ກຸງສີລິດຊິ້ງ ເຂົ້າເຖິງລູກຄ້າຫຼາຍຂື້ນ

  ການດຳເນີນທຸລະກິດໃນຜ່ານມາຂອງບໍລິສັດກຸງສີລິດຊິ້ງຍັງມີສິ່ງທ້າທາຍຫຼາຍປະການອັນເນື່ອງມາຈາກການແຂ່ງຂັນທີ່ເພີ່ມທະວີຂຶ້ນດັ່ງນັ້ນ, ທາງບໍລິສັດຈຶ່ງມຸ່ງໝັ້ນປັບປຸງຂະບວນການ ແລະ ພັດທະນາຄວາມສາມາດຂອງພະນັກງານ ແລະ ການນໍາສະເໜີສິນຄ້າທີ່ເໝາະສົມເພື່ອຕອບສະໜອງຄວາມຕ້ອງການ ແລະໃຫ້ເຂົ້າເຖິງລູກ ຄ້າຫຼາຍຂຶ້ນ.

   ຫວ່າງບໍ່ດົນຜ່ານມານີ້; ທ່ານ ວິບູນ ຈິຣະພັດທະນາກຸນ ຜູ້ອໍານວຍການບໍລິສັດກຸງສີ ບໍລິການເຊົ່າສິນເຊື່ອ ຈໍາກັດ ຫຼື ກຸງສີລິດຊິ້ງໄດ້ໃຫ້ສໍາພາດວ່າ: ໃນ 9 ເດືອນປີ 2019 ເປົ້າໝາຍການປັບປຸງຂີດຄວາມສາມາດໃນການແຂ່ງຂັນຖືວ່າເປັນທີ່ພໍໃຈການດໍາເນີນທຸລະກິດຂອງກຸງສີລິດຊິ້ງຖືເປັນສ່ວນໜຶ່ງຂອງກົນໄກພາກເອກະຊົນທີ່ຊ່ວຍ ສະໜັບສະໜູນພາກລັດໃນການຊ່ວຍຍົກລະດັບຊີວິດການເປັນຢູ່ໂດຍການໃຫ້ບໍລິການທາງດ້ານເຊົ່າສິນເຊື່ອໃນອັດຕາດອກເບ້ຍທີ່ເໝາະສົມແກ່ລູກຄ້າທັງສິນເຊື່ອລົດໃຫ ຍ່ ແລະເຄື່ອງໃຊ້ໄຟຟ້າທົ່ວໄປທີ່ສາມາດສະໜອງລູກຄ້າທີ່ເປັນບຸກຄົນ ແລະນິຕິບຸກຄົນເຊັ່ນ: ຜູ້ກູ້ສາມາດມາເຊົ່າສິນເຊື່ອໂດຍສະໜອງເອກະສານຢັ້ງຢືນກ່ຽວກັບບໍລິສັດ, ຫຼັກຖານ ແລະ ແຫຼ່ງລາຍໄດ້ໃນນາມບໍລິສັດນະໂຍບາຍນີ້ເວົ້າລວມສາມາດຊ່ວຍຜູ້ດໍາເນີນທຸລະກິດໃຫ້ມີສະພາບຄ່ອງການບໍລິຫານການເງິນ.

  ທ່ານຜູ້ອໍານວຍການໄດ້ຊີ້ແຈງເຖິງ ຊ່ອງທາງການຊໍາລະຄ່າງວດແມ່ນງ່າຍ ດາຍ, ວ່ອງໄວຊຶ່ງຈະຊໍາລະໂດຍກົງຜ່ານ ເຄົ້າເຕີ້ບໍລິການ ຫຼື ປ່ອງການບໍລິການຂອງບໍລິສັດເອງ; ພ້ອມນັ້ນ ຍັງສາມາດ ໃຊ້ປ່ອງບໍລິການທະນາຄານ ຫຼື ຕູ້ ATM ຂອງບັນດາທະນາຄານຄູ່ຄ້າ ແລະອິນເຕິເນັດ ແບ້ງກິ້ງ (i-banking) ຜ່ານ Application ຂອງບັນດາທະນາຄານພັນທະມິດຂອງບໍລິສັດ ຫຼືເປັນຄູ່ຄ້າກັບກຸງສີລິດຊິ້ງ ແລະປະຈຸບັນໄດ້ເພີ່ມການບໍລິການໃຫ້ລູກຄ້າສາມາດຊຳລະຜ່ານຊ່ອງທາງທະນາຄານການຄ້າຕ່າງປະເທດລາວມະຫາຊົນ; ທະນາຄານຮ່ວມພັດທະນາ; ທະນາຄານພັດທະນາລາວ; ທະນາຄານເອັສທີ; ທະນາຄານ ອິນໂດຈີນ; ທະນາຄານກຸງສີ ແລະທະນາຄານສົ່ງເສີມກະສິກຳ, ຂະນະດຽວກັນຍັງສະໜັບສະໜູນການຮັບຊໍາລະຄ່າງວດເປັນເງິນກີບໂດຍແຈ້ງລູກຄ້າໃຫ້ຮັບຊາບຜ່ານຊ່ອງທາງການສື່ສານຂອງບໍລິສັດເປັນການປະ ກອບສ່ວນເຂົ້າໃນການຮັກສາສະຖຽນລະພາບເງິນຕາ ແລະການໝູນວຽນຂອງເງິນກີບໃນເສດຖະກິດລາວ.

