ຊວນເຢມອບເຂົ້າຊ່ວຍຜູ້ຖືກໄພນໍ້າຖ້ວມ

  ວັນທີ 9 ຕຸລາ 2019, ທີ່ກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ມີຫົວໜ່ວຍທຸລະກິດຊວນເຢ, ເອວິຊອິນເຕີເນຊັນນໍໄດ້ນຳເຂົ້າສານຈ້າວ 201 ແກັດ ຈຳນວນ 4,02 ໂຕນ ລວມເປັນເງິນ 58,87 ລ້ານກີບ ເພື່ອມາມອບໃຫ້ກັບກະຊວງ ຮສສ ນຳໄປຊ່ວຍຜູ້ປະສົບໄພນໍ້າຖ້ວມໃນ 2 ແຂວງພາກກາງ ແລະ 4 ແຂວງພາກໃຕ້, ຊຶ່ງຕາງໜ້າມອບແມ່ນທ່ານ ເຫີ ຊືພ່ຽງ ຜູ້ຊ່ວຍປະທານບໍລິສັດຊວນເຢລາວ ຈຳກັດ ແລະຮັບ ໂດຍທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ, ພ້ອມນັ້ນຍັງມີພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມ.

  ທ່ານ ເຫີ ຊືພ່ຽງ ກ່າວວ່າ: ພາຍຫຼັງທີ່ຮູ້ຂ່າວວ່າ ບັນດາພາກກາງ ແລະ ພາກໃຕ້ຂອງລາວໄດ້ຮັບຜົນກະທົບໜັກຈາກໄພນໍ້າຖ້ວມໃນໄລຍະທີ່ຜ່ານມາ, ທາງຫົວໜ່ວຍທຸລະກິດ ຊວນເຢ, ເອວິຊ ອິນເຕີເນຊັນນໍຈຶ່ງຢາກເປັນສ່ວນໜຶ່ງໃນການປະກອບສ່ວນຊ່ວຍບັນເທົາທຸກໃຫ້ກັບບັນດາພໍ່ແມ່ປະຊາຊົນລາວໂດຍສະເພາະປະຊາຊົນທີ່ໄດ້ຮັບຜົນກະທົບໃນແຂວງພາກກາງ ແລະ ພາກໃຕ້ຂອງລາວ, ດັ່ງທີ່ຮູ້ເຂົ້າກິນຍັງເປັນສິ່ງທີ່ຜູ້ປະສົບໄພຕ້ອງການຫຼາຍ, ສະນັ້ນທາງຫົວໜ່ວຍທຸລະກິດຈຶ່ງໄດ້ນຳເຂົ້າສານຈ້າ ວ 201 ແກັດ ຈຳນວນ 4,02 ໂຕນ ລວມເປັນເງິນ 58,87 ລ້ານກີບ ເພື່ອມາມອບໃຫ້ກັບກະຊວງ ຮສສ ແລະ ໃຫ້ກະຊວງນຳໄປຊ່ວຍຜູ້ປະສົບໄພນໍ້າຖ້ວມໃນ 2 ແຂວງພາກກາງ ແລະ 4 ແຂວງພາກໃຕ້, ເຮັດແນວໃດໃຫ້ພວກເຂົາເຫຼົ່ານັ້ນໄດ້ມີເຂົ້າກິນທີ່ພຽງພໍແລະສາມາດຜ່ານພົ້ນວິກິດຄັ້ງນີ້ໄປໄດ້ໂດຍໄວ, ຫົວໜ່ວຍທຸລະກິດ ຊວນເຢ ແລະ AVIC INTL ກໍພ້ອມຈະໃຫ້ການຊ່ວຍເຫຼືອ.

 ໃນໂອກາດດຽວກັນ, ທ່ານ ຄຳແພງ ໄຊສົມແພງ ກໍໄດ້ສະແດງຄວາມຂອບໃຈມາຍັງນໍ້າໃຈອັນປະເສີດຂອງບັນດາຫົວໜ່ວຍທຸລະກິດຊາວຕ່າງປະເທດກໍຄືຊວນເຢລາວຈຳ ກັດ ແລະ AVIC INTL ທີ່ໄດ້ເຫັນຄວາມສໍາຄັນ ແລະຄວາມເປັນຫ່ວງເປັນໄຍຕໍ່ກັບຜູ້ປະສົບໄພຄັ້ງນີ້, ພ້ອມນັ້ນທ່ານຍັງແຈ້ງໃຫ້ຮູ້ຕື່ມວ່າ: ສຳລັບເຄື່ອງຊ່ວຍເຫຼືອໃນປີນີ້ທີ່ໄດ້ຈາກບັນດາພາກສ່ວນຕ່າງໆກະຊວງໄດ້ມີການຈັດສົ່ງໃຫ້ກັບຜູ້ປະສົບໄພເປັນລາຍອາທິດໄປ,ຊຶ່ງອັນນີ້ແມ່ນເປັນການແກ້ໄຂໃນໄລຍະສຸກເສີນເທົ່ານັ້ນ,ສ່ວນການຟື້ນຟູຫຼັງໄພພິບັດ ຫຼື ໄລຍະຍາວແມ່ນຍັງຕ້ອງການຈຳນວນຫຼາຍແລະຍັງຕ້ອງໄດ້ມີການລະດົມຕື່ມຈາກທຸກພາກສ່ວນໃນສັງຄົມເພື່ອເຮັດໃຫ້ບັນດາຜູ້ປະສົບໄພສາມາດກັບມາໃຊ້ຊີວິດໄດ້ຢ່າງເປັນປົກກະຕິອີກຄັ້ງໜຶ່ງ.

______________

ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์