ຣີສອດປາກນໍ້າຄານແຊ໋ມຊ່ວງເຮືອຊາຍທ່າວັດຈັນ ສ່ວນເຮືອຍິງແສງເພດກໍ່ສ້າງ

 ວັນທີ 14 ຕຸລາ 2019 ແມ່ນມື້ຊິງໄຊຊ່ວງເຮືອປະເພນີເນື່ອງໃນມື້ບຸນອອກພັນສາປະວໍລະນາທີ່ທ່າວັດຈັນ ເມືອງຈັນທະບູລີ, ນະຄອນຫຼວງວຽງຈັນ ໂດຍການເປັນປະ ທານຂອງທ່ານ ນາງ ບົວລອນ ວົງດາລາແສນ ເຈົ້າເມືອງຈັນທະບູລີ ໃຫ້ກຽດເຂົ້າຮ່ວມມີທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມນີ້ກໍມີຄະນະນຳທີມສີພາຍເຮືອຊ່ວງທີ່ມາຈາກກຸ່ມບ້ານ, ພະແນກການ ແລະກົມກອງຕ່າງໆຕະຫຼອດຮອດມວນຊົນເຂົ້າຮ່ວມຊົມຮ່ວມເຊຍຢ່າງຄຶກຄື້ນມ່ວນຊື່ນ.

  ທ່ານເຈົ້າເມືອງຈັນທະບູລີກ່າວວ່າ: ບຸນອອກພັນສາປະວໍລະນາ ແລະບຸນຊ່ວງເຮືອເວົ້າສະເພາະແມ່ນບຸນຊ່ວງເຮືອທີ່ທ່າວັດຈັນແມ່ນຮີດ 12 ຄອງ 14 ແລະແມ່ນຮີດ ຄອງປະເພນີອັນດີງາມຊອງຊາດລາວ ເຮົາທີ່ໄດ້ສືບທອດກັນມາແຕ່ບູຮານນະ ການ ຊຶ່ງມີປະຫວັດຄວາມເປັນມາອັນຍາວນານການແຂ່ງຂັນຊ່ວງເຮືອໃນມື້ບຸນອອກພັນສາຂອງທຸກໆປີນັ້ນແມ່ນເປັນກີລາທາງໜ້ານໍ້າປະເພດໜຶ່ງຊຶ່ງຖືກຈັດຂຶ້ນເພື່ອເປັນການສ້າງໂອກາດໃຫ້ປະຊາຊົນໄດ້ມາພົບປະເພື່ອນມິດສະຫາຍ, ຍາດຕິພີ່ນ້ອງທີ່ມາຈາກທົ່ວສາລະທິດໄດ້ມາພັກຜ່ອນຢ່ອນໃຈພາຍຫຼັງທີ່ມົກມຸ້ນຢູ່ກັບການຜະລິດໃນລະດູຝົນຕະຫຼອດຫຼາຍເດືອນທີ່ຜ່ານມາ.

  ປີນີ້, ກິດຈະກຳດັ່ງກ່າວພວກເຮົາກໍໄດ້ຈັດຕັ້ງປະຕິບັດຢ່າງຖືກຕ້ອງຕາມຮີດຄອງປະເພນີອັນດີງາມຢ່າງຄົບຖ້ວນທຸກປະການແລ້ວຊຶ່ງເລີ່ມມາແຕ່ວັນທີ 9 ຕຸລາ 2019 ກົງກັບມື້ຂຶ້ນ 11 ຄໍ່າເດືອນ 11 ລາວ (ພສ 2562) ແລະເຮັດຖືກຕາມຮີດຄອງປະເພນີທີ່ປູ່ຍ່າຕາຍາຍທຸກລຸ້ນຄົນໄດ້ສືບທອດກັນມາແຕ່ບູຮານນະການຈາກລຸ້ນນີ້ຫາລຸ້ນໃໝ່ຈົນເຖິງປະຈຸບັນ.

