ລາວໂທລະຄົມລອງໃຊ້ 5G ໄວກວ່າເກົ່າ 20 ເທົ່າ

  ວັນທີ 8 ຕຸລາ 2019 ບໍລິສັດລາວໂທລະຄົມມະນາຄົມມະຫາຊົນໄດ້ເປີດທົດລອງການນຳໃຊ້ລະບົບອິນເຕີເນັດ 5G ເປັນຄັ້ງທຳອິດໃນລາວໂດຍການເປັນປະທານຂອງ ທ່ານ ສຸພົນ ຈັນທະວີໄຊ ຮອງອຳນວຍການໃຫຍ່ບໍລິສັດລາວໂທລະຄົມມະນາຄົມມະຫາຊົນ ແລະຍັງມີບັນດາທ່ານຕາງໜ້າຈາກບັນດາກົມ, ກະຊວງ, ໄປສະນີໂທລະຄົມ ມະນາຄົມ ແລະການສື່ສານ, ລູກຄ້າ, ສື່ມວນຊົນ, ຄະນະຜູ້ບໍລິຫານ-ພະນັກງານລາວໂທລະຄົມເຂົ້າຮ່ວມ.

  ເຕັກໂນໂລຊີອິນເຕີເນັດ 5G ຖືກພັດທະນາຂຶ້ນໃຫ້ມີປະສິດທິພາບສູງກວ່າອິນເຕີເນັດ 4G ເພື່ອຕອບສະໜອງຄວາມຕ້ອງການຂອງຜູ້ຊົມໃຊ້ທີ່ປ່ຽນແປງໄປເລື້ອຍໆ, ຄຸນສົມບັດພິເສດຫຼັກໆຂອງອິນເຕີເນັດ 5G ຄື: ຄວາມໄວໃນການຮັບ-ສົ່ງຂໍ້ມູນທີ່ໄວກວ່າອິນເຕີເນັດ 4G ເຖິງ 20 ເທົ່າ, ຊຶ່ງອິນເຕີເນັດ 5G ຈະຕອບໂຈດການສື່ສານຜ່ານ AR ແລະ VR ໄດ້ຢ່າງສົມບູນແບບ, ສາມາດຮອງຮັບການເຊື່ອມຕໍ່ກັບອຸປະກອນໄດ້ຫຼາຍກວ່າອິນເຕີເນັດ 4G 10 ເທົ່າ, ໃຊ້ເວລາໃນການຕອບສະໜອງ-ໂຕ້ຕອບສັ້ນລົງເຖິງ 1 ມິນລີວິນາທີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະການນຳໃຊ້ໃນທາງການແພດ ແລະອື່ນໆ.

  ການທົດລອງນຳໃຊ້ອິນເຕີເນັດ 5G ໃນຄັ້ງນີ້ ຖືເປັນຂີດໝາຍອັນສຳຄັນຂອງວຽກງານການສື່ສານໂທລະຄົມມະນາຄົມຂອງລາວໂທລະຄົມ ແລະຜູ້ຊົມໃຊ້ໃນລາວຈະໄດ້ສຳພັດປະສົບການໃໝ່ທາງດ້ານການສື່ສານລະດັບໂລກ ແລະ ອີກບໍ່ດົນໃນອະນາຄົດໃກ້ໆນີ້ລາວໂທລະຄົມຈະໃຫ້ໄດ້ເປີດໃຫ້ບໍລິການລະບົບອິນເຕີເນັດ 5G ຢ່າງເຕັມຮູບ ແບບ.

  ບໍລິສັດລາວໂທລະຄົມມະນາຄົມມະຫາຊົນເປັນບໍລິສັດທຳອິດທີ່ດຳເນີີນທຸລະກິດໃຫ້ບໍລິການທາງດ້ານການສື່ສານໂທລະຄົມມະນາຄົມແບບຄົບວົງຈອນໃນລາວນັບແຕ່ປີ 1996 ເປັນຕົ້ນມາຈົນເຖິງປະຈຸບັນເປັນເວລາຍາວນານກວ່າ 23 ປີ, ຕະຫຼອດໄລຍະທີ່ຜ່ານມາລາວໂທລະຄົມຍາມໃດກໍ່ໄດ້ຍຶດໝັ້ນໃນວິໄສທັດຂອງຕົນຢ່າງໜັກແໜ້ນຄື: ຍຶດໝັ້ນໃນແນວທາງຄວາມຮັບຜິດຊອບສູງຕໍ່ສັງຄົມເປັນແນວທາງຫຼັກໃນການນຳໃຊ້ເທັກໂນໂລຢີທີ່ເໝາະສົມເພື່ອພັດທະນາໃຫ້ບໍລິການທີ່ມີຄຸນນະພາບເພື່ອຄວາມປະທັບໃຈຂອງຜູ້ໃຊ້ບໍລິການເປັນອັນດັບ 1 ແລະເຄື່ອນໄຫວພາຍໃຕ້ພາລະບົດບາດຂອງຕົນຢ່າງຕັ້ງໜ້າຄື: ເປັນຜູ້ໃຫ້ບໍລິການໂທລະຄົມມະນາຄົມທີ່ມີມາດຕະຖານທຽບເທົ່າກັບສາກົນໂດຍໄດ້ມີການພັດທະນາການໃຫ້ບໍລິການຮອບດ້ານ ແລະໃຫ້ຄວາມສຳຄັນຢ່າງສູງຕໍ່ປະເທດຊາດ ແລະສັງຄົມ.

-------------------

ຂຽນໂດຍ: ລຸນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์