະເລ່ຍ 7,74% ຕໍ່ປີ, ລວມຍອດຜະລິດຕະ ພັນພາຍໃນບັນລຸໄດ້ 664 ຕື້ກີບ,ລາຍໄດ້ສະເລ່ຍຕໍ່ຄົນຕໍ່ປີເພີ່ມຂຶ້ນຈາກ 1.406 ໂດລາມາເປັນ 1.568 ໂດລາທຽບໃສ່ແຜນ 5 ປີ ປະຕິບັດໄດ້ 91,38%, ໂຄງການທີ່ ໄດ້ຮັບການຈັດຕັ້ງປະຕິບັດທັງໝົດ 116 ໂຄງການ ມູນຄ່າ 171 ຕື້ກີບ  ໃນນັ້ນມີໂຄງການລົງທຶນ ຂອງລັດ 67 ໂຄງການມູນຄ່າ 120 ຕື້ກີບ, ການລົງທຶນເອກະ ຊົນພາຍໃນ ແລະ ຕ່າງປະເທດ 13 ໂຄງການມີມູນຄ່າ 34 ຕື້ກີບ ແລະໂຄງການສົມທົບທຶນຂອງປະຊາຊົນ 36 ໂຄງການມູນຄ່າ 16 ຕື້ກີບ ນອກນັ້ນໂຄງການຈັດຕັ້ງປະຕິບັດສຳເລັດ 100% ມີ 55 ໂຄງການລວມມູນຄ່າ 100 ຕື້ກວ່າກີບ ແລະໂຄງການສືບຕໍ່ 12 ໂຄງການລວມມູນຄ່າ 12 ຕື້ກີບ.

  ສ່ວນດ້ານວຽກງານກະສິກຳໂດຍການຜະລິດເຂົ້າໃນປີ 2019 ມີເນື້ອທີ່ນາປີ 15.888 ເຮັກຕາ ໃນນີ້ເສຍຫາຍຈາກນໍ້າຖ້ວມ 5.345 ເຮັກຕາ, ເນື້ອທີ່ເກັບກ່ຽວ 10.543 ເຮັກຕາ ຜົນຜະລິດ 41.118 ໂຕນ, ເນື້ອທີ່ນາແຊງ 2.961 ເຮັກຕາ ຜົນຜະລິດ 16.522 ໂຕນ ລວມຜົນຜະລິດທັງສອງລະດູ 57.640 ໂຕ່ນ, ສະເລ່ຍໃສ່ຫົວຄົນໄດ້ 1.088 ກິໂລຕໍ່ຄົນຕໍ່ປີ, ການຜະລິດເປັນ ສິນຄ້າໃນທົ່ວເມືອງມີ 28 ກຸ່ມມີກຸ່ມຜະລິດເເນວພັນເຂົ້າ 4 ກຸ່ມ ໃນປີ 2019 ຜະລິດແນວພັນໄດ້ 17.781 ໂຕນ ທຽບໃສ່ແຜນການເພີ່ມຂຶ້ນ 13,5%, ມີຄອບຄົວ ຕົວແບບໃນການປູກຝັງ-ລ້ຽງສັດຈຳນວນ 31 ຄອບຄົວ ແລະ ພົ້ນເດັ່ນແມ່ນຄອບຄົວທ່ານ ສີຮອງ ໂຄດຕະວົງຫົວໜ້າກຸ່ມຂະຫຍາຍແນວພັນເຂົ້າບ້ານຜັກອີ່ຕູ່ໄດ້ຮັບຫຼຽນຊາວນາດີເດັ່ນອາຊຽນໃນປີ 2017 ຊຶ່ງເປັນຄົນທຳອິດໃນ ສປປ ລາວ.

  ທັງນີ້ ຍັງໄດ້ເອົາໃຈໃສ່ວຽກງານພັດທະນາຊົນນະບົດ ແລະລຶບລ້າງຄວາມທຸກຍາກຊຶ່ງມີກອງທຶນພັດທະນາບ້ານ 44 ບ້ານ ລວມມີມູນຄ່າ 7 ຕື້ກວ່າກີບ ເປັນເງື່ອນໄຂເຮັດໃຫ້ປະຊາຊົນສາ ມາດເຂົ້າເຖິງແຫຼ່ງທຶນເພື່ອປະກອບເຂົ້າໃນການຜະລິດເປັນສິນຄ້າ, ສ້າງລາຍຮັບເພີ່ມເຮັດໃຫ້ຊີວິການເປັນຢູ່ດີຂຶ້ນມາຮອດປະຈຸບັນຈຳນວນຄອບຄົວທຸກຍາກຍັງເຫຼືອ 35 ຄອບຄົວ ເທົ່າກັບ 0,37% ຂອງຈຳນວນຄອບຄົວທົ່ວເມືອງ, ສ້າງບ້ານກະສິກໍາພັດທະນາໄດ້ 9 ບ້ານ, ຄອບຄົວພັດທະນາກະສິກຳ 1.157 ຄອບຄົວ ເທົ່າກັບ 16,36%, ສ້າງບ້ານພັດທະນາໄດ້ 54 ບ້ານ ແລະຄອບຄົວພັດທະ ນາ 8.515 ຄອບຄົວເທົ່າກັບ 98% ຂອງບ້ານ ແລະຄອບຄົວໃນທົ່ວແຂວງ.

---------------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์