ຊາວໜຸ່ມເດີນທະເລ ສະແດງສິລະປະວັດທະນະທໍາ

  ງານສະແດງສິລະປະວັດທະນະທໍາຂອງຄະນະຊາວໜຸ່ມລາວ ໂຄງການຊາວໜຸ່ມລາວເດີນທະເລ ອາຊຽນ-ຍີ່ປຸ່ນ ຄັ້ງທີ 46 ປະຈໍາປີ 2019 ໄດ້ຈັດຂຶ້ນວັນທີ 5 ຕຸລາ 2019 ທີ່ຫໍວັດທະນະທໍາແຫ່ງຊາດ ໂດຍມີທ່ານ ນາງ ສູນທອນ ໄຊ ຍະຈັກ ຫົວໜ້າຄະນະພົວພັນຕ່າງປະເທດສູນກາງພັກ, ທ່ານ ນາງ ວິລະວອນ ພັນທະວົງຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວບັນດາຮອງ ລັດຖະມົນຕີ, ທູຕານຸທູດແຂກຖືກເຊີນ ແລະສະມາຊິກຊາວໜຸ່ມຈາກພາກສ່ວນກ່ຽວຂ້ອງເຂົ້າຮ່ວມ.

ໂຄງການຊາວໜຸ່ມເດີນທະເລອາຊຽນ-ຍີ່ປຸ່ນ ໂດຍໄດ້ຮັບການສະ ໜັບສະໜູນ ແລະຊ່ວຍເຫຼືອຈາກ ລັດຖະບານຍີ່ປຸ່ນ ໂດຍມີຈຸດປະສົງເພື່ອໃຫ້ໂຄງການດັ່ງກ່າວເປັນເວທີໃຫ້ຊາວໜຸ່ມຈາກບັນດາປະເທດສະມາຊິກອາຊຽນ ແລະຊາວໜຸ່ມປະເທດຍີ່ປຸ່ນໄດ້ມີການເສີມສ້າງມິດ ຕະພາບສາຍພົວພັນການຮ່ວມມືຄວາມເຂົ້າໃຈອັນດີເຊິ່ງກັນ ແລະ ກັນ ໂດຍຜ່ານການເຮັດກິດຈະກຳ ແລກປ່ຽນທາງດ້ານວັດທະນະທຳ ແລະການສົນທະນາໃນຫົວຂໍ້ຕ່າງໆ ທີ່ຕິດພັນກັບການພັດທະນາເສດຖະກິດວັດທະນະທຳ-ສັງຄົມ ແລະ ການສຶກສາຂອງບັນດາປະເທດສະມາຊິກອາຊຽນ ແລະຍີ່ປຸ່ນ ໂຄງ ການດັ່ງກ່າວແມ່ນໄດ້ຮັບການຈັດຕັ້ງປະຕິບັດໃນປີ 1974 ສໍາລັບ ໃນປີນີ້ແມ່ນຄົບຮອບ 46 ປີ.

  ໃນປີ 2019 ຊາວໜຸ່ມລາວ ທຸກທົ່ວໜ້າທີ່ໄດ້ເປັນສ່ວນໜຶ່ງໃນ ການສະເຫຼີມສະຫຼອງວັນສ້າງຕັ້ງ ອາຊຽນຄົບຮອບ 52 ປີ ແລະ ການເຂົ້າຮ່ວມໂຄງການຊາວໜຸ່ມ ເດີນທະເລອາຊຽນ- ຍີ່ປຸ່ນຂອງ ສປປ ລາວ ຄັ້ງທີ 22 ນັບຕັ້ງແຕ່ປີ 1998 ເປັນຕົ້ນມາສະນັ້ນເພື່ອ ເປັນການສະເຫຼີມສະຫຼອງວັນສຳຄັນດັ່ງກ່າວສູນກາງ ຊປປລ ໄດ້ ຄັດເລືອກໃຫ້ຊາວໜຸ່ມລາວ 28 ຄົນເພື່ອເປັນຕົວແທນເຂົ້າຮ່ວມໃນ ໂຄງການດັ່ງກ່າວຕາມການເຊື້ອ ເຊີນ ໂດຍມີຫົວໜ້າຄະນະຊາວໜຸ່ມ ແລະຜູ້ນໍາພາກິດຈະກໍາເທິງເຮືອລວມທັງໝົດ 30 ຄົນ ຊຶ່ງຈະໃຊ້ເວລາດຳເນີນໂຄງການເປັນເວລາ 51 ວັນ ແລະຢ້ຽມຢາມ 5 ປະເທດ ຄື: ຍີ່ປຸ່ນ, ຫວຽດນາມ, ສິງກະໂປ, ມຽນມາ ແລະມາເລ ເຊຍ.

ກິດຈະກໍາຈັດຂຶ້ນພາຍໃຕ້ຫົວຂໍ້: “ໜຶ່ງແຮງສູ່ການປ່ຽນແປງທີ່ຍິ່ງ ໃຫຍ່” ຊຶ່ງລວມມີ 2 ຮູບແບບຄື: ການລົງມືອະນາໄມດ້ວຍການເກັບ ຂີ້ເຫຍື້ອ ໂດຍມີການຮ່ວມມືກັບຫຼາຍພາກສ່ວນທີ່ກ່ຽວຂ້ອງເຊັ່ນ: ຫ້ອງການຄຸ້ມຄອງ ແລະບໍລິຫານຕົວເມືອງ (ຄບຕ), ຫ້ອງການຊາວໜຸ່ມເມືອງ,ອໍານາດການປົກຄອງບ້ານ, ຫ້ອງການມໍລະດົກພະທາດຫຼວງ ແລະການກະຈາຍຂໍ້ມູນຂ່າວສານຜ່ານsocial media ໃນຮູບ ແບບຂອງຮູບພາບປະກອບຂໍ້ຄວາມວິດີໂອ ແລະການຂຽນບົດຄວາມຜ່ານເພຈ Faceboo k: Lao ParticipatingYouth of the 46th SSEAYP 2019 ທີ່ເປັນຊ່ອງທາງໃນການເຂົ້າເຖິງກຸ່ມຄົນສ່ວນໃຫຍ່ໃນປະຈຸບັນ.

ໃນໂອກາດນີ້ຜູ້ເຂົ້າຮ່ວມແມ່ນ ໄດ້ຮັບຊົມການສະແດງສິລະປະ-ວັດທະນະທໍາ ແລະວິດີໂອຂອງຄະນະຊາວໜຸ່ມລາວໂຄງການຊາວໜຸ່ມເດີນທະເລອາຊຽນ-ຍີ່ປຸ່ນພ້ອມນັ້ນຍັງໄດ້ມອບສັນຍາລັກ SSE AYP ອີກດ້ວຍ.

 ------------------

 ໜັງສືພິມເສດຖະກິດ-ສັງຄົມ

แชร์