9 ເດືອນ ຈຳປາສັກເກັບລາຍຮັບໄດ້ 985 ຕື້ກີບ

  ການຈັດຕັ້ງປະຕິບັດຈັດເກັບລາຍຮັບເຂົ້າງົບປະມານລັດຂອງແຂວງຈໍາປາສັກແມ່ນຍັງຢູ່ໃນຈັງຫວະທີ່ດີເຖິງແມ່ນພາກທຸລະກິດຫຼາຍຂະແໜງການຈະຖົດຖອຍກໍ່ຕາມ ແຕ່ຂະແໜງການທີ່ກ່ຽວຂ້ອງກໍ່ຍັງສູ້ຊົນປະຕິບັດໜ້າທີ່ຂອງຕົນໄປຕາມທິດທາງທີ່ກໍານົດໄວ້ເພື່ອເຮັດໃຫ້ຕົວເລກລາຍຮັບເປັນໄປຕາມແຜນການ.

  ທ່ານ ສົມບູນ ເຮືອງວົງສາ ຫົວໜ້າພະແນກການເງິນ ແຂວງຈໍາປາສັກ ໄດ້ໃຫ້ສໍາພາດຕໍ່ສື່ມວນຊົນປະຈໍາທ້ອງຖິ່ນເມື່ອບໍ່ດົນມານີ້ໃຫ້ຮູ້ວ່າ: ວຽກງານຈັດເກັບລາຍຮັບເຂົ້າງົບປະມານແຫ່ງລັດປີິນີ້ແມ່ນໄດ້ສືບຕໍ່ປະຕິບັດຕາມທິດຊີ້ນໍາຂອງຂັ້ນເທິງວາງອອກຢ່າງເຂັ້ມງວດ ແລະມີຄວາມຮັດກຸມຫຼາຍຂຶ້ນເພື່ອເຮັດແນວໃດໃຫ້ຕົວເລກການຈັດ

ເກັບລາຍ ໃຫ້ບັນລຸຄາດໝາຍທີ່ວາງໄວ້, ຊຶ່ງຜ່ານການຈັດຕັ້ງປະຕິບັດໃນໄລຍະຜ່ານມາ 9 ເດືອນ ແຂວງຈໍາປາສັກຈັດເກັບລາຍຮັບເຂົ້າງົບປະມານໄດ້ທັງໝົດ 985,64 ຕື້ກີບ, ໃນນັ້ນລາຍຮັບປົກກະຕິ 984,99 ຕື້ກີບ, ທຽບໃສ່ແຜນການປີສາມາດປະຕິບັດໄດ້ກວ່າ 68%, ທຽບໃສ່ແຜນ 9 ເດືອນປະ ຕິບັດໄດ້ກວ່າ 92% ແລະທຽບໃສ່ໄລຍະດຽວຂອງປີກ່ອນຫຼຸດລົງ 0,26% ສາເຫດທີ່ເຮັດໃຫ້ມີການຫຼຸດລົງແມ່ນສືບເນື່ອງມາຈາກຫຼາຍປັດໄຈ, ໂດຍສະເພາະແມ່ນລາຍຮັບອາກອນທຸລະກິດໃນຂະແໜງການເຮືອນພັກ, ໂຮມແຮມ ແລະ ຮ້ານອາຫານບໍ່ບັນລຸຕາມແຜນການທີ່ວາງໄວ້, ເນື່ອງຈາກວ່າຈໍານວນນັກທ່ອງທ່ຽວທີ່ເຂົ້າມາທ່ຽວແຂວງຈໍາປາສັກມີລັກສະນະຫຼຸດລົງຢ່າງຕໍ່ເນື່ອງ.

  ສໍາລັບການຈັດຕັ້ງປະຕິບັດການຈັດເກັບລາຍຮັບເຂົ້າງົບປະມານລັດໃນ 3 ເດືອນທ້າຍປີ 2019 ແຂວງຈໍາປາສັກກໍຄືພະແນກການເງິນແຂວງແມ່ນຈະໄດ້ພ້ອມກັນສູ້ຊົນຈັດຕັ້ງປະຕິບັດຕົວເລກຄາດທີ່ກໍານົດ ແລະ ຈະໄດ້ສືບຕໍ່ມາດຕາການ, ທິດຊີ້ນໍາຈາກກະຊວງເພື່ອຜັນຂະຫຍາຍໃຫ້ອ້າຍນ້ອງເຈົ້າໜ້າທີ່ກ່ຽວຂ້ອງເຮັດວຽກວິຊາສະ ເພາະຂອງຕົນຢ່າງເຂັ້ມງວດ ແລະປະຕິບັດໄດ້ບັນດາໜ້າວຽກຕ່າງໆທີ່ກໍານົດໄວ້.

________

ຂຽນໂດຍ: ພູມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์