ເຂື່ອນນໍ້າຂອງໄຊຍະຈະເລີ່ມຜະລິດໄຟຟ້າຂາຍທ້າຍເດືອນໜ້າ

  ໂຄງການກໍ່ສ້າງເຂື່ອນໄຟຟ້ານໍ້າຂອງແຂວງໄຊຍະບູລີມີກຳລັງຕິດຕັ້ງທັງໝົດ 1.285 ເມກາວັດມູນຄ່າ 3,8 ຕື້ໂດລາອາຍຸສຳປະທານ 29 ປີ ພາຍຫຼັງທີ່ໄດ້ລົງມືກໍ່ ສ້າງເປັນຕົ້ນມາໜ້າວຽກໂດຍລວມຂອງໂຄງການຮອດຂະນະນີ້ສຳເລັດແລ້ວ 99,99% ໂດຍຈະມີພິທີເປີດການຜະລິດໄຟຂາຍຢ່າງເປັນທາງການໃນວັນທີ 28 ພະຈິກ 2019.

 ວັນທີ 8 ຕຸລາຜ່ານມາທີ່ແຂວງໄຊຍະບູລີກົມທຸລະກິດພະລັງງານກະຊວງພະລັງງານ ແລະບໍ່ແຮ່ໄດ້ຈັດກອງປະຊຸມຄະນະກຳມະການຊີ້ນຳຮ່ວມໂຄງການເຂື່ອນໄຟຟ້ານໍ້າຂອງແຂວງໄຊຍະບູລີ ຄັ້ງທີ 8 ໂດຍການເປັນປະທານຂອງທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່, ທ່ານນາງ ບຸນຄຳ ວໍລະຈິດ ຮອງລັດ ຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມ, ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ມີຮອງເຈົ້າແຂວງຫຼວງພະບາງ, ບໍລິສັດ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ໂຄງການກໍ່ສ້າງເຂື່ອນໄຟຟ້ານໍ້າຂອງແຂວງໄຊຍະບູລີໄດ້ເຊັນສັນຍາສຳປະທານໃນທ້າຍເດືອນຕຸລາ 2010 ລະ ຫວ່າງບໍລິສັດໄຊຍະບູລີພາວເວີ ຈຳກັດ ກັບລັດຖະບານແຫ່ງ ສປປ ລາວ, ອາຍຸສຳປະທານໂຄງການ 29 ປີມີກຳລັງຕິດຕັ້ງທັງໝົດ 1.285 ເມກາວັດ,ມີມູນຄ່າການກໍ່ສ້າງທັງໝົດ 3,8 ຕື້ໂດລາ, ມີເນື້ອທີ່ອ່າງໂຕ່ງ 2,72 ແສນກິໂລຕາແມັດ, ອ່າງນໍ້າໜ້າເຂື່ອນ49 ກິໂລຕາແມັດ, ປະລິມານນໍ້າໄຫຼສະເລ່ຍ 3.980 ແມັດກ້ອນຕໍ່ວິນາທີ, ບໍລິມາດນໍ້າທັງໝົດໃນອ່າງ 735 ລ້ານແມັດກ້ອນ, ຄວາມສູງຂອງເຂື່ອນ 28,5 ແມັດ, ຄວາມຍາວ 820 ແມັດ, ລະດັບນໍ້າສູງສຸດໜ້າເຂື່ອນ 275ແມັດ ແລະ ຕໍ່າສຸດທ້າຍເຂື່ອນ 246,5 ແມັດ (ເທິງລະດັບໜ້ານໍ້າທະເລປານກາງ).

 ເຂື່ອນໄຟຟ້າໄຊຍະບູລີມີບ້ານທີ່ໄດ້ຮັບຜົນກະທົບທັງໝົດ 15 ບ້ານ (ແຂວງໄຊຍະບູລີ 6 ບ້ານແລະແຂວງຫຼວງພະບາງ 9 ບ້ານ) ບ້ານທີ່ຖືກຍົກຍ້າຍ 8 ບ້ານ ແລະບ້ານທີ່ຍັບຍ້າຍ 7 ບ້ານ ລວມທັງໝົດ 626 ຄອບຄົວເຮືອນທີ່ໄດ້ຮັບການຈັດສັນໃຫ້ 663 ຫຼັງຄາເຮືອນ, ປະຊາຊົນທີ່ໄດ້ຮັບຜົນກະທົບທັງໝົດ 2.974 ຄົນ ໂດຍການຍົກຍ້າຍຈັດສັນແມ່ນໄດ້ສຳເລັດໃນເດືອນກຸມພາ2017.

  ໂຄງການໄດ້ເລີ່ມລົງມືກໍ່ສ້າງໃນຕົ້ນເດືອນພະຈິກ 2012 ໄລຍະການກໍ່ສ້າງ 8 ປີ (2012-2019) ມາຮອດປະຈຸບັນໂຄງການດັ່ງກ່າວໄດ້ສຳເລັດແລ້ວ 99,99% ແລະຈະເປີດການຜະລິດກະແສໄຟຟ້າຂາຍຢ່າງເປັນທາງການໃນວັນທີ 28 ພະຈິກ 2019 ຊຶ່ງຕະຫຼອດໄລຍະສຳປະທານ 29 ປີນັບແຕ່ມື້ເລີ່ມຂາຍໄຟຢ່າງເປັນທາງ ການປີ 2019 ຮອດປີ 2048 ລາຍໄດ້ທີ່ລັດຖະບານຈະໄດ້ຮັບທັງໝົດ 3,9 ຕື້ໂດລາສະເລ່ຍ 135 ລ້ານໂດລາຕໍ່ປີ.

-------------------

ໜັງສືພິມເສດຖະກິດ-ສັງຄົມ

แชร์