ໄຊຍະ ມີໂຮງງານອຸດສາຫະກໍາ 2.171 ແຫ່ງ

  ແຂວງໄຊຍະບູລີເປັນແຂວງທີ່ອຸດົມສົມບູນໄປດ້ວຍຊັບພະຍາກອນທໍາມະຊາດເໝາະສົມສໍາລັບການລົງທຶນຜະລິດດ້ານອຸດສາຫະກໍາການປູກຝັງ, ລ້ຽງສັດ ແລະການບໍລິການຄ້າຂາຍອື່ນໆ ເຮັດໃຫ້ນັກລົງທຶນທັງພາຍໃນ ແລະຕ່າງປະເທດສົນໃຈເຂົ້າມາລົງທຶນໃສ່ຂະແໜງຕ່າງໆຢ່າງຕໍ່ເນື່ອງໂດຍເວລານີ້ທົ່ວແຂວງມີໂຮງງານອຸດສາຫະ ກຳແລ້ວ 2 ພັນກວ່າແຫ່ງ.​

ທ່ານ ຈັນເພັງ ພັນທຸອາມາດ ຫົວໜ້າພະແນກອຸດສາຫະກໍາ ແລະການຄ້າ ແຂວງໄຊຍະບູລີ ໃຫ້ຮູ້ວ່າຕະຫຼອດໄລຍະຜ່ານມາພະແນກອຸດສາຫະກໍາ ແລະການຄ້າແຂວງໄດ້ເອົາໃຈໃສ່ຊຸກຍູ້,ສົ່ງເສີມ ແລະດຶງດູດການລົງທຶນຂອງນັກທຸລະກິດທັງພາຍໃນ ແລະຕ່າງປະເທດມາລົງທຶນເຂົ້າໃສ່ການດໍາເນີນທຸລະກິດດ້ານອຸດສາຫະກໍາປຸງແຕ່ງໃຫ້ຫຼາຍໂດຍສະເພາະແມ່ນອຸດສາຫະກໍາປຸງແຕ່ງພືດກະສິກໍາເພື່ອເພີ່ມມູນຄ່າໃນການສົ່ງອອກ, ສ້າງຖານການຜະລິດພາຍໃນ, ສ້າງຖານລາຍຮັບທີ່ຖາວອນຫຼຸດຜ່ອນການນໍາເຂົ້າຈາກຕ່າງປະເທດເຊັ່ນ: ໂຮງງານສີ ແລະອົບແຫ້ງສາລີ, ໝາກເດືອຍ,ໂຮງງານຜະລິດແປ້ງມັນຕົ້ນສໍາເລັດຮູບ, ໂຮງງານຟານມັນຕົ້ນ ແລະໂຮງງານປຸງແຕ່ງພືດກະສິກໍາປະເພດອື່ນໆ;

 ຊຶ່ງມາຮອດປະຈຸບັນທົ່ວແຂວງມີໂຮງ ງານອຸດສາຫະກໍາປຸງແຕ່ງ ແລະຫັດຖະ ກໍາທັງໝົດ 2.171 ແຫ່ງ ໂຮງງານຂະ ໜາດໃຫຍ່ມີ 52 ແຫ່ງ, ຂະໜາດກາງ 53 ແຫ່ງ ແລະຂະໜາດນ້ອຍ 2.066 ແຫ່ງ ໃນນີ້ມີໂຮງງານສາລີ ແລະ ອົບແຫ້ງສາລີ-ໝາກເດືອຍຈໍານວນ 20 ໂຮງງານ, ໂຮງ ງານຜະລິດແປ້ງມັນຕົ້ນສໍາເລັດຮູບ 1 ແຫ່ງໂຮງງານຟານມັນຕົ້ນຂະໜາດນ້ອຍ 29 ແຫ່ງ.

  ທ່ານຫົວໜ້າພະແນກເປີດເຜີຍຕື່ມວ່າ: ໃນໄລຍະ 9 ເດືອນຜ່ານມາແຂວງໄຊຍະບູລີ ມີການສົ່ງອອກຜະລິດຕະພັນຈາກການປຸງແຕ່ງຄື: ສາລີສີ ແລະອົບແຫ້ງມີທັງ ໝົດ 76.137 ໂຕນ ມູນຄ່າ 9, 5 ລ້ານ ໂດລາ, ໝາກເດືອຍສີ ແລະອົບແຫ້ງ ມີ 17,5 ພັນໂຕນ ມູນຄ່າ 3,1 ລ້ານໂດ ລາ, ແປ້ງມັນຕົ້ນສໍາເລັດຮູບ 7,4 ພັນໂຕນ ມູນຄ່າ 1, 5 ລ້ານໂດລາ ຜະລິດຕະພັນ ມັນຕົ້ນຟາມຕາກແຫ້ງມີ 59,4 ພັນໂຕນ ມູນຄ່າ 6, 5 ລ້ານໂດລາ ແລະ ມັນຕົ້ນດິບ, ມັນຕົ້ນຫົວ ຈໍານວນ 14,7 ພັນໂຕນມູນຄ່າ 7,2 ແສນໂດລາ.  

  ພ້ອມດຽວກັນນີ້ເພື່ອກໍາຈັດສິ່ງເສດເຫຼືອຈາກເສດມັນຕົ້ນຫຼຸດຜ່ອນຜົນກະທົບດ້ານສິ່ງແວດລ້ອມກິ່ນເໝັນທາງໂຮງງານໄດ້ນໍາເອົາສິ່ງເສດເຫຼືອຈາກມັນຕົ້ນໄປຜະລິດເປັນແກັດ, ຫູງຕົ້ມເພື່ອເປັນພະລັງງານທົດແທນແລ້ວທາງໄຊຍະບູລີຍັງໄດ້ສົມທົບກັບພາກທຸລະກິດດຶງດູດນັກລົງທຶນສ້າງຕັ້ງໂຮງງານຜະລິດປຸ໋ຍຊີວະພາບຈາກເສດມັນຕົ້ນໄດ້ 1 ແຫ່ງ ຄວາມອາດສາມາດຜະລິດໄດ້ 30 ພັນໂຕນຕໍ່ປີ.

________________

ຂຽນໂດຍ: ບຸນທີ 

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์