ໃກ້ຄວາມເປັນຈິງ ຣິສອດລາວຄົບວົງຈອນ ດຽວນີ້ເລັ່ງສຳຫຼວດ ປີໜ້າອາດເລີ່ມລົງມືພັດທະນາ

  ໂຄງການພັດທະນາຣີສອດລາວຄົບວົງຈອນຫຼັກ 62 ເມືອງໂພນໂຮງ ແຂວງວຽງຈັນ ຫຍັບຈໍ້ມໍ່ເຂົ້າຫາຄວາມເປັນຈິງນັບມື້ຊຶ່ງດຽວນີ້ບໍລິສັດກຳລັງເລັ່ງມືສຶກສາສຳຫຼວດຂັ້ນຕອນສຸດທ້າຍກ່ຽວກັບສີ່ງແວດລ້ອມຄາດວ່າທ້າຍປີນີ້ຈະສຳເລັດພ້ອມຈະໄດ້ຮັບອະນຸຍາດຈາກລັດຖະບານ ແລະ ເລີ່ມພັດທະນາພາຍໃນປີ 2020 ໂດຍຈະມີການລົງ ທຶນຫຼາຍເຖິງ 3 ຕື້ໂດລາ ໃສ່ເກືອບ 10 ກິດຈະການອັນຈະກາຍເປັນໜ້າຕາໃໝ່ ແລະ ແມ່ເຫຼັກທີ່ສຳຄັນໃນການດຶງດູດນັກທ່ອງທ່ຽວຕ່າງຊາດເຂົ້າມາລາວໄດ້ຫຼາຍຂຶ້ນໃນອະນາຄົດ.

 ທ່ານ ນາງ ລັດດາວອນ ພູນສະຫວັດ ຮອງຜູ້ອຳນວຍການບໍລິສັດທີ່ປຶກສາໄຂ່ມຸກຕາເວັນອອກຈຳກັດໄດ້ໃຫ້ສຳພາດຕໍ່ທິມຂ່າວພວກເຮົາວ່າ: ວຽງຈັນເປັນແຂວງໜຶ່ງທີ່ມີທ່າແຮງຫຼາຍດ້ານເນື່ອງຈາກເປັນແຂວງທີ່ຕັ້ງຢູ່ພາກກາງມີເສັ້ນທາງເລກທີ 13 ເໜືອຜ່ານໃຈກາງມີຄວາມຍາວຫຼາຍຮ້ອຍກິໂລແມັດເຮັດໃຫ້ການເຊື່ອມຕໍ່ລະຫວ່າງແຂວງພາກເໜືອພາກກາງລົງຮອດພາກໃຕ້ມີຄວາມສະດວກສະບາຍນອກນີ້ຍັງເປັນແຂວງທີ່ມີທ່າແຮງທາງດ້ານການທ່ອງທ່ຽວທາງທຳມະຊາດດັ່ງນັ້ນຈຶ່ງເຮັດໃຫ້ເປັນທີ່ສົນໃຈຂອງບໍລິສັດທີ່ປຶກສາໄຂ່ມຸກຕາເວັນອອກຈຳກັດທີ່ມີຄວາມສົນໃຈຢາກພັດທະນາໂຄງການກໍ່ສ້າງຣີສອດລາວແບບຄົບວົງຈອນຢູ່ຫຼັກ 62 ເມືອງໂພນໂຮງ.

 ພາຍຫຼັງທີ່ບໍລິສັດຮັບອະນຸຍາດເພື່ອດຳເນີນການສຶກສາສຳຫຼວດຈາກລັດຖະບານໃນກາງປີ 2018 ເປັນຕົ້ນມາທີມງານກໍໄດ້ເລັ່ງມືລົງສຳຫຼວດໃນດ້ານຕ່າງບໍ່ວ່າຈະເປັນໃນດ້ານເສດຖະກິດ, ສັງຄົມ ແລະສີ່ງແວດລ້ອມຊຶ່ງເວລານີ້ພວມຂຸ້ນຂ້ຽວຢູ່ ແລະຈະໃຫ້ສຳເລັດໃນທ້າຍປີນີ້ເພື່ອຈະໄດ້ຂໍອະນຸມັດ ແລະເລີ່ມລົງທຶນພັດທະນາໂຄງການພາຍໃນປີ 2020.

  ທ່ານ ນາງ ລັດດາວອນ ພູນສະຫວັດ ກ່າວຕື່ມວ່າ: ມາຮອດເວລານີ້ສາມາດຢືນຢັນໄດ້ໂຄງການຈະເກີດຂຶ້ນຢ່າງແນ່ນອນເນື່ອງຈາກບໍລິສັດຂອງພວກເຮົາມີຄວາມກຽມພ້ອມທຸກໆດ້ານໂດຍສະເພາະແມ່ນເລື່ອງການເງິນຊຶ່ງໂຄງການຈະປະກອບມີ 9 ກິດຈະການໃສ່ເນື້ອທີ່ 1.200 ເຮັກຕາ ໃນນັ້ນປະກອບມີກິດຈະການທີ່ພັກເຊົາເຊັ່ນ: ສວນສາທາລະນະໜ້ານໍ້າ, ສວນສະໜຸກ, ສູນບຳບັດ ແລະເຂດກີລາໜ້ານໍ້າ, ກິດຈະການບ່ອນພັກອາໄສຈະມີເຮືອນທີ່ມີລະບຽງຕິດກັບຫ້ອງອື່ນ 89 ຫຼັງ ແລະເຮືອນ ພັກ ແບບເປັນສ່ວນຕົວສວຍງາມ 1.500 ຫຼັງ, ກິດຈະການສູນຕ່າງໆໂຮງແຮມ 800 ຫ້ອງສູນປະຊຸມ ແລະສູນການຄ້າທີ່ຢູ່ແຄມຖະໜົນກິດຈະການເຂດພື້ນທີ່ສີ ຂຽວມີສະໜາມກັອຟ 36 ຫຼຸມສະໂມສອນໄມ້ກັອຟບ່ອນຝຶກຊ້ອມຕີກັອຟສະໂມສອນກັອຟ 190 ຫຼັງ.

ນອກຈາກນີ້ຍັງຈະມີເນື້ອທີ່ດິນທີ່ສະຫງວນໄວ້ເພື່ອກິດຈະການວັດທະນະທຳມີ: ໂຮງຮູບເງົາເຮືອນພື້ນເມືອງ, ຫໍພິິພິທະພັນ ແລະຫ້ອງສະແດງສິລະປະກິດຈະການສຶກ ສາມີ: ໂຮງຮຽນນາໆຊາດ, ກິດຈະການສຸຂະພາບມີ: ໂຮງໝໍລະດັບສາກົນ ແລະ ກິດຈະການຄຸ້ມຄອງບໍລິຫານມີ: ອາຄານບໍລິຫານໂຮງໄຟຟ້າ ແລະ ໂຮງບຳບັດນໍ້າເປື້ອ ນ, ສະຖານທີ່ທ່ອງທ່ຽວກະສິກຳ ແລະອື່ນໆແບບຄົບວົງຈອນທີ່ບໍ່ເຄີຍມີມາກ່ອນໃນລາວ.

  ທັງໝົດນັ້ນ ທ່ານ ນາງ ລັດດາວອນ ພູນສະຫວັດ ຢໍ້າວ່າ: ກໍເພື່ອຕອບສະໜອງສະຖານທີ່ທ່ອງທ່ຽວແບບຄົບວົງຈອນທີ່ໄດ້ມາດຕະຖານສາກົນໃຫ້ແກ່ນັກທ່ອງທ່ຽວທັງພາຍໃນ ແລະຕ່າງປະເທດໄດ້ ສຳຜັດ ແລະທ່ຽວຊົມຕາມຈຸດປະສົງເປົ້າໝາຍຂອງພັກ-ລັດຖະບານໃນການ ພັດທະນາສະຖານທີ່ແຫ່ງນີ້ໃຫ້ກາຍເປັນແຫຼ່ງທ່ອງທ່ຽວແຫ່ງໃໝ່ທີ່ເປັນໜ້າຕາຂອງປະເທດລາວກໍຄືຂອງແຂວງວຽງຈັນ ຖ້າຫາກໂຄງການນີ້ສຳເລັດຈະປະກອບສ່ວນສ້າງວຽກເຮັດງານທຳ ແລະ ສ້າງລາຍຮັບໃຫ້ແກ່ປະຊາຊົນບັນດາເຜົ່າຫຼາຍພັນຄົນພ້ອມທັງຈະຊ່ວຍຫຼຸດຜ່ອນແຮງງານລາວໄປເຮັດວຽກຢູ່ຕ່າງປະເທດນອກນີ້ຍັງຈະເຮັດໃຫ້ປະຊາຊົນເຂດນັ້ນໄດ້ຮັບການສຶກສາຊຶ່ງໂຄງການນີ້ຖ້າສຶກສາມີຄວາມເປັນໄປໄດ້ແມ່ນຈະໃຊ້ເວລາໃນການພັດທະນາປະມານ 10-15 ປີ ຈິ່ງສຳເລັດ ແລະຈະໃຊ້ທຶນພັດທະນາຫຼາຍເຖິງ 3 ຕື້ໂດລາ.

________________

ໜັງສືພິມເສດຖະກິດ-ສັງຄົມ

  •  #ບໍລິການໂຄສະນາທາງເຟສບຸກ ແລະເວັບໄຊ
  • #ໂທ: 021 313645, 316511
  • #App: 020 58707444

แชร์