  ຕໍ່ບັນຫາດັ່ງກ່າວ; ບໍລິສັດຂໍສະເໜີໃຫ້ພາກສ່ວນກ່ຽວຂ້ອງພິຈາລະນາທົບທວນນະໂຍບາຍການສົ່ງເສີມການນຳໃຊ້ເງິນກີບເຊັ່ນ: ການກຳນົດສັດສ່ວນຫຼືໄລຍະເວລາທີ່ຊັດເຈນເພື່ອໃຫ້ສາມາດປະຕິບັດໄດ້ຢ່າງມີປະສິດທິພາບໂດຍຫຼຸດຜ່ອນຜົນກະທົບທຸລະກິດຂອງບັນດາບໍລິສັດສິນເຊື່ອ, ພ້ອມກັນນີ້, ການກຳນົດສັດສ່ວນ ຫຼືໄລຍະນັ້ນຈະເປັນການຊ່ວຍສົ່ງເສີມການນຳໃຊ້ເງິນກີບຢ່າງຍືນຍົງ ແລະເປັນໄປຕາມສະພາບຄວາມເປັນຈິງຂອງຕະຫຼາດແລະເຊື່ອໝັ້ນວ່າ: ອົງການມະຫາພາກທີ່ກ່ຽວຂ້ອງຈະຊ່ວຍຊຸກຍູ້ຂະແໜງການສິນເຊື່ອເພື່ອຜ່ານຜ່າສິ່ງທ້າທາຍຕ່າງໆເຫຼົ່ານີ້ໄດ້ໂດຍມີການຮ່ວມມືຈາກຫຼາຍຝ່າຍທີ່ກ່ຽວຂ້ອງ.

  ສຳລັບໜີ້ທີ່ບໍ່ເກີດດອກອອກຜົນ (NPLs) ຂອງບໍລິສັດຖືວ່າຕໍ່າເນື່ອງຈາກທາງບໍລິສັດມີການບໍລິຫານຄວາມສ່ຽງທີ່ຊັດເຈນ, ຖືເອົາວຽກງານບໍລິຫານໜີ້ເປັນໜຶ່ງໃນວຽກງານສຳຄັນທີ່ສຸດ ແລະໄດ້ຕິດຕາມໜີ້ຢ່າງມີປະສິດທິພາບໂດຍທາງບໍລິສັດໄດ້ມີນະໂຍບາຍເພີ່ມບຸກຄະລາກອນໃນໜ່ວຍງານດັ່ງກ່າວ.

  ທ່ານຜູ້ອໍານວຍການເນັ້ນວ່າ: ພວກເຮົາພ້ອມທີ່ມີການຮ່ວມມືກັບພາກສ່ວນຕ່າງໆທັງພາກລັດແລະພາກເອກະຊົນໃນການໃຫ້ບໍລິການທີ່ດີຂຶ້ນໂດຍສືບຕໍ່ເສີມຂະຫຍາຍຈຸດເດັ່ນຂອງຕົນນັ້ນ; ທາງບໍລິສັດຈະສືບຕໍ່ມີການປັບປຸງດ້ານການໃຫ້ຂໍ້ມູນຂ່າວສານ ແລະເພີ່ມຊ່ອງທາງການເຂົ້າເຖິງແຫຼ່ງທຶນແກ່ລູກຄ້າໃຫ້ຫຼາຍຂຶ້ນ; ສືບຕໍ່ຂະຫຍາຍທຸລະກິດເພື່ອຕອບສະໜອງຄວາມຕ້ອງການຂອງລູກຄ້າໃນດ້ານບໍລິການສິນເຊື່ອປະເພດຕ່າງໆຢູ່ ສປປ ລາວ.

------------------

ຂຽນໂດຍ: ຣັດສະໝີ ດວງສັດຈະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์