ຫຼວງພະບາງ ກຽມພ້ອມຈັດງານປະເພນີ ໄຫຼເຮືອໄຟ

  ບຸນໄຫຼເຮືອໄຟ ຫຼືວັນລອຍກະທົງແມ່ນປະເພນີໝຶ່ງຂອງຊາວລາວເຮົາທີ່ສືບທອດກັນມາແຕ່ບູຮານມາແລ້ວ, ຊຶ່ງຈັດຂຶ້ນໃນຊ່ວງບຸນອອກພັນສາໃນມື້ຂຶ້ນ 15 ຄໍ່າ ເດືອນ 11 ລາວ ຂອງທຸກໆປີ.

 ນະຄອນຫຼວງພະບາງ ປີນີ້ກໍ່ໄດ້ກຽມພ້ອມຈັດງານບຸນໄຫຼເຮືອໄຟຕາມຮິດຄອງປະເພນີຂອງຊາວຫຼວງພະບາງ ທີ່ເຄີຍປະຕິບັດກັນມາແຕ່ບູຮານໃຫ້ມີຄວາມເບີກບານມ່ວ ນຊື່ນ, ມີຄວາມສວຍງາມ ແລະດຳເນີນໄປດ້ວຍຜົນສຳເລັດອັນສະຫງ່າງາມໃຫ້ສອດຄ່ອງຕາມຮິດ 12 ຄອງ 14 ປະເພນີຂອງລາວເຮົາ, ປະເພນີໄຫຼເຮືອໄຟນີ້ແມ່ນຈະໄດ້ຈັດຂຶ້ນລະຫວ່າງວັນທີ 12-14 ຕຸລາ 2019 ທີ່ນະຄອນຫຼວງພະບາງນັ້ນເອງ, ໄດ້ມີເຮືອໄຟຈາກແຕ່ລະບ້ານ, ໂຮງຮຽນ, ບໍລິສັດ, ອົງການຕ່າງໆເຂົ້າຮ່ວມຂະ

ບວນແຫ່ຈຳນວນເຖິງ 52 ລໍາຫຼາຍກວ່າທຸກໆປີທີ່ຜ່ານມາ, ປີນີ້ເພີ່ນກໍ່ໄດ້ມີວາລະການຈັດງານອອກມາດັ່ງນີ້: ໃນມື້ອອກໃໝ່ 14 ຄໍ່າເດືອນ11 ພສ 2562 ກົງກັບວັນເສົາທີ 12 ຕຸລາ 2019 ເປັນມື້ຫ້າງຫາກະກຽມບຸນມະຫາຊາດນະມັດສະການພະທາດຈອມສີ, ເວລາ 8:00 ໂມງ ຫ້າງຫາກະກຽມປະດັບປະດາຕົບແຕ່ງສະ ຖານທີ່ພະທາດຈອມສີ, ເວລາ 13:00 ເຕົ້າໂຮມພະສົງ, ສາມະເນນ, ປະຊາຊົນບັນດາເຜົ່າທໍາພິທີທາງສາສະໜາ, ເວລາ 14:00 ສູດປະລິ ຕະມຸງຄຸນພະທາດຈອມສີ, ເທດສະຫຼອງອຸປະຄຸດ, ເທດສັງກາດຫຼວງ, ສຸດໂພ ແລະສູດອິຕິປິໂສ; ເວລາ 19:00 ທ່ຽວຊົມຄວາມງົດງາມ ໄຟແສງສີຂອງການໄຕ້ປະທິບ (ໂຄມໄຟ) ຕາມວັດແຫ່ງຕ່າງໆ ພາຍໃນນະຄອນຫຼວງພະບາງ.

