ສກອ ມອບເຄື່ອງຊ່ວຍເຫຼືອປະຊາຊົນຖືກນໍ້າຖ້ວມ

ສະມາຄົມການສຶກສາພາກເອກະຊົນ (ສກອ) ນະຄອນຫຼວງວຽງຈັນ ໄດ້ເດີນທາງລົງມາຊ່ວຍເຫຼືອສະມາຊິກ ສກອ ແລະໃຫ້ການຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ 4 ແຂວງພາກໃຕ້ຂອງລາວໂດຍໄດ້ເລີ່ມໃຫ້ການຊ່ວຍເຫຼືອທີ່ແຂວງຈໍາປາສັກກ່ອນ.

 ພິທີມອບ-ຮັບເຄື່ອງຊ່ວຍເຫຼືອດັ່ງກ່າວໄດ້ມີຂຶ້ນໃນວັນທີ 8 ຕຸລາ 2019 ຜ່ານມາ, ທີ່ບ້ານວັດ ບ້ານດອນແຊ ເມືອງຊະນະສົມບູນ ແຂວງຈໍາປາສັກ, ໂດຍເປັນກຽດເຂົ້າ ຮ່ວມກ່າວຮັບໂດຍທ່ານ ບົວສອນ ສີວິໄລ ເຈົ້າເມືອງໆຊະນະ ສົມບູນ, ມີທ່ານປະທານ ສກອ ນະຄອນຫຼວງວຽງຈັນ, ມີປະທານ ແລະຮອປະທານ ສກອ ປະຈໍາພາກໃຕ້ ພ້ອມດ້ວຍບັນດາແຂກຜູ້ ໃຫຍ່ທີ່ກ່ຽວຂ້ອງ ແລະບັນດາພໍ່ ແມ່ປະຊາຊົນທີ່ໄດ້ຮັບຜົນກະທົບ ພາຍໃນບ້ານເຂົ້າຮ່ວມ, ຊຶ່ງເຄື່ອຊ່ວຍເຫຼືອທີ່ທາງ ສກອ ໄດ້ນໍາມາຊ່ວຍເຫຼືອປະຊາຊົນໃນຄັ້ງນີ້ປະກອບມີຄື: ເຂົ້າສານ 5,3 ໂຕນ, ເງິນສົດ 8 ລ້ານກວ່າກີບ, ລວມ ເປັນມູນຄ່າທັງໝົດ 48 ລ້າກວ່າ ກີບ ໃຫ້ກັບບ້ານເພື່ອນໍາໄປແຈກຢາຍໃຫ້ກັບປະຊາຊົນທີ່ໄດ້ຮັບຜົນກະທົບ.

  ສໍາລັບບ້ານດອນແຊກໍ່ແມ່ນອີກບ້ານໜຶ່ງໃນເມືອງຊະນະສົມບູນເປັນບ້ານດອນກາງນໍ້າ ແລະໄດ້ຮັບຜົນເສຍຫາຍໜັກພໍສົມຄວນຈາກໄພທໍາມະຊາດ,ມີບ້ານເຮືອນ,ເນື້ອທີ່ນາ, ສວນ, ສັດລ້ຽງງົວຄວາຍ, ເປັດໄກ, ປາ ແລະອື່ນໆຖືກນໍ້າໄຫຼພັດເສຍຫາຍ, ປະຈຸບັນປະຊາຊົນຍັງຄອງຄອຍຖ້າການຊ່ວຍເຫຼືອຈາກທຸກພາກສ່ວນ.

_______________

 ໜັງສືພິມເສດຖະດິດ-ສັງຄົມ

แชร์