331 ຄອບຄົວຢູ່ຫຼວງນ້ຳທາຖືກທາງລົດໄຟລາວ-ຈີນ ຮັບຄ່າຊົດເຊີຍກາຍເຄີ່ງແລ້ວ

  ຫຼວງນໍ້າທາແມ່ນອີກແຂວງໜຶ່ງທີ່ມີໂຄງການສ້າງເສັ້ນທາງລົດໄຟລາວ-ຈີນ ຜ່ານຈຸດເຂດນາເຕີຍເມືອງຫຼວງນໍ້າທາລວມຄວາມຍາວທັງໝົດເກືອບ 17 ກິໂລແມັດ ຊຶ່ງການກໍ່ສ້າງຜ່ານມາແມ່ນມີຄວາມຄືບໜ້າໄປຕາມແຜນເປັນຢ່າງດີເຊັ່ນດຽວກັບການໄກ່ເກ່ຍ ແລະເບີກຈ່າຍຄ່າຊົດເຊີຍປະຊາຊົນກໍມີໝາກຜົນຄວາມສຳເລັດທີ່ໜ້າເພີ່ງພໍ ໃຈໄປຕາມໆກັນມາຮອດຂະນະນີ້ສຳເລັດແລ້ວເຄິ່ງໜຶ່ງຈາກຈຳນວນທັງໝົດ 331 ຄອບຄົວ.

  ວັນທີ 7 ຕຸລາ 2019 ທ່ານ ເພັດຖາວອນ ພິລະວັນ ເຈົ້າແຂວງໆຫຼວງນໍ້າທາ, ພ້ອມດ້ວຍຄະນະໄດ້ລົງຢ້ຽມຢາມໂຄງການກໍ່ສ້າງທາງລົດໄຟລາວ-ຈີນ ແລະພົບປະໂອ້ລົມປະຊາຊົນບ້ານນາເຕີຍຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ.

 ໃນໂອກາດດັ່ງກ່າວກໍ່ໄດ້ຮັບຟັງລາຍງານຈາກທ່ານ ທອງແດງ ສີດທິສົນ ຫົວໜ້າຄະນະກໍາມະການໄກ່ເກ່ຍ ແລະເບີກຈ່າຍຄ່າຊົດເຊີຍຜູ້ທີ່ໄດ້ຮັບຜົນກະທົບໂດຍໂຄງການແມ່ນໄດ້ເລີ່ມແຕ່ບໍ່ເຕນຊາຍແດນລາວ-ຈີນຫານະຄອນຫຼວງວຽງຈັນມີຄວາມຍາວທັງໝົດ 409 ກິໂລແມັດ ໃນນັ້ນແລວທາງລົດໄຟໄດ້ຜ່ານແຂວງຫຼວງນໍ້າທາມີ 16,9 ກິໂລແມັດປະກອບມີ 2 ສະຖານີຄື: ສະຖານີບໍ່ເຕນເປັນສະຖານີສຳລັບຜູ້ໂດຍສານ ແລະສະຖານີນາເຕີຍເປັນສະຖານີໃຫຍ່ສຳລັບຜູ້ໂດຍສານ ແລະຄ່ຽນຖ່າຍສິນຄ້າ.

   ນອກຈາກນັ້ນຍັງຈະມີການກໍ່ສ້າງຂົວໃຫຍ່ຈໍານວນ 7 ແຫ່ງ ແລະເຈາະອຸໂມງ 3 ແຫ່ງ, ອຸໂມງມິດຕະພາບລາວ-ຈີນ, ອຸໂມງບໍ່ເຕນ ແລະ ອຸໂມງຕີນຕົກຊຶ່ງມີຄວາມ ຍາວທັງໝົດ 10.051 ແມັດ, ປະຕິບັດໄດ້ 9.056 ແມັດ ເທົ່າກັບ 90,1% ຊຶ່ງແມ່ນບໍລິສັດກໍ່ສ້າງທາງລົດໄຟເລກ 5 ແລະບໍລິສັດກໍ່ສ້າງທາງລົດໄຟເລກ 2 ເປັນຜູ້ຮັບເໝົາກໍ່ສ້າງຈາກ ສປ ຈີນ, ທີ່ກໍ່ສ້າງສັນຍາຊ່ວງທີ 1, ສຳລັບວຽກງານກໍ່ສ້າງເສົາຂົວ, ກໍ່ສ້າງຂ້າງຂົວ, ກໍ່ສ້າງຕ້ານກັນເຈີື່ອນ, ກໍ່ສ້າງຄັນຄູທາງ ແລະ ອື່ນໆມາເຖິງປະຈຸບັນໄດ້ສຳເລັດແລ້ວ 80% ແລະ ຄາດວ່າຈະໃຫ້ສຳເລັດໃນທ້າຍປີ 2019 ນີ້ ພ້ອມນັ້ນຍັງຈະໄດ້ຕິດຕັ້ງລະບົບລາງລົດໄຟ ແລະຕິດຕັ້ງລະບົບໄຟຟ້າສະໜອງໄຟຟ້າໃຫ້ແກ່ຂະບວນລົດໄຟໃຫ້ສຳເລັດໃນທ້າຍປີ 2021 ຕາມແຜນການຂອງສອງລັດຖະບານລາວ-ຈີນ ໄດ້ກຳນົດໄວ້.

