ພາກທຸລະກິດກໍ່ເປັນຈັກທີ່ເຂັ້ມແຂງຂອງເສດຖະກິດ

  ກອງປະຊຸມພົບປະລະຫວ່າງພາກລັດ ແລະພາກທຸລະກິດຂັ້ນ ແຂວງໆສະຫວັນນະເຂດ ພາຍໃຕ້ຫົວຂໍ້ Business Forum ຈັດ ຂຶ້ນໃນວັນທີ 27 ກັນຍາຜ່ານມາ ທີ່ຫ້ອງວ່າການປົກຄອງແຂວງ ສະຫວັນນະເຂດ ຊຶ່ງມີທ່ານ ທ່ອນ ແກ້ວ ພຸດທະໄກຍະລາດ ເຈົ້າແຂວງໆສະຫວັນນະເຂດ, ທ່ານ ບາລາ ສຸບຣາມານຽມໂມຣາດີ ຮອງຫົວໜ້າອົງການສະຫະປະຊາຊາດເພື່ອການພັດທະນາປະຈໍາ ສປປ ລາວ ມີສະພາອຸດສາຫະກໍາ ແລະ ການຄ້າແຂວງ, ບັນດາຂະແໜງການຕ່າງໆທັງພາກລັດ, ຫົວ ໜ່ວຍທຸລະກິດພາກລັດເອກະຊົນເຂົ້າຮ່ວມ.

  ໃນກອງປະຊຸມ, ທ່ານ ທ່ອນແກ້ວ ພຸດທະໄກຍະລາດ ສະແດງຄວາມຊົມເຊີຍຕໍ່ກັບຄວາມພະຍາຍາມຂອງທຸກພາກສ່ວນທັງພາກລັດ, ພາກທຸລະກິດ ແລະຜູ້ຮ່ວມພັດ ທະນາກໍ່ຄືໂຄງການອະນຸລັກ ລະບົບນິເວດປ່າໂຄກ  (Safe Ecosystosms ProJect) ຂອງອົງການສະຫະປະຊາຊາດ ເພື່ອການພັດທະນາ (UNDP) ທີ່ໄດ້ພ້ອມກັນຈັດກອງປະຊຸມຄັ້ງ ນີ້, ຊຶ່ງເນື້ອໃນໄດ້ຊີ້ໃຫ້ເຫັນວ່າ: ກອງປະຊຸມຄັ້ງນີ້ສຸດທີ່ມີຄວາມໝາຍ ແລະສໍາຄັນຫຼາຍສໍາລັບພາກ ລັດ ແລະພາກທຸລະກິດທີ່ໄດ້ນໍາເອົາບັນຫາຕ່າງໆຈາກການຈັດ ຕັ້ງປະຕິບັດວຽກງານຕົວຈິງເຂົ້າ ມາສູ່ກອງປະຊຸມປຶກສາຫາລືເພື່ອ ບັນລຸວັດຖຸປະສົງ ແລະເປົ້າໝາຍອັນດຽວກັນຄືໃນການຈັດຕັ້ງປະຕິບັດຄໍາສັ່ງຂອງທ່ານນາຍົກລັດຖະມົນຕີສະບັບເລກ ທີ 02/ນຍ ເຮັດແນວໃດໃຫ້ເສດຖະກິດແຂວງສະຫວັນນະເຂດເຮົາໄດ້ຮັບການພັດທະນາຢ່າງຕໍ່ເນື່ອງ, ເຂັ້ມແຂງ ແລະຍືນຍົງ ແລະສາມາດເຊື່ອມ ໂຍງກັບພາກພື້ນ ແລະສາກົນເທື່ອ ລະກ້າວ ຊຶ່ງພາກທຸລະກິດກໍຕ້ອງເປັນຫົວຈັກທີ່ເຂັ້ມແຂງຂອງເສດຖະກິດ ແລະເບື້ອງລັດເຮົາກໍ່ຕ້ອງສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການເຄື່ອນໄຫວດໍາເນີນທຸລະກິດຂອງຫົວໜ່ວຍທຸລະກິດຊຶ່ງສອງພາກສ່ວນນີ້ກໍ່ຕ້ອງເພິ່ງພາເຊິ່ງກັນ ແລະກັນ ແລະບໍ່ສາມາດຕັດແຍກອອກຈາກກັນໄດ້ບົນພື້ນຖານລະບຽບກົດໝາຍ.