  ສ່ວນໃນມື້ອອກໃໝ່ 15 ຄໍ່າເດືອນ 11 ເພັງ ພສ 2562 ກົງກັບວັນອາທິດທີ 13 ຕຸລາ 2019ເປັນມື້ມະຫາຊາດນະມັດສະຫານພະທາດຈອມສີ, ເວລາ 6:00 ປະຊາຊົນບັນດາເຜົ່າໃສ່ບາດຕາມວັດແຫ່ງຕ່າງໆ ທີ່ມີເງື່ອນໄຂ, ເວລາ 9:00 ທໍາພິທີທາງສາສະໜາທີ່ພະທາດຈອມສີ, ສູດ, ສັກອານິຈາ, ຖະຫວາຍສັງຄະທານ-ສັງຄະແທນ, ແຈກເພນ ແລະເທດມະຫາຊາດຕະຫຼອດວັນ, ເວລາ19:00 ທ່ຽວຊົມງານໄຟແສງສີ ຂອງຫານໄຕ້ປະທິບ (ໂຄມໄຟ)ຕາມວັດແຫ່ງຕ່າງໆ ພາຍໃນນະຄອນ ຫຼວງພະບາງ.

  ມື້ແຮມ 1 ຄໍ່າ ເດືອນ 11 ພສ 2562 ກົງກັບວັນຈັນທີ 14 ຕຸລາ 2019 ຕອນເຊົ້າ ແຕ່ລະບ້ານ, ສະຖາບັນໂຮງຮຽນ-ການສຶກສາ ແລະພາກສ່ວນຕ່າງໆຕົບແຕ່ງເຮືອໄຟໃຫ້ຮຽບຮ້ອຍ ແລະມີຄວາມສວຍງາມ, ເວລາ 18:00 ເຕົ້າໂຮມເຮືອໄຟຂອງແຕ່ລະພາກສ່ວນ ທີ່ເຂົ້າມາປະກວດຢູ່ຫໍພິພິຕະພັນ (ຕີນພູສີ), ເວລາ 18:30 ການນໍາຂັ້ນແຂວງ, ນະຄອນ ແລະແຂກຖືກເຊີນມາເຖິງສະຖານທີ່ເປີດງານ, 19:00 ເລີ່ມພິທີທາງສາສະໜາເທດສະຫຼອງເຮືອໄຟຢູ່ “ວັດປ່າຮວກ” ຈໍານວນ 1 ກັນ, ເວລາ 19:30 ເປີດພິທີບຸນໄຫຼເຮືອໄຟຢ່າງເປັນທາງການຕາມຮີດຄອງປະເພນີ, ຫຼັງຈາກນັ້ນຊົມຄວາມສວຍງາມຂອງຂະບວນເຮືອໄຟແຕ່ລະພາກສ່ວນແຫ່ໄປຕາມ ເສັ້ນທາງສີສະຫວ່າງວົງຈົນເຖິງທ່ານໍ້າຂອງວັດຊຽງທອງ ແລະ ເຄື່ອນເຮືອໄຟລົງນໍ້າຕາມລໍາດັບ. ເວລາ 20:30 ການນໍາພັກລັດເຂົາຮ່ວມລອຍປະທິບຢູ່ທ່ານໍ້າຂອງ    ບ້ານວັດໜອງ, ປະຊາຊົນຊົນຊົມຄວາມງາມໄຟແສງສີຂອງການໄຕ້ປະທີບ (ໂຄມໄຟ) ຕາມວັດ ແຫ່ງຕ່າງໆ ພາຍໃນນະຄອນຫຼວງພະບາງ.

 ຫາກທ່ານໃດສົນໃຈຢາກຈະໄປຮ່ວມສໍາຜັດຄວາມສວຍງາມຕາມປະເພນີດັ່ງເດີມທີ່ເປັນເອກລັກຂອງຊາວນະຄອນຫຼວງພະບາງຢ່າງແທ້ຈິງກໍວາງແຜນກຽມໄປຮ່ວມງານບັນທຶກພາບບອກໄດ້ເລີຍວ່າທ່ານຈະບໍ່ຜິດຫວັງ ແລະ ຄຸ້ມຄ່າຢ່າງແນ່ນອນ.

_______________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์