 ຫຼັງຈາກນັ້ນທ່ານເຈົ້າແຂວງຫຼວງນໍ້າທາພ້ອມດ້ວຍຄະນະກໍ່ໄດ້ລົງຕິດຕາມເບິ່ງການກໍ່ສ້າງເສົາຂົວ, ກໍ່ສ້າງຂ້າງຂົວ, ກໍ່ສ້າງຕ້ານກັນເຈີື່ອນ ແລະກໍ່ສ້າງຄັນຄູທາງໂອກາດນີ້ຄະນະກໍ່ໄດ້ໂອ້ລົມ ປະຊາຊົນເຂດນາເຕີຍທີ່ໄດ້ຮັບຜົນກະ ທົບຈາກໂຄງການກໍ່ສ້າງເສັ້ນທາງລົດ ໄຟ ລາວ-ຈີນ ລວມມີທັງໜົດ 4 ບ້ານ ຄື: ບ້ານນາເຕ່ນ, ບໍ່ປຽດ, ຕີນຕົກ ແລະບ້ານນາເຕີຍ, ມີຜູ້ຮັບຜົນກະທົບທັງໝົດ 331 ຄອບຄົວ ມາເຖິງປະຈຸບັນແຂວງຫຼວງນໍ້າທາໄດ້ຮັບເງິນຊົດເຊີຍສິ່ງກີດຂວາງຈາກໂຄງການກໍ່ສ້າງເສັ້ນທາງລົດ ໄຟລາວ-ຈີນ ແລ້ວຈຳນວນ 5 ງວດ, ມີ 92,1 ຕື້ກີບ ແລະໄດ້ເບີກຈ່າຍໃຫ້ ຜູ້ທີ່ໄດ້ຮັບຜົນກະທົບໄປແລ້ວຈຳນວນ 171 ຄອບຄົວ ເທົ່າກັບ 51,3%, ຍັງບໍ່ທັນໄດ້ເບີກຈ່າຍມີ  160 ຄອບຄົວ ລວມເປັນເງິນ 89,4 ຕື້ກີບ ແລະ ຈະໄດ້ສືບຕໍ່ຈັດຕັ້ງປະຕິບັດແຜນການຊົດເຊີຍງວດທີ 6 ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈຳນວນ 40 ຄອບຄົວ, ຢູ່ບ້ານນາເຕີຍໃນມູນຄ່າ 26,4 ຕື້ກີບຕື່ມອີກ.

 

ສຳລັບການຍົກຍ້າຍ-ຈັດສັນຜູ້ທີ່ໄດ້ຮັບຜົນກະທົບລັດຖະບານຈີນຈະໃຫ້ເງິນຊ່ວຍເຫຼືອລ້າແກ່ລັດຖະບານລາວຈຳນວນ 250 ລ້ານຢວນ, ເທົ່າກັບ 325 ຕື້ກີບ, ເພື່ອມາຈັດສັນບ້ານໃໝ່ຈຳນວນ 4 ບ້ານ 3 ແຂວງຄື: ແຂວງຫຼວງນໍ້າທາ, ອຸດົມໄຊ ແລະແຂວງຫຼວງພະບາງໃນນັ້ນບ້ານນາເຕີຍກໍ່ແມ່ນບ້ານໜຶ່ງທີ່ໄດ້ຮັບການຊ່ວຍເຫຼືອໃນການຍົກຍ້າຍຈັດສັນບ້ານຄືນໃໝ່.

-----------------

ຂຽນໂດຍ: ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์