5 ປີ ເມືອງຊຽງຮ່ອນເກັບລາຍຮັບບັນລຸໄດ້ 93,72% ຂອງແຜນການ

ໃນໄລຍະ 5 ປີຜ່ານມາຄະນະຫ້ອງການ-ການເງິນ ເມືອງຊຽງຮ່ອນ ແຂວງໄຊຍະບູລີ ໄດ້ສຸມໃສ່ຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນ ແລະຖານຂໍ້ມູນລາຍຮັບທີ່ມີຢູ່ພາຍໃນເມືອງມອບເຂົ້າງົບປະ ມານໃຫ້ບັນລຸຕາມລະດັບຄາດ ໝາຍ, ຕາມການແບ່ງຂັ້ນຄຸ້ມຄອງ ລະຫວ່າງແຂວງກັບເມືອງ, ລະ ຫວ່າງເມືອງກັບບ້ານ, ພ້ອມທັງຈັດເກັບພາສີທີ່ດິນໂດຍໄດ້ຂຶ້ນບັນຊີຊັບສິນຂອງລັດເຊັ່ນ: ພາຫະນະ, ດິນປຸກສ້າງ ພ້ອມທັງໄດ້ເກັບຄ່າເຊົ່າ, ຄ່າສຳປະທານ ແລະອື່ນໆ ມອບເຂົ້າງົບປະມານ,ໂດຍໄລຍະ 5 ປີຜ່ານມາ ຫົວເມືອງມີຫົວໜ່ວຍ ທຸລະກິດເພີ່ມຂຶ້ນ 46 ຫົວໜ່ວຍ, ເທົ່າກັບ 15% ຂອງຫົວໜ່ວຍ ທຸລະກິດ, ເຮັດໃຫ້ການເກັບລາຍຮັບເຫັນວ່າມີທ່າອ່ຽງເພີ່ມຂຶ້ນ, ຖ້າທຽບໃສ່ແຜນລາຍຮັບຂອງແຂວງມອບໃຫ້ໃນແຕ່ລະປີ, ພົ້ນເດັ່ນແມ່ນຊ່ວງປີ 2015-2018 ລາຍຮັບເກັບໄດ້ເກີນແຜນສະເລ່ຍ 4 ປີ ເພີ່ມຂຶ້ນ 7,97% ຕໍ່ປີ, ນອກນີ້ຍັງໄດ້ເອົາໃຈໃສ່ຈັດສັນລາຍຈ່າຍງົບປະມານບໍລິຫານຂອງລັດໃຫ້ຮັດກຸມ ແລະປະຕິບັດຕາມຕົວເລກອະນຸມັດລາຍຈ່າຍເງິນເດືອນເງິນນະໂຍບາຍ ແລະຮ່ວງອື່ນໆ ແມ່ນສຳເລັດຕາມແຜນອະນຸມັດໃນແຕ່ລະປີ, ໂດຍຖືເອົາການເບີກຈ່າຍເງິນເດືອນ, ເງິນນະໂຍບາຍເປັນບູລິມະສິດອັນດັບໜຶ່ງ.

    ທ່ານ ບຸນເພັງ ອ່ອນສົມລີ ຫົວໜ້າຫ້ອງການ-ການເງິນເມືອງຊຽງຮ່ອນ ໄດ້ໃຫ້ຮູ້ວ່າ: ຜ່ານການຈັດຕັ້ງປະຕິບັດເກັບລາຍຮັບ-ຄຸ້ມຄອງລາຍຈ່າຍງົບປະມານ 5 ປີ 2014-2019 ຜ່ານມາສາມາດປະຕິບັດໄດ້ 82,64 ຕື້ກີບ, ເທົ່າກັບ 93,72% ຂອງແຜນການ 5 ປີ, ລາຍຮັບພາຍໃນເມືອງປະຕິ ບັດໄດ້ 18,63 ຕື້ກີບ ເທົ່າກັບ 99,23%, ຮັບດຸ່ນດ່ຽງຈາກແຂວງປະຕິບັດໄດ້ 64 ຕື້ກີບ ເທົ່ກັບ 112,29%, ໃນນັ້ນ: ຮັບຈາກສ່ວຍສາອາກອນ 15,63 ຕື້ກີບ, ເທົ່າກັບ 101,68% ຂອງແຜນການ 5 ປີ, ຮັບຈາກໜ່ວຍງານຊັບສິນ 1,34 ຕື້ກີບ, ເທົ່າກັບ 77,60%, ຮັບຈາກພາສີດ່ານ 1,64 ຕື້ກີບ, ເທົ່າກັບ 106,5%.

