ໂຮງຮຽນກຽດຕິສັກນາໆຊາດ ມອບເຄື່ອງຊ່ວຍຜູ້ປະສົບໄພຢູ່ເມືອງຊົນນະບູລີ

 ວັນທີ 5-7 ຕຸລາ 2019, ທີມງານຜູ້ບໍລິຫານນຳໂດຍທ່ານນາງ ຈັນແດງ ແສງວໍລະວົງ ຮອງຜູ້ອຳນວຍການໂຮງຮຽນກຽດຕິສັກນາໆຊາດພ້ອມດ້ວຍບັນດາພະນັກ ງານ ແລະຄູ-ອາຈານໂຮງຮຽນກຽດຕິສັກນາໆຊາດ, ມູນນິທິກຽດຕິສັກ, ສະມາຄົມຜູ້ປົກຄອງ ແລະນັກຮຽນໂຮງຮຽນກຽດຕິສັກນາໆຊາດ, ສະຫະພັນບານບ້ວງແຫ່ງ ຊາດລາວ ແລະສະໂມສອນບານບ້ວງລາວບອນເລີໄດ້ນຳເອົາເຄື່ອງຊ່ວຍເຫຼືອໄປມອບໃຫ້ກັບປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ເມືອງຊົນນະບູລີແຂວງສະ ຫວັນນະເຂດ ລວມມູນຄ່າ 40 ລ້ານກີບ.

 ທ່ານນາງ ຈັນແດງ ແສງວໍລະວົງ ຮອງຜູ້ອຳນວຍການໂຮງຮຽນກຽດຕິສັກນາໆ ຊາດກ່າວວ່າ: ເພື່ອເປັນການຊ່ວຍບັນເທົາທຸກຊ່ວຍພໍ່ແມ່ປະຊາຊົນທີ່ໄດ້ຮັບຜົນກະທົບ, ທາງໂຮງຮຽນ ກໍໄດ້ສົມທົບກັບມູນນິທິກຽດຕິສັກ, ສະມາຄົມຜູ້ປົກຄອງ, ສະຫະພັນບານບ້ວງແຫ່ງຊາດລາວ ແລະສະໂມສອນບານບ້ວງລາວບອນເລີ ຮ່ວມກັນຈັດໂຄງ ການລະດົມທຶນຂຶ້ນ, ຊຶ່ງຕະຫຼອດໄລຍະເດືອນກັນຍາທີ່ຜ່ານມາ, ທີ່ໄດ້ມີການລະດົມນັ້ນ ກໍໄດ້ເປັນເງິນສົດ ແລະເຄື່ອງໃຊ້ຈຳນວນໜຶ່ງທີ່ມີທັງເຄື່ອງນຸ່ງເຄື່ອງໃຊ້ຕ່າງໆ,

ເຄື່ອງ ບໍລິໂພກ-ອຸປະໂພກນຳບັນດານ້ອງນັກຮຽນ, ບັນດາຜູ້ປົກຄອງ ແລະບຸກຄົນທົ່ວໄປ ເພື່ອຈະໄດ້ນຳເອົາເຄື່ອງຂອງເຫຼົ່ານັ້ນໄປຊ່ວຍແກ່ຜູ້ປະສົບໄພ, ສະນັ້ນ ມາຮອດວັນ ທີ 5-7 ຕຸລາ 2019 ທີມງານຜູ້ບໍລິຫານຂອງໂຮງຮຽນກຽດຕິສັກນາໆຊາດ ພ້ອມດ້ວຍບັນດາພະນັກງານ ແລະຄູ-ອາຈານ ກໍໄດ້ເອົາເຄື່ອງລົງໄປມອບໃນມູນຄ່າ 40 ລ້ານກີບ ໄປມອບໃຫ້ກັບປະຊາຊົນຢູ່ບ້ານລຳພຽນ 172 ຄອບຄົວ, ບ້ານປະໄຢ 39 ຄອບຄົວ, ບ້ານບຶງຊ້າງ 5 ຄອບຄົວ ແລະບ້ານກຸດຕະຄານ 47 ຄອບຄົວ ແລະອີກ 3 ວັດ ຂອງເມືອງຊົນນະບູລີ ແຂວງສະຫວັນນະເຂດ.

 ສຳລັບເຄື່ອງບໍລິຈາກທີ່ນຳໄປມອບໃຫ້ກັບປະຊາຊົນເມືອງຊົນນະບູລີຄັ້ງນີ້ປະ ກອບມີ ເຂົ້າສານໜຽວ 3 ໂຕນ, ເຂົ້າສານຈ້າວ10 ເປົ໋າ, ໝີ່ 20 ແກັດໃຫຍ່, ປາກະປ໋ອງ 10 ແກັດໃຫຍ່, ນໍ້າດື່ມ 300 ແພັກ, ຢາສີຟັນ 4 ແກັດໃຫຍ່, ແຟັບຊັກເຄື່ອງ 6 ແກັດໃຫຍ່, ສະບູອາບນໍ້າ 7 ແກັດໃຫຍ່, ປຶ້ມຂຽນ+ເກີບ, ເຄື່ອງນຸ່ງ, ໂດຍທັງ ໝົດລວມເປັນມູນຄ່າ  40 ລ້ານກີບ.

 ທ່ານນາງ ຈັນແດງ ແສງວໍລະວົງ ຍັງໃຫ້ຮູ້ອີກວ່າ: ໂຄງການຊ່ວຍເຫຼືອສັງຄົມຄັ້ງນີ້ ກໍເປັນອີກໜຶ່ງກິດຈະກຳທີ່ໂຮງຮຽນຈັດຂຶ້ນເພື່ອສະເຫຼີມສະຫຼອງວັນຄູແຫ່ງຊາດ ຄົບຮອບ 25 ປີ, ໃຫ້ບັນດາພະນັກງານ ແລະຄູ-ອາຈານ, ນັກຮຽນໄດ້ຮ່ວມກັນປະກອບສ່ວນຊ່ວຍເຫຼືອສັງຄົມ, ນອກຈາກໂຄງການດັ່ງກ່າວແລ້ວ, ໃນທຸກໆປີທາງໂຮງ ຮຽນ ຈະມີກິດຈະກຳລະດົມທຶນເພື່ອຊ່ວຍເຫຼືອສັງຄົມເປັນປະຈຳທຸກປີ.

________________

ໜັງສືພິມເສດຖະກິດ-ສັງຄົມ

แชร์