ປາກຊ່ອງພັດທະນາ ຮັບລາງວັນທຸລະກິດດີເດັ່ນອາຊຽນ

 ບໍລິສັດປາກຊ່ອງພັດທະນາຂາອອກ-ຂາເຂົ້າ ຈຳກັດຜູ້ດຽວ ເປັນບໍລິສັດທີ່ພັດທະນາດ້ານກະສິກຳໂດຍສະເພາະແມ່ນການສົ່ງເສີມການຜະລິດເປັນສິນຄ້າຂອງປະຊາຊົນເຮັດໃຫ້ເຂົາເຈົ້າມີວຽກເຮັດງານທຳ ແລະມີລາຍໄດ້ປະຈຸບັນມີປະຊາຊົນ 6.850 ຄອບຄົວ 3 ແຂວງທີ່ເຂົ້າຮ່ວມໂຄງການກັບບໍລິສັດສິ່ງດັ່ງກ່າວໄດ້ເຮັດໃຫ້ຊີວິການເປັນຢູ່ຂອງປະຊາຊົນນັບມື້ນັບດີຂຶ້ນເທື່ອລະກ້າວ ແລະ ເປັນຜົນເຮັດໃຫ້ບໍລິສັດປາກຊ່ອງພັດທະນາໄດ້ຮັບລາງວັນທຸລະກິດດີເດັ່ນອາຊຽນຂອງລາວປະຈຳປີ 2019 ສາຂາລາງ ວັນທຸລະກິດແມ່ຍິງດີເດັ່ນ.

  ທ່ານ ນາງ ອິນແປງ ຊາມຸນຕີ ປະທານບໍລິສັດປາກຊ່ອງພັດທະນາຂາອອກ-ຂາເຂົ້າ ຈຳກັດ ໃຫ້ສຳພາດວ່າ: ທຸລະກິດຂອງບໍລິສັດແມ່ນເຮັດກ່ຽວກັບສິນຄ້າກະສິກຳໃນລະບົບໂຄງການ 2+3 ຄືປະຊາຊົນເປັນດິນແລະແຮງງານ, ສ່ວນບໍລິສັດຈະເປັນເງິນທຶນຫຼືປັດໄຈການຜະລິດ, ສົ່ງເສີມການຝຶກອົບຮົມດ້ານເຕັກນິກວິຊາການຂອງປະ ຊາຊົນທີ່ເຂົ້າຮ່ວມໂຄງການ ແລະເປັນການຕະຫຼາດພ້ອມທັງຮັບຊື້ໂດຍສະເພາະແມ່ນສິນຄ້າກະສິກຳທັງໝົດເປັນຕົ້ນພືດຜັກ, ກ້ວຍ, ຖົ່ວ, ພືດຕາມລະດູການໂດຍເນັ້ນໜັກໃນໂຄງການ 2+3 ແມ່ນເປັນມັນຕົ້ນອິນຊີຊຶ່ງມີຕະຫຼາດທີ່ໝັ້ນຄົງເຊັນສັນຍາກັບຕ່າງປະເທດໄວ້ 10 ປີແຕ່ປີ 2014-2024 ສຳລັບຊື້-ຂາຍສິນຄ້າກະສິ ກຳ, ມີລາຄາທີ່ໝັ້ນຄົງໃນການສັ່ງຊື້ໂດຍຕະຫຼາດສ່ວນໃຫຍ່ແມ່ນສົ່ງອອກໄປປະເທດໄທກວມເອົາ 85% ເນື່ອງຈາກເປັນປະເທດໃກ້ຄຽງ ແລະ ການຂົນສົ່ງສະດວກສະ ບາຍ, ໃນແຕ່ລະປີທາງລູກຄ້າຈະມາເຮັດສັນຍາຍ່ອຍແລ້ວສັ່ງຊື້ ສິນຄ້ານຳແລະວາງເງິນຄໍ້າປະກັນຊື້ຂາຍ 30% ແລະມີລາຄາຄໍ້າປະກັນໃນການຊື້-ຂາຍ, ຊຶ່ງມີປະຊາຊົນທີ່ເຂົ້າຮ່ວມໂຄງການທັງໝົດ 6.850 ຄອບຄົວ, ມີເນື້ອທີ່ 14.773 ເຮັກຕາມາຈາກ 86 ກຸ່ມບ້ານ 7 ຕົວເມືອງຂອງ 3 ແຂວງຄື: ແຂວງສາລະວັນ, ອັດຕະປື ແລະແຂວງຈຳປາສັກ.

  ທ່ານ ນາງ ອິນແປງ ຊາມຸນຕີ ກ່າວຕື່ມວ່າ: ສຳລັບລາງວັນທີ່ໄດ້ຮັບແມ່ນມີຄວາມພາກພູມໃຈ, ຈາກການສູ້ຊົນເຮັດທຸລະກິດຂອງເຮົາຖືວ່າເປັນຮັບລາງວັນອັນຊົງກຽດ ຊຶ່ງເປັນລາງວັນພິເສດໃນສາຂາລາງວັນທຸລະກິດແມ່ຍິງດີເດັ່ນໂດຍເປັນລາງວັນທຳອິດ ແລະເປັນປີທຳອິດທີ່ສະ ພາການຄ້າແລະອຸດສາຫະກຳແຫ່ງຊາດກໍຄືລັດຖະບານທີ່ໄດ້ເຫັນເຖິງຄວາມສຳຄັນຂອງການເຮັດທຸລະກິດຂອງບໍລິສັດປາກຊ່ອງພັດທະນາທີ່ເຮັດແທ້ທຳຈິງ, ເຮັດດ້ວຍຄວາມຈິງໃຈ.

 ພາຍຫຼັງທີ່ໄດ້ຮັບລາງວັນດັ່ງກ່າວບໍລິສັດຈະສູ້ຊົນເຮັດໃຫ້ດີທີ່ສຸດຈະຂົນຂວາຍຊຸກຍູ້ການຜະລິດຂຶ້ນມາທາງພາກກາງ ແລະພາກເໜືອໃນໂຄງການ 2+3, ປະຈຸບັນທາງບໍລິສັດກຳລັງເຮັດໂຄງການລົບລ້າງຄວາມທຸກຍາກ,ຊ່ວຍເຫຼືອປະຊາຊົນຜູ້ທຸກຍາກໂດຍກຳລັງຂຽນໂຄງການຮ່ວມກັບຄອບຄົວການນຳຊຶ່ງຈະໄປແກ້ໄຂຄວາມທຸກຍາກຂອງປະຊາຊົນຢູ່ເມືອງຮົ່ມ ແຂວງໄຊສົມບູນ ຈະພະຍາຍາມເຮັດໃຫ້ເຂົາເຈົ້າມີການຜະລິດສິນຄ້າເພື່ອຂາຍເຂົ້າຕະຫຼາດດ້ວຍການສ້າງວຽກ ແລະ ສ້າງລາຍຮັບໃຫ້ເຂົາເຈົ້າປະ ກອບສ່ວນພັດທະນາເສດຖະກິດຄອບຄົວເຂົາເຈົ້າໃຫ້ດີຂຶ້ນເທື່ອລະກ້າວ ແລະຫຼຸດພົ້ນຈາກຄວາມທຸກຍາກ.

_____________

ໜັງສືພິມເສດຖະກິດ-ສັງຄົ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์