   ປີ 2019 ໃນນາມທີ່ເມືອງຈັນທະບູລີ ໄດ້ຮັບກຽດເປັນເຈົ້າພາບຈັດງານດັ່ງກ່າວໂດຍສົມທົບກັບບັນດາເມືອງໃກ້ຄຽງຄືເມືອງສີສັດຕະນາກ ແລະເມືອງສີໂຄດຕະບອງ ແລະພາກສ່ວນກ່ຽວ ຂ້ອງຕ່າງໆຂັ້ນນະຄອນຫຼວງວຽງຈັນ ສຳລັບກິດຈະກໍາວັນທີ 13 ຕຸລາ 2019 ແມ່ນໄດ້ຈັດແຂ່ງຂັນເຮືອກີລາ 12 ສີ ພາຍ ລວມມີ 6 ລຳຢູ່ທີ່ທ່າວັດຈັນເມືອງ ຈັນທະບູລີ, ສ່ວນວັນທີ 14 ຕຸລາ ແມ່ນ ຈັດແຂ່ງຂັນເຮືອປະເພນີ ຍິງ-ຊາຍ ແລະ ເຮືອສູດຊາຍ ຊຶ່ງມີເຮືອເຂົ້າຮ່ວມແຂ່ງ ຂັນທັງໝົດມີ 19 ລຳ ໃນນີ້ມີເຮືອປະເພນີ ຊາຍ 6 ລຳ, ເຮືອປະເພນີຍິງ 6 ລຳ, ເຮືອສູດຊາຍ 7 ລຳ, ລວມທັງໝົດ 24 ລໍາ, ໃນນີ້ມີເຮືອຈາກນະຄອນຫຼວງວຽງ ຈັນ23 ລຳ ແລະເຮືອຈາກແຂວງຫຼວງ ພະບາງ 1 ລຳ ແລະແຂ່ງຂັນຢູ່ເທິງໜ້ານໍ້າ ບໍລິເວນໂຮງແຮມແລນມາກ ໂດຍແຊ໋ມ ເຮືອປະເພນີຊາຍຈະໄດ້ຮັບຂັນໝູນວຽນ ຮ້ານຄຳພູວົງ ມູນຄ່າ 20 ລ້ານກີບ.

  ຜົນການແຂ່ງຂັນເຮືອຊ່ວງປະເພນີ ຫຼືງານບຸນອອກພັນສາປະວໍລະນາ ແລະບຸນຊ່ວງເຮືອນະຄອນຫຼວງວຽງຈັນ ປະຈຳປີ2019 ອັນດັບທີ 1 ເຮືອປະເພນີຊາຍ 55 ສີພາຍຄື: ຣີສອດປາກນໍ້າຄານໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 16 ລ້ານກີບ, ອັນດັບທີ 2 ທະນາຄານພັດທະນາລາວ (JDB) ໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 12 ລ້ານກີບ.

  ເຮືອປະເພນີຍິງ 55 ສີພາຍອັນດັບ ທີ 1 ບໍລິສັດແສງເພັດກໍ່ສ້າງໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 16 ລ້ານກີບ, ອັນດັບທີ 2  ຄອນສະຫວັນ 99 (1) ໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 12 ລ້ານກີບ.

  ເຮືອສູດຊາຍ 55 ສີພາຍອັນດັບທີ 1 ບໍລິສັດ ແສງເພັດ ກໍ່ສ້າງໄດ້ຮັບຂັນເງິນ 1 ໜ່ວຍ ພ້ອມເງິນລາງວັນ 12 ລ້ານກີບ, ອັນດັບທີ 2 ທະນາຄານພັດທະນາລາວ (JDB) ໄດ້ຮັບຂັນເງິນ 1 ໜ່ວຍພ້ອມເງິນລາງວັນ 10 ລ້ານກີບ.

 ສ່ວນເຮືອກີລາ 12 ສີພາຍ ເຮືອນາວາສັກສິດຄວ້າແຊ໋ມໄປຄອງໄດ້ຮັບຂັນ 1 ໜ່ວຍ ພ້ອມເງິນລາງວັນ 5 ລ້ານກີບ, ຮອງແຊ໋ມແມ່ນເຮືອບ້ານໄຊສະຫວ່າງໄດ້ຮັບຂັນ 1 ໜ່ວຍພ້ອມເງິນລາງວັນ 4 ລ້ານກີບ.

________________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์