ດ້ານລາຍຈ່າຍແມ່ນປະຕິບັດ ໄດ້ 82,64 ຕື້ກີບ ເທົ່າກັບ 93,72% ຂອງແຜນການ 5 ປີ, ໃນນັ້ນ: ຈ່າຍເງິນເດືອນປະຕິບັດໄດ້62,12 ຕື້ກີບ ເທົ່າກັບ 92,31% ຂອງແຜນການ 5 ປີ, ເງິນອຸດໜູນ ນະໂຍບາຍ 9,36 ຕື້ກີບ ເທົ່າກັບ 95,00%, ຈ່າຍເງິນບໍລິຫານກົງ ຈັກລັດ 9,05 ຕື້ກີບເທົ່າກັບ 99,87%, ຈ່າຍເງິນດັດສົມ ແລະ ສົ່ງເສີມ 1,94 ຕື້ກີບເທົ່າກັບ 102,81% ຂອງແຜນການ 5 ປີ.

  ທ່ານ ບຸນເພັງ ອ່ອນສົມລີ ຍັງໃຫ້ຮູ້ຕື່ມອີກວ່າ: ແຜນຄາດຄະເນເກັບລາຍຮັບ-ຄຸ້ມຄອງລາຍຈ່າຍງົບປະມານ 5 ປີ 2019-2024 ຈະສູ້ຊົນໃຫ້ໄດ້ 73,24 ຕື້ ກີບ ແລະຄຸ້ມຄອງລາຍຈ່າຍໃຫ້ຢູ່ ໃນຄວາມເໝາະສົມ, ໂດຍຈະສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານລັດຖະກອນໃຫ້ມີຄວາມຮັບຜິດຊອບຕໍ່ໜ້າທີ່ວຽກງານໃຫ້ສູງຂຶ້ນ, ມີຄວາມເສຍ ສະລະສຸມທຸກສະຕິປັນຍາໃສ່ວຽກ ງານວິຊາສະເພາະໃຫ້ເລິກເຊິ່ງ, ສືບຕໍ່ເກັບຄ່າທຳນຽມນໍາໃຊ້ທີ່ດິນ (ພາສີທີ່ດິນ) ແຕ່ລະເຂດໃນທົ່ວເມືອງໃຫ້ມີຄວາມຊັດເຈນ ແລະທັນກັບກຳນົດເວລາ, ເອົາໃຈໃສ່ຕິດຕາມກວດກາຂຶ້ນບັນຊີຊັບສົມບັດຂອງລັດຢູ່ແຕ່ລະຂະແໜງການພາຍໃນເມືອງໃຫ້ລະອຽດ ແລະເອົາໃຈໃສ່ຊຸກຍູ້ບັນດາຫົວໜ່ວຍທຸລະກິດຫ້າງຮ້ານຫັນເຂົ້າໄປສູ່ລະບົບການເສຍພັນທະຜ່ານລະບົບທະນາຄານໃຫ້ໄດ້ຫຼາຍຂຶ້ນກວ່າໄລຍະຜ່ານມາ.

 _______________

ຂຽນໂດຍ: ອຸ່ນເຮືອນ ໂພທິລັກ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์