ສອຕລ ແບ່ງນໍ້າໃຈຊ່ວຍຜູ້ຖືກນໍ້າຖ້ວມ

ສປປ ລາວ ໄດ້ຮັບຜົນກະທົບໜັກຈາກອຸທົກກະໄພແຕ່ເໜືອເຖິງໃຕ້ໃນລະຫວ່າງເດືອນສິງຫາ-ກັນຍາປີນີ້ຊຶ່ງໄດ້ສ້າງຄວາມເສຍຫາຍໃຫ້ແກ່ເຮືອນຊານບ້ານຊ່ອງ, ເຄື່ອງປູກ ຂອງຝັງຂອງພໍ່ແມ່ປະຊາຊົນ ກໍຄືຊາວ ກະສິກອນເປັນຈໍານວນມະຫາສານ, ພັກ ແລະລັດຖະບານຍາມໃດກໍໄດ້ເອົາໃຈໃສ່ໃນການຊ່ວຍເຫຼືອແກ່ພໍ່ແມ່ນປະຊາຊົນກໍຄືຜູ້ປະສົບໄພນໍ້າຖ້ວມຢ່າງໃກ້ຊິດຕິດແທດພ້ອມດຽວກັນນັ້ນກໍໄດ້ລະດົມໃຫ້ມີການປະກອບສ່ວນຊ່ວຍເຫຼືອຈາກໂຮງງານຕັດຫຍິບທີ່ເປັນສະມາຊິກສະມາຄົມອຸດສາຫະກຳຕັດຫຍິບລາວ.

  ໃນລະຫວ່າງວັນທີ 5-6 ຕຸລາຜ່ານມາ, ສະມາຄົມອຸດສາຫະກຳຕັດຫຍິບລາວ (ສອຕລ) ກໍໄດ້ນຳເຄື່ອງທີ່ລະດົມໄດ້ຈາກໂຮງງານຕັດຫຍິບທີ່ເປັນສະມາຊິກສະມາຄົມປະກອບສ່ວນຊ່ວຍເຫຼືອຜູ້ປະສົບໄພນໍ້າຖ້ວມໃຫ້ 3 ບ້ານ ເມືອງຈຳພອນ ແຂວງສະຫວັນນະເຂດ, ເຄື່ອງທີ່ນຳມາມອບຄັ້ງນີ້ປະກອບມີ: ເຂົ້າສານ, ອາຫານແຫ້ງ, ອາຫານສໍາເລັດຮູບ, ນໍ້າດື່ມ, ເຄື່ອງນຸ່ງຫົ່ມແລະສິ່ງຂອງເຄື່ອງໃຊ້ທີ່ຈຳເປັນໃນການດຳລົງຊີວິດປະຈຳວັນ.

  ພິທີມອບ-ຮັບເຄື່ອງຊ່ວຍເຫຼືອດັ່ງກ່າວຈັດຂຶ້ນທີ່ເມືອງຈຳພອນ ໂດຍແມ່ນຕາງໜ້າຈາກຫ້ອງການປົກຄອງເມືອງຈຳພອນ ແລະບ້ານເປົ້າໝາຍເປັນຜູ້ຮັບ ແລະຕາງໜ້າມອບໂດຍ ທ່ານ ເພັດສັນຕິ ບຸດສີວົງສັກ ຮອງປະທານສະມາຄົມອຸດສາຫະກຳຕັດຫຍິບລາວພ້ອມດ້ວຍພະນັກງານຫ້ອງການຊຶ່ງເຄື່ອງບໍລິຈາກທີ່ນໍາມອບຊ່ວຍເຫຼືອຜູ້ປະສົບໄພນໍ້າຖ້ວມຄັ້ງນີ້ລວມມູນຄ່າທັງໝົດ58,34 ລ້ານກີບ ໂດຍໄດ້ແຈກຍາຍໃຫ້ 3 ບ້ານຄື: ບ້ານລຳເທນ ມີ 110 ຄອບຄົວ, ບ້ານວັງເມົາ 97 ຄອບຄົວ ແລະບ້ານລຳບອງ228 ຄອບຄົວ, ບ້ານທ່າມວງ, ບ້ານວົງເກັດ, ທີ່ຂຶ້ນກັບເມືອງຈຳພອນ, ແຂວງສະຫວັນນະເຂດ.

------------------

ໜັງສືພິມເສດຖະກິດ-ສັງຄົມ

• 09/10/2019