ສພກປ ຮັບຮອງ 3 ໂຄງການຄົ້ນຄວ້າວິທະຍາສາດພັດທະນາແນວພັນສັດ, ເຂົ້າ ແລະພັນໄມ້

  ກອງປະຊຸມສະພາວິທະຍາສາດເຕັກນິກກະສິກຳ ແລະ ປ່າໄມ້ (ສພກປ) ຄັ້ງທີ I, ໄດ້ສຸມໃສ່ສ້າງຄວາມເປັນເອກະພາບໃນການຈັດຕັ້ງເຄື່ອນໄຫວເພື່ອຍົກລະດັບການຄົ້ນຄວ້າວິທະຍາສາດເຕັກນິກກະສິກຳ, ນະວັດຕະກຳເຂົ້າສູ່ການຜະລິດ, ປຸງແຕ່ງ, ການຕະຫຼາດ ແລະ ການຄຸ້ມຄອງໃຫ້ມີປະສິດທິຜົນ, ນອກນັ້ນກອງປະຊຸມຍັງໄດ້ຮັບຮອງເອົາ 3 ໂຄງການຄົ້ນຄວ້າວິທະຍາສາດການພັດທະນາແນວພັນສັດ, ເຂົ້າ ແລະແກ່ນພັນໄມ້ພື້ນເມືອງ.

  ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 9 ຕຸລາ 2019, ຢູ່ສະໂມສອນກະຊວງກະສິກຳ ແລະປ່າໄມ້, ໂດຍການເຂົ້າຮ່ວມກອງປະຊຸມ ແລະເປັນປະທານຂອງທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະປ່າໄມ້, ທັງເປັນຮອງປະທານ ສພກປ, ພ້ອມນັ້ນຍັງບັນດາຫົວໜ້າກົມ, ຮອງກົມ ແລະສະຖາບັນອ້ອມຂ້າງກະຊວງ, ສະມາຊິກ ສພກປ ເຂົ້າຮ່ວມ.

  ທ່ານ ບຸນຂວາງ ຄຳບຸນເຮືອງ ກ່າວວ່າ: ການນຳໃຊ້ເຕັກນິກ, ວິທະຍາສາດວິທະຍາການໃໝ່ເຂົ້າໃນການຜະລິດ, ການຄຸ້ມຄອງວຽກງານກະສິກຳ-ປ່າໄມ້ ແລະພັດທະ ນາຊົນນະບົດຂອງລາວແມ່ນຍັງຢູ່ໃນລະດັບຕໍ່າທຽບໃສ່ບັນດາປະເທດອ້ອມຂ້າງໃນສະພາບທີ່ປະເທດເຮົາເປີດກວ້າງການຮ່ວມມືຕາມກົນໄກເສດຖະກິດຕະຫຼາດໃນເງື່ອນ ໄຂ ທີ່ສະພາບດິນຟ້າອາກາດມີການປ່ຽນແປງນີ້ວຽກງານການຄົ້ນຄວ້າທົດລອງ, ສຶກສາສັງລວມບັນດາເຕັກນິກທີ່ນຳໃຊ້ໃນລັກສະນະວິທະຍາສາດແມ່ນມີຄວາມສຳຄັນ ແລະຈຳເປັນຕ້ອງໄດ້ດຳເນີນການໄປຢ່າງບໍ່ຢຸດຢັ້ງ ແລະມີຄວາມກ່ຽວຂ້ອງກັບການເຕົ້າໂຮມກຳລັງນັກຄົ້ນຄວ້າ, ນັກພັດທະນາໃນຂອບເຂດວຽກງານດັ່ງກ່າວໃຫ້ກວ້າງ ຂວາງອອກເລື້ອຍໆ.

