ລັດປິດໂຮງງານນໍ້າກ້ອນດົງບ້ານປາແຫຼບຫຼັງມີກິ່ນຂິວຮຸນແຮງ

 ໃນວັນທີ 27 ກັນຍາ 2019 ໄດ້ເກີດເຫດການຮົ່ວໄຫຼຂອງການເຕີມນໍ້າຢາອາໂມເນຍ (NH4) ຈາກໂຮງງານຜະລິດນໍ້າກ້ອນຕັ້ງຢູ່ບ້ານດົງປ່າແຫຼບ ເມືອງຈັນທະບູລີ ນະຄອນຫຼວງວຽງຈັນ ພາໃຫ້ເກີດມີກິ່ນຂິວແຮງຢູ່ອ້ອມຂ້າງບໍລິເວນຂອງໂຮງງານທີ່ມີບ້ານເຮືອນປະຊາຊົນຕັ້ງຢູ່ໜາແໜ້ນໂດຍສະເພາະແມ່ນໂຮງຮຽນຫງຽນຢູທີ່ມີນັກຮຽນ 1 ພັນກວ່າຄົນ ໃນນີ້ມີນັກຮຽນ 105 ຄົນ (ຍິງ 59 ຄົນ) ທີ່ມີອາການວິນຫົວ, ເຈັບຄໍ, ເຈັບຕາສະນັ້ນ, ທາງໂຮງຮຽນຈຶ່ງປິດການຮຽນການສອນ.

 ພາຍຫຼັງເກີດເຫດດັ່ງກ່າວ, ກົມນະໂຍບາຍຊັບພະຍາກອນທຳມະຊາດ ແລະສິ່ງແວດລ້ອມ (ຊສ), ກະຊວງ ຊສ ໃນນາມເປັນຫົວໜ້າຄະນະທີ 3 ຂອງຄະນະຮັບຜິດ ຊອບຕິດຕາມແກ້ໄຂເຫດສຸກເສີນດ້ານສິ່ງແວດລ້ອມໄດ້ປະສານສົມທົບກັບກອງຕິດຕາມກວດກາ ຊສ ພະແນກ ຊສ ນະຄອນຫຼວງວຽງຈັນ ແລະຫ້ອງການ ຊສ ເມືອງຈັນທະບູລີ ລົງເກັບກຳຂໍ້ມູນ ແລະພົບວ່າ: ໂຮງງານດັ່ງກ່າວແມ່ນດຳເນີນທຸລະກິດແບບຄອບຄົວ, ໄດ້ຮັບໃບອະນຸຍາດດຳເນີນກິດຈະການໂຮງງານຈາກຫ້ອງການອຸດສາ ຫະກຳ ແລະການຄ້າເມືອງຈັນທະບູລີອອກໃຫ້ປີ 2019, ໃບທະບຽນວິສາຫະກິດຈາກຫ້ອງການອຸດສາຫະກຳ ແລະການຄ້າເມືອງຈັນທະບູລີອອກໃຫ້ປີ 2014 ສຳລັບໃບຢັ້ງຢືນກ່ຽວກັບສິ່ງແວດລ້ອມແມ່ນບໍ່ຍັງໄດ້ຮັບການອະນຸຍາດເທື່ອ.

ຜ່ານການສອບຖາມນາຍບ້ານຈຸດໂຮງງານດັ່ງກ່າວຕັ້ງຢູ່ເຫັນວ່າໂຮງງານດັ່ງກ່າວສົ່ງກິ່ນຂິວແຕ່ປີ 2015 ຊຶ່ງທາງຫ້ອງການບ້ານດົງປ່າແຫຼບໄດ້ສົ່ງໜັງສືຫາຫ້ອງການ ຊສ ເມືອງຈັນທະບູລີ ເພື່ອລົງມາແກ້ໄຂບັນຫາກິ່ນຂິວແຕ່ບໍ່ໄດ້ຮັບການແກ້ໄຂ.

 ສະນັ້ນ, ພາຍຫຼັງເກີດເຫດການຄັ້ງນີ້ຫ້ອງການອຸດສາຫະກໍາ ແລະການຄ້າເມືອງຈັນທະບູລີໄດ້ອອກໃບຢັ້ງຢືນການຢຸດເຊົາດໍາເນີນກິດຈະການໂຮງງານຊົວຄາວສະບັບເລກທີ 158/ອຈ. ຈລ, ລົງວັນທີ 2 ຕຸລາ 2019 ແຕ່ມາຮອດກາງຄືນວັນທີ 8 ຕຸລາ 2019 ເຈົ້າຂອງໂຮງງານໄດ້ລັກເປີດເຄື່ອງຈັກຜະລິດນໍ້າກ້ອນນ້ອຍຊຶ່ງໃນຕອນ ເຊົ້າວັນທີ 9 ຕຸລາ 2019 ນາຍບ້ານ ແລະພາກສ່ວນກ່ຽວຂ້ອງໄດ້ເຊີນເຈົ້າຂອງໂຮງງານມາກ່າວເຕືອນ ແລະທາງໂຮງງານໄດ້ປິດເຄື່ອງຈັກແລ້ວຢ່າງໃດກໍຕາມ, ມີຄວາ ມຈໍາເປັນຕ້ອງໄດ້ສຶບຕໍ່ຕິດຕາມເພື່ອບໍ່ໃຫ້ໂຮງງານດັ່ງກ່າວລັກເປີດນໍາໃຊ້ເຄື່ອງຈັກຜະລິດນໍ້າກ້ອນອີກ.

  ການແກ້ໄຂບັນຫາກີ່ນຂິວໃນຄັ້ງນີ້ໄດ້ຮັບການແກ້ໄຂຢ່າງທັນການຍ້ອນໄດ້ຮັບການຮ່ວມມືຈາກຫຼາຍພາກສ່ວນເປັນຕົ້ນແມ່ນກະຊວງ ຊສ ອົງການປົກຄອງເມືອງຈັນທະບູລີ, ອົງການປົກຄອງບ້ານດອນແດງ ແລະພໍ່ແມ່ປະຊາຊົນກໍຄືຄະນະອໍານວຍການໂຮງຮຽນຫງຽນຢູຊຶ່ງເປັນຕົວແບບຢ່າງໃນການແກ້ໄຂບັນຫາສິ່ງແວດລ້ອມໃນຕໍ່ໜ້າ.

  ດັ່ງນັ້ນ, ຖ້າຫາກເກີດມີເຫດການສຸກເສີນທີ່ສົ່ງຜົນກະທົບຕໍ່ສິ່ງແວດລ້ອມບັນດາທ່ານສາມາດປະສານຜ່ານສາຍດ່ວນ 1514 ຂອງກະຊວງ ຊສ ຫຼືປະສານຫາຜູ້ຮັບຜິດຊອບລົງແກ້ໄຂເຫດການສຸກເສີນດ້ານສິ່ງແວດລ້ອມຕາມຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຕິດຕາມ ແລະ ແກ້ໄຂເຫດສຸກເສີນດ້ານສິ່ງແວດລ້ອມສະ ບັບເລກທີ  4043/ ກຊສ, ລົງວັນທີ 15 ກໍລະກົດ 2019.

_____________

ຂຽນໂດຍ: ກຊສ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์