ວິທະຍາໄລລາວ-ອາເມລິກາ ຈັດກິດຈະກຳສະຫຼອງວັນຄູ

 ໃນວັນທີ 5 ຕຸລາ 2019, ວິທະຍາໄລລາວ-ອາເມລິກາໄດ້ຈັດກິດຈະກຳຂຶ້ນເພື່ອເປັນການສະເຫຼີມສະຫຼອງວັນຄູແຫ່ງຊາດຄົບຮອບ 25 ປີ ຂຶ້ນທີ່ສະໜາມກີລາມະຫາວິທະຍາໄລແຫ່ງຊາດໂດຍ ມີທ່ານ ທອງສອນ ພຸດສະຫວັດ ປະທານວິທະຍາໄລລາວ-ອາເມລິກາ ແລະໂຮງຮຽນມັດທະຍົມສົມບູນຈັນສະຫວັນ, ທ່ານ ຄຳແສນ ສີສະວົງ ປະທານສະມາຄົມການ ສຶກສາພາກເອກະຊົນ, ມີຜູ້ອຳນວຍການວິທະຍາໄລ, ອຳນວຍການໂຮງຮຽນ, ຄູ-ອາຈານ ແລະນັກສຶກສາເຂົ້າຮ່ວມ.

ທ່ານ ວົງສະທິດ ສຸວໍລະວົງ ຜູ້ອຳນວຍການວິທະຍາໄລລາວ-ອາເມລິກາ ກ່າວວ່າ: ການຈັດກິດຈະກຳສະເຫຼີມສະຫຼອງວັນຄູແຫ່ງຊາດ 7 ຕຸລາ ຄົບຮອບ 25 ປີ ຄັ້ງນີ້ແມ່ນ ເພື່ອສ້າງກິດຈະກຳຂະບວນຟົດຟື້ນ ພາຍໃນວິທະຍາໄລລະຫວ່າງຄູ-ອາຈານ ແລະນັກສຶກສາ, ພະນັກງານຂອງວິທະຍາໄລໃຫ້ມີກິດຈະກຳຮ່ວມກັນ, ເປັນການສ້າງຄວາມສາມັກຄີຮັກແພງເຊິ່ງກັນ ແລະກັນຫຼາຍຂຶ້ນ, ເປັນອີກໜຶ່ງກິດຈະກຳໃຫ້ກັບນັກສຶກສາ ແລະນັກຮຽນໄດ້ຮຽນຮູ້, ແລກປ່ຽນບົດຮຽນໃນພາກສະໜາມ, ພ້ອມ ກັນນັ້ນກໍຍັງ ເປັນການປະຕິບັດຕາມແນວທາງ ທິດຊີ້ນຳຂອງພັກ-ລັດຖະບານເພື່ອເປັນການສົ່ງເສີມ ແລະຊຸກຍູ້ ຫຼື ການສະເຫຼີມສະຫຼອງວັນສຳຄັນຂອງຊາດກໍຄືວັນຄູແຫ່ງຊາດປີນີ້, ທັງນີ້ກໍເພື່