  ດັ່ງນັ້ນກອງປະຊຸມຄັ້ງນີ້ກໍຖືເປັນຄັ້ງທີ I ຂອງວາລະກອງປະຊຸມສາມັນປະຈໍາປີ 2019 ທີ່ສຸມໃສ່ສ້າງຄວາມເປັນເອກະພາບໃນການຈັດຕັ້ງເຄື່ອນໄຫວເພື່ອຍົກລະດັບການຄົ້ນຄວ້າວິທະ ຍາສາດເຕັກນິກກະສິກຳ ແລະ ປ່າໄມ້, ເຕັກໂນໂລຢີ, ນະວັດຕະກຳເຂົ້າສູ່ການນຳໃຊ້ການຜະລິດ, ປຸງແຕ່ງ, ການຕະຫຼາດ ແລະ ການຄຸ້ມຄອງໃຫ້ມີປະສິດທິຜົນ,ມີນັກວິທະຍາສາດ, ນັກຄົ້ນຄວ້າແລະນັກພັດທະນາ-ຄຸ້ມຄອງຂອງຂະແໜງການຢ່າງຫຼາກຫຼາຍສາຂາວິຊາ, ທັງຂະຫຍາຍຂອບເຂດການຄົ້ນຄວ້າທົດລອງໃຫ້ກວ້າງອອກ, ສອດຄ່ອງກັບການເຊື່ອມໂຍງດ້ານວິທະຍາສາດ-ເຕັກນິກ ແລະເສດຖະກິດກັບພາກພື້ນ ແລະສາກົນ. 

  ພ້ອມດຽວກັນນັ້ນ, ໃນກອງປະຊຸມດັ່ງກ່າວບັນດາຜູ້ເຂົ້າຮ່ວມຍັງໄດ້ປຶກສາຫາລືບາງບັນຫາໃນການພັດທະນາວຽກງານດ້ານວິທະຍາສາດເຕັກນິກກະສິກຳ ແລະປ່າໄມ້, ລວມທັງການພິຈາລະນາ ຮັບຮອງເອົາບົດໂຄງການຄົ້ນຄວ້າວິທະ ຍາສາດຂອງຂະແໜງການ 3 ໂຄງການ ລວມມູນຄ່າ 7 ຕື້ກີບ, ໃນນັ້ນ ປະກອບ ມີໂຄງການຄົ້ນຄວ້າເພື່ອການອະນຸລັກ, ນຳໃຊ້ ແລະພັດທະນາແນວພັນງົວພື້ນ ເມືອງຂອງລາວ, ໂຄງການປັບປຸງແນວ ພັນເຂົ້າເພື່ອເປັນສະບຽງອາຫານ ແລະ ເປັນສິນຄ້າເພື່ອປັບຕົວກັບການປ່ຽນ ແປງດິນຟ້າອາກາດໂດຍນຳໃຊ້ເຕັກໂນ ໂລຊີວະພາບ (MAS) ຊ່ວຍໃນການ ປັບປຸງພັນ, ໂຄງການຄົ້ນຄວ້າ ແລະພັດທະນາແຫຼ່ງແກ່ນພັນໄມ້ພື້ນເມືອງ.

  ສຳລັບທັງ 3 ໂຄງການຄົ້ນຄວ້າແມ່ນມີອາຍຸການປະຕິບັດງານ 5 ປີ, ໃນນີ້ໂຄງການຄົ້ນຄວ້າເພື່ອການອະນຸລັກ, ນຳໃຊ້ແລະພັດທະນາແນວພັນງົວພື້ນເມືອງຂອງລາວແມ່ນຈະເລີ່ມແຕ່ປີ 2019- 2023, ໂດຍກວມເອົາ 5 ແຂວງຄື: ນະຄອນຫຼວງວຽງຈັນ, ຊຽງຂວາງ, ວຽງຈັນ, ຄຳມ່ວນ, ສາລະວັນ ແລະອັດຕະປື, ສ່ວນໂຄງການປັບປຸງແນວພັນເຂົ້າເພື່ອເປັນສະບຽງອາຫານ ແລະເປັນສິນຄ້າເພື່ອປັບຕົວກັບການປ່ຽນແປງດິນຟ້າອາກາດໂດຍນຳໃຊ້ເຕັກໂນໂລຊີວະພາບ (MAS) ຊ່ວຍໃນການປັບປຸງພັນແມ່ນຈະເລີ່ມໃນປີ 2020-2025 ເພື່ອປະຕິບັດໃນຂອບເຂດທົ່ວປະເທດແລະສຳລັບໂຄງການຄົ້ນຄວ້າ ແລະພັດທະນາແຫຼ່ງແກ່ນພັນໄມ້ພື້ນເມືອງມີໄລຍະການປະ ຕິບັດຢູ່ 5 ປີ ເລີ່ມປີ 2020-2024 ໃນຂອບເຂດທົ່ວປະເທດ.  

_______________

ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์