 ການທົບທວນຄວາມຄືບໜ້າໃນການຈັດຕັ້ງປະຕິບັດວຽກງານສົ່ງເສີມ ແລະຄຸ້ມຄອງການລົງທຶນຊຶ່ງມີບັນດາຂໍ້ສະເໜີຕ່າງໆຂອງພາກທຸລະກິດທີ່ຍົກຂຶ້ນມາປຶກສາຫາລືໃນກອງປະຊຸມທີ່ຜ່ານມາມີຂໍ້ ສະເໜີອັນໃດໄດ້ຮັບການປັບປຸງ ແລ້ວ, ຂໍ້ສະເໜີອັນໃດທີ່ກໍາລັງປັບ ປຸງ ແລະຂໍ້ສະເໜີອັນໃດທີ່ຈະສືບ ຕໍ່ປັບປຸງໃນຂັ້ນຕໍ່ໄປ ຊຶ່ງໃນແງ່ມູມໄດ້ໃຫ້ທັດສະນະວ່າ: ສະໄໝນີ້ ແມ່ນຍຸກການພັດທະນາ, ຍຸກແຫ່ງ ການເຊື່ອມໂຍງທີ່ມີການແກ້ງແຍ້ງ ແຂ່ງຂັນສູງ ແລະບໍ່ມີພົມແດນສະ ນັ້ນທາງພາກລັດ ແລະ ພາກທຸລະ ກິດພາຍໃນແຂວງສະຫວັນນະ ເຂດກໍ່ຕ້ອງເປັນອັນໜຶ່ງອັນດຽວ ຕ້ອງໄດ້ຊຸກຍູ້ສົ່ງເສີມເກື້ອກູນ ເຊິ່ງກັນ ແລະກັນ ແລະການດໍາ ເນີນທຸລະກິດກໍ່ມີຄວາມຈໍາເປັນ ຕ້ອງໄດ້ລວມກຸ່ມຈຶ່ງສາມາດຢູ່ ລອດໄດ້, ຈຶ່ງສາມາດແກ້ງແຍ້ງ ແຂ່ງຂັນເພື່ອຍາດແຍ່ງເອົາຜົນປະໂຫຍດມາສູ່ປະເທດຊາດອັນສໍາຄັນແມ່ນຕ້ອງປຸກລະດົມກັນ, ສາມັກຄີກັນເປັນອັນໜຶ່ງອັນດຽວຈຶ່ງຈະເຮັດສໍາເລັດວັດຖຸປະສົງທີ່ໄດ້ຕັ້ງໄວ້.

 ອົງການ UNDP ບໍ່ພຽງແຕ່ ໃຫ້ການສະໜັບສະໜູນດ້ານທຶນຮອນໃນການຈັດກອງປະຊຸມແຕ່ຍັງໃຫ້ທຶນສະໜັບສະໜູນແຂວງສະຫວັນນະເຂດໃນການພັດທະນາບັນ ດາເຄື່ອງມື ແລະນິຕິກໍາ ເພື່ອສົ່ງເສີມກະຕຸກຊຸກຍູ້ການລົງ ທຶນພາຍໃນແຂວງໃຫ້ມີຄວາມສະດວກວ່ອງໄວ, ພາຍໃຕ້ການ ສະໜັບສະໜູນຂອງອົງການດັ່ງກ່າວປະຈຸບັນ ແຂວງສະຫວັນນະເຂດ ກໍ່ກໍາລັງຄົ້ນຄວ້ານະໂຍບາຍ ສົ່ງເສີມການລົງທຶນແບບຍືນຍົງ ໂດຍເນັ້ນໃສ່ວຽກງານທ່ອງທ່ຽວ ແບບອະນຸລັກທໍາມະຊາດ  ຊຶ່ງເປັນການໝູນໃຊ້ຊັບພະຍາກອນທີ່ເປັນທ່າແຮງໃຫ້ເກີດຜົນປະໂຫຍດສູງສຸດຊຶ່ງໄດ້ຈັດຕັ້ງປະຕິບັດຢູ່ 5 ເມືອງ ເປົ້າໝາຍຂອງໂຄງການມີ: ເມືອງຊົນນະບູລີ, ພີນ, ພະລານໄຊ, ທ່າປາງທອງ ແລະເມືອງສອງຄອນໂດຍນະໂຍບາຍສົ່ງເສີມການລົງທຶນແບບຍືນຍົງນີ້ເນັ້ນການມີສ່ວນຮ່ວມ ແລະສ້າງລາຍຮັບໃຫ້ແກ່ຊຸມຊົນສ່ວນອົງການ UNDP ແມ່ນມີສ່ວນສໍາຄັນໃນການສະໜັບສະໜູນດ້ານທຶນໃນການອະນຸລັກ ແລະຄຸ້ມຄອງດິນ-ປ່າໄມ້ໃຫ້ມີປະສິດທິພາບສູງປະກອບສ່ວນຢ່າງສໍາຄັນເຂົ້າໃນການປັບປຸງຊີວິດການເປັນຢູ່ຂອງປະຊາຊົນໃນເມືອງເປົ້າໝາຍໄດ້ຮັບການພັດທະນາແບບຍືນຍົງພ້ອມພັດທະນາເຂດປ່າໂຄກທີ່ມີສັດໂອງ-ມັ່ງໃຫ້ກາຍເປັນແຫຼ່ງທ່ອງທ່ຽວທີ່ຕິດພັນກັບການປົກປັກຮັກສາທໍາມະຊາດ ແລະສິ່ງ ແວດລ້ອມ.

______________

ໜັງສືພິມເສດຖະກິດ-ສັງຄົມ

แชร์