ລາວສະກາຍເວ ສ້າງຄວາມເຂັ້ມແຂງ ຮອງຮັບການເຕີບໂຕ

  ລາວເດີນອາກາດ ຫຼື LAO SKYWAY ເປັນລັດວິສາຫະກິດທີ່ໄດ້ມີການພັດທະນາຕົນເອງຢ່າງຕໍ່ເນື່ອງໂດຍເລີ່ມແຕ່ມື້ສ້າງຕັ້ງມາຮອດປະຈຸບັນສາມາດສ້າງລະບົບໂຄງລ່າງພື້ນຖານໃຫ້ມີຄວາມແຂງແຮງ, ມີການບໍລິການທີ່ກວ້າງຂວາງກວມເອົາຫຼາຍຂົງເຂດ, ໂດຍທຸກກິດຈະການລ້ວນສອດຄ່ອງກັບການພັດທະນາເສດຖະກິດ-ສັງ ຄົມຂອງປະເທດ, ທີ່ສຳຄັນກຽມພ້ອມຮັບມືກັບຍຸກແຫ່ງການເຊື່ອມໂຍງໃນອະນາຄົດ.

ທ່ານ ສີວຽງທອງ ກອນນິວົງ ຜູ້ອຳນວຍການໃຫຍ່ລັດວິສາຫະກິດລາວເດີນອາກາດໃຫ້ສຳພາດເມື່ອບໍ່ດົນມານີ້ວ່າ:ລາວເດີນອາກາດໄດ້ຮັບການສ້າງຕັ້ງຂຶ້ນໃນປີ 2002, ໂດຍແມ່ນກະຊວງປ້ອງກັນປະເທດເປັນຜູ້ປະກອບທຶນ 2,5 ແສນໂດລາ, ຊຶ່ງການບໍລິການເບື້ອງຕົ້ນເປັນຖ້ຽວບິນເໝົາລຳຮັບໃຊ້ພາຍໃນປະເທດ ແລະໂຄງການຫຼັກທີ່ຮັບໃຊ້ແມ່ນການຂຸດຄົ້ນໂຄງກະດູກຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ, ບິນຮັບໃຊ້ໂຄງການບໍ່ຄຳເຊໂປນນັບແຕ່ນັ້ນເປັນຕົ້ນມາ ແລະໂຄງການລົງ ທຶນໃນການສຳຫຼວດບໍ່ແຮ່, ສຳຫຼວດໄຟຟ້າ ແລະຈຸດຕັ້ງເຂື່ອນໄຟຟ້າຕ່າງໆ, ບິນຮັບໃຊ້ 3 ແຂວງພາກເໜືອ ໂດຍສະເພາະແຂວງຫົວພັນ, ຜົ້ງສາລີ ແລະໄຊຍະບູລີ, ປະຈຸບັນຂະຫຍາຍກວມເອົາ 8 ແຂວງຄື: ຜົ້ງສາລີ, ຫົວພັນ, ຫຼວງພະບາງ, ຊຽງຂວາງ, ບໍ່ແກ້ວ, ຫຼວງນໍ້າທາ, ອຸດົມໄຊ ແລະຈຳປາສັກ, ມາປີ 2018 ສະພາບໍລິຫານການນຳຂອງກະຊວງປ້ອງກັນປະເທດກໍຄືລັດຖະບານເຫັນດີໃຫ້ລັດວິສາຫະກິດເອົາບັນດາຫົວໜ່ວຍທຸລະກິດທີ່ປິ່ນອ້ອມທຸລະກິດການບິນມາເຂົ້າຕື່ມ, ໃນນັ້ນມີໂຮງແຮມລາວສະກາຍເວ, ບໍລິສັດທ່ອງທ່ຽວລາວສະກາຍເວ ແລະບໍລິສັດລາວສະກາຍເວບໍລິການອາຄານ ແລະບໍລິການພາກພື້ນ.

 ປະຈຸບັນ ລັດວິສາຫະກິດລາວເດີນອາກາດໃຫ້ບໍລິການຖ້ຽວບິນເໝົາລຳ ແລະບໍລິການພາຍໃນ ແລະຕ່າງປະເທດ, ອຸດສາຫະກຳການບິນລາວສະກາຍເວ (ບໍລິການສ້ອມ ແປງຍົນ), ມີເຮືອບິນທັງ ໝົດ 18 ລຳ, ມີໂຮງແຮມລາວສະກາຍເວ, ບໍລິສັດທ່ອງທ່ຽວລາວສະກາຍເວ ແລະຍັງມີຕົວແທນຂາຍປີ້ຍົນ 40 ສາຂາທົ່ວປະເທດ, ສາມາດຈອງປີ້ໄດ້ຫຼາຍຊ່ອງທາງ, ບໍລິສັດລາວສະກາຍເວບໍລິການອາຄານ ແລະບໍລິການພາກພື້ນ, ສຳລັບຖ້ຽວບິນເໝົາລຳບິນຫຼັກຄືໂຄງການຂຸດຄົ້ນກະດູກທະຫານອາເມລິກາ, ໂຄງການບໍ່ຄຳເຊໂປນ, ພູເບ້ຍມາຍນິງ, ໂຄງການໄຟຟ້ານໍ້າຕົກ, ບິນຂົນສົ່ງຄົນເຈັບ ແລະບິນທ່ອງທ່ຽວນະຄອນຫຼວງວຽງຈັນ.

 ທ່ານ ສີວຽງທອງ ກອນນິວົງ ກ່າວຕື່ມວ່າ: ຕະຫຼອດ 10 ກວ່າປີທີ່ລັດວິສາຫະກິດລາວເດີນອາກາດດຳເນີນທຸລະກິດໂດຍໄດ້ຮັບການຊີ້ນຳຢ່າງໃກ້ສິດຈາກກະຊວງກ່ຽວ ຂ້ອງທີ່ໄດ້ອຳນວຍຄວາມສະດວກ, ຈຶ່ງເຮັດໃຫ້ລາວສະກາຍເວສາມາດພັດທະນາທຸລະກິດ ແລະການບໍລິການຈົນມີໂຄງລ່າງພື້ນຖານຂອງບໍລິສັດທີ່ມີຄວາມແຂງແຮງໂດຍສະເພາະຈຳນວນເຮືອບິນ ທີ່ນຳໃຊ້ໃນປະຈຸບັນທີ່ສາມາດສະໜອງ ການບໍລິການຕາມຄວາມຕ້ອງການຂອງ ສັງຄົມທັງສາຍການບິນເໝົາລຳ ແລະ ສາຍການບິນພາຍໃນ; ພ້ອມນັ້ນລາວສະກາຍເວຍັງມີບຸກຄະລາກອນທີ່ພຽງພໍເພື່ອຮອງຮັບການຂະຫຍາຍຕົວຂອງກິດຈະການ; ກົນໄກໃນການຄຸ້ມຄອງບໍລິສັດແມ່ນສອດຄ່ອງກັບລະບຽບການຂອງກົມການບິນພົນລະເຮືອນສາກົນ; ມີພື້ນຖານໂຄງລ່າງທາງດ້ານເຕັກນິກທີ່ມີຄວາມຮູ້ຄວາມສາມາດເພື່ອຮອງຮັບທຸກກິດຈະການທັງບໍລິສັດແມ່ ແລະ ບໍລິສັດລູກທີ່ ເຄື່ອນໄຫວກິດຈະການຢູ່, ຢ່າງໃດກໍຕາມເພື່ອເຮັດໃຫ້ທຸລະກິດສອດຄ່ອງກັບກົນໄກຂອງລັດຖະບານທີ່ຈະສ້າງປະເທດໃຫ້ກາຍເປັນຈຸດເຊື່ອມໂຍງການຂົນສົ່ງລະຫວ່າງພາກພື້ນແລະສາກົນ,ດັ່ງນັ້ນເມື່ອອີງໃສ່ທ່າແຮງບົ່ມຊ້ອນຂອງປະເທດເຮົາລາວສະກາຍເວກໍຍັງຕ້ອງໄດ້ປັບປຸງພາຫະນະເພີ່ມຂຶ້ນຕື່ມ,ເຮືອບິນທີ່ມີຄວາມທັນສະໄໝ, ກິດ ຈະການທີ່ປິ່ນອ້ອມເປັນຕົ້ນໂຮງແຮມ, ບໍລິສັດທ່ອງທ່ຽວໂດຍເນັ້ນຄຸນນະພາບເປັນບັນຫາສຳຄັນ.

_________________

ໜັງສືພິມເສດຖະກິດ-ສັງຄົມ

แชร์