ລາວ-ຈີນ ຮ່ວມມືດ້ານຄັງປັນຍາຊຸກຍູ້ສ້າງແລວເສດຖະກິດ

  ສະຖາບັນຄົ້ນຄວ້າເສດຖະກິດແຫ່ງຊາດລາວຮ່ວມກັບສະຖາບັນຄົ້ນຄວ້າໂລຈິດຕິກລະຫວ່າງປະເທດອາຊີໃຕ້ ແລະອາຊີຕາເວັນອອກສ່ຽງໃຕ້ແຫ່ງນະຄອນຄຸນໝິງ ສປ ຈີນ ຈັດກອງປະຊຸມສໍາມະນາກ່ຽວກັບການຮ່ວມມືດ້ານຄັງປັນຍາເພື່ອຊຸກຍູ້ການສ້າງແລວເສດຖະກິດລາວ-ຈີນ, ຂຶ້ນທີ່ນະຄອນຫຼວງວຽງຈັນ ໃນວັນທີ 9 ຕຸ ລາຜ່ານມາ ພາຍໃຕ້ການເປັນປະທານ ຂອງທ່ານ ຊື່ນ ເດດວົງສາ ຮອງຫົວ ໜ້າສະຖາບັນຄົ້ນຄວ້າເສດຖະກິດແຫ່ງ ຊາດລາວ ແລະທ່ານ ລີ້ວ ຈີນຊິນ ຫົວໜ້າສະຖາບັນຄົ້ນຄວ້າໂລຈິດຕິກລະຫວ່າງປະເທດອາຊີໃຕ້ ແລະ ອາຊີຕາເວັນອອກສ່ຽງໃຕ້ນະຄອນຄຸນໝິງ, ມີຫົວໜ້າສູນຄົ້ນຄວ້ານະໂຍບາຍເສດຖະກິດມະຫາພາກ, ສູນຝຶກອົບຮົມຂໍ້ມູນຂ່າວ ສານ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ຊື່ນ ເດດວົງສາ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອໃຫ້ຄໍາປຶກສາຫາລືແກ່ວິສາຫະກິດໄດ້ເປີດກວ້າງການຮ່ວມມືທຸລະກິດລະຫວ່າງສອງຝ່າຍ ແລະຫຼາຍຝ່າຍແບບຕ່າງຝ່າຍຕ່າງມິີຜົນປະໂຫຍດ, ຊຶ່ງໃນ 2 ປີຜ່ານມາທັງ 2 ສະຖາບັນໄດ້ສ້າງກົນໄກການຮ່ວມມື ແລະການແລກປ່ຽນຄວາມຄິດຄວາມເຫັນດ້ານຄັງປັນຍາໂດຍໄດ້ຈັດ ເວທີປຶກສາຫາລື ແລະສໍາມະນາທາງວິຊາການໃນຮູບແບບຕ່າງໆຢູ່ນະຄອນຫຼວງວຽງຈັນ ແລະນະຄອນຄຸນໝິງ ແຂວງຢູນນານ, ພ້ອມທັງໄດ້ເຂົ້າຮ່ວມເວທີປຶກສາຫາລືດ້ານຄັງປັນຍາລະຫວ່າງປະເທດໃນຂອບແນວຄິດລິເລີ່ມ “ໜຶ່ງແລວໜຶ່ງເສັ້ນທາງ”, ຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ແລະໃນຂອບການຮ່ວມມືລຸ່ມແມ່ນໍ້າຂອງເປັນຕົ້ນ.

  ຈຸດສຸມຂອງການຄົ້ນຄວ້າຮ່ວມກັນດ້ານຄັງປັນຍາແມ່ນຄົ້ນຄວ້າພັດທະນາລະບົບໂລຈິດຕິກໃຫ້ຕິດພັນກັບການປະສານສົມທົບພັດທະນາເຂດແຄວ້ນທີ່ມີທ່າແຮງບົ່ງຊ້ອນ ແລະທ່າແຮງໄດ້ປຽບຂອງແຕ່ລະເຂດແຄ້ນທີ່ແຕກຕ່າງກັນ, ພ້ອມທັງໃຫ້ມີການເຊື່ອມໂຍງ ແລະເຊື່ອມຈອດລະຫວ່າງປະເທດໃນອະນຸພາກພື້ນ, ທັງນີ້ກໍເພື່ອຜັນຂະຫຍ າຍຍຸດທະສາດຫັນໃຫ້ ສປປ ລາວ ຈາກປະເທດບໍ່ມີທາງອອກສູ່ທະເລໄປສູ່ປະເທດທີ່ເຊື່ອມຈອດລະຫວ່າງປະເທດໂດຍຕິດພັນກັບຍຸດທະສາດ “ໜຶ່ງແລວໜຶ່ງເສັ້ນທາ ງ”, ແລະເພື່ອເປັນການຜັນຂະຫຍາຍແຜນແມ່ບົດຄູ່ຮ່ວມຊະຕາກໍາລະຫວ່າງສອງປະເທດນໍາອີກ.

ສໍາລັບກອງປະຊຸມຄັ້ງນີ້ແມ່ນໄດ້ສໍາມະນາກ່ຽວກັບ 3 ຫົວຂໍ້ສໍາຄັນຄື: 1) ການພັດທະນາລະບົບໂລຈິດຕິກເພື່ອສົ່ງເສີມໃຫ້ ສປປ ລາວ ກາຍເປັນໃຈກາງດ້ານການເຊື່ອມຈອດລະຫວ່າງປະເທດ, ດ້ານການຮ່ວມມືເສດຖະກິດ, ການລົງ ທຶນ ແລະການຄ້າໃນອະນຸພາກພື້ນ, 2) ພັດທະນາຕາມເຂດແຄ້ນ, ກໍລະນີ ສຶກສາເນື້ອໃນສໍາຄັນຂອງແຜນພັດທະນາເຂດພູພຽງບໍລິເວນທີ່ເປັນຈຸດໃຈກາງຢູ່ພາກໃຕ້ຂອງ ສປປ ລາວ, 3) ບົດຮຽນຂອງ ສປ ຈີນ ກ່ຽວກັບກົນໄກການສະໜອງແຫຼ່ງທຶນໃຫ້ແກ່ການພັດທະນາອຸດສາຫະກໍາ ແລະໂຄງລ່າງພື້ນຖານ.

 ______________

ໜັງສືພິມເສດຖະກິດ-ສັງຄົມ                                                                                                                   

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์