ເຈົ້າໜ້າທີ່ອອກ 10 ຂໍ້ຫ້າມໃນງານບຸນຊ່ວງເຮືອທ່າວັດຈັນ

  ບຸນອອກພັນສາປາວໍລະນາ ແລະຊ່ວງເຮືອທ່າວັດຈັນປະຈຳປີ 2019 ຈະໄດ້ຈັດຂຶ້ນໃນລະຫວ່າງວັນທີ 10-14 ຕຸລາ ທີ່ຈະມາເຖິງນີ້ດັ່ງນັ້ນເພື່ອເຮັດໃຫ້ບຸນດັ່ງກ່າວມີຄວາມສະຫງົບ ແລະເປັນລະບຽບກອງບັນຊາການ ປກສ ເມືອງຈັນທະບູລີ ຈຶ່ງໄດ້ວາງແຜ່ນບັນຈຸກຳລັງປ້ອງກັນອອກເປັນ 2 ຈຸດໃຫຍ່ໃນການແຈ້ງເຫດຄື: ຈຸດບັນຊາ ການ ປກສ ເມືອງ ແລະ ກອງບັນຊາການທະຫານເມືອງນອນຈາກນັ້ນຍັງມີອີກ 5 ຈຸດຍ່ອຍຢູ່ບັນດາກຸ່ມບ້ານອ້ອມຂ້າງໂດຍປະສານສົມທົບກັບບັນດາພາກສ່ວນທີ່ກ່ຽວຂ້ອງຂອງນະຄອນຫຼວງວຽງຈັນ, ເມືອງ, ບ້ານ, ແລະຊາວໜຸ່ມໂດຍງານຄັ້ງນີ້ມີທັງໝົດ 10 ຂໍ້ຫ້າມສຳລັບຜູ້ມາຄ້າຂາຍສິນຄ້າແລະທ່ຽວຊົມງານບຸນ.  ທ່ານ ພັນໂທ ຊຽງພັນ ອິນທະປັນຍາ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ ຮອງຫົວໜ້າອານຸກຳມະການປ້ອງກັນບຸນອອກພັນສາປາວໍລະນາ ແລະບຸນຊ່ວງເຮືອທ່າວັດຈັນໄດ້ໃຫ້ສຳພາດວ່າ: ພາຍໃນງານບຸນດັ່ງກ່າວແມ່ນຈະໄດ້ໃຫ້ກຳລັງປ້ອງກັນຄວາມສະຫງົບເຂົ້າປະຕິບັດໜ້າທີ່ຕັ້ງແຕ່ວັນທີ 10 ຈົນຮອດວັນທີ 14 ຕຸລາ 2019 ແລະຜູ້ທີມາທ່ຽວຊົມໃນງານບຸນຊ່ວງເຮືອຕ້ອງປະຕິບັດ 10 ຂໍ້ຫ້າມດັ່ງນີ້ 1 ຫ້າມບໍ່ໃຫ້ໂຄສະນາທຸກຮູບການທີ່ຜິດຕໍ່ກົດລະບຽບຂອງ ສປປ ລາວ,

2. ຫ້າມຖືອາວຸດເສິກທຸກປະເພດເຂົ້າໄປໃນງານບຸນ, 3 ຫ້າມຂາຍໝາກກະໂພກ, ບັງໄຟດອກ ແລະພຸທຸກຊະນິດ, 4. ຫ້າມຄ້າຂາຍປະເພດທາດເບື່ອ ຫຼື ສິງເສບຕິດ ຕ່າງໆ, 5 ຫ້າມຂາຍສິງທີຜິດຕໍ່ວັດທະນະທຳ ແລະອັນດີງາມຂອງຊາດ, 6. ຫ້າມນຳສິນຄ້າທີບໍ່ໄດ້ມາດຕະຖານ ຫຼື ບໍ່ໄດ້ຜ່ານການກວດກາມາວາງຂາຍ, 7. ຫ້າມ ຫຼິ້ນການພະນັນທຸກປະເພດ ແລະສິ່ງມືນເມົາພາຍໃນງານຫາກລະເມີດຈະຖືກເຈົ້າໜ້າທີ່ກັກຕົວໄວ້ກ່ອນ, 8. ທຸກຫ້າງຮ້ານຕ້ອງຕິດຊື່ສິນຄ້າເປັນພາສາລາວ, ເປີດເພງລາວ ແລະ ຮ້ອງເພງລາວເທົ່ານັ້ນ, 9. ການວາງສິນຄ້າທຸກປະເພດຕ້ອງຕິດລາຄາເປັນເງິນກີບໃຊ້ແຕ່ເງິນກີບລາວເທົ່ານັ້ນ ແລະ 10 ຕ້ອງວາງຂາຍຕາມທີ່ໄດ້ຈັດສະ ຖານທີ່ກຳນົດ, ຖ້າຫາກໃຜລະເມີດຕາມທີ່ກຳນົດມາຂັ້ນເທິງນັ້ນແມ່ນຈະໄດ້ຕັກເຕືອນ ແລະສຶກສາອົບຮົມຕາມຂັ້ນຕອນຂອງລະບຽບກົດໝາຍ.

 ນອກຈາກວຽກງານປ້ອງກັນຄວາມສະຫງົບແລ້ວກໍ່ຍັງມີວຽກງານຮັກສາຄວາມສະອາດຂອງງານດັ່ງນັ້ນຫ້ອງການຄຸ້ມຄອງ ແລະບໍລິການຕົວເມືອງວຽງຈັນ ກໍ່ໄດ້ລົງຕິດຕັ້ງຖັງຂີ່ເຫຍື່ອຕາມຈຸດຕ່າງໆພາຍໃນງານ ແລະລົງກວດກາໃຫ້ບັນດາຮ້ານຂາຍເຄື່ອງທຸກຮ້ານຕ້ອງມີຖົງຂີ່ເຫຍືອປະຈຳຮ້ານພ້ອມທັງລະດົມອາສາສະໝັກລົງປຸກລະດົມໃຫ້ພໍ່ແມ່ປະຊາຊົນ ແລະຜູ້ທີມາທ່ຽວມາຊົມພາຍໃນງານບຸນໃຫ້ເປັນເຈົ້າການໃນການຮັກສາຄວາມສະອາດຊ່ວຍກັນດ້ວຍການຖິ້ມຂີ້ເຫຍື່ອໃຫ້ຖືກບ່ອນເພື່ອຮັບປະກັນໃນງານບຸນອອກພັນສາປາວໍລະນາ ແລະຊ່ວງເຮືອທ່າວັດຈັນໃຫ້ມີຄວາມສະອາດງາມຕາ.

_______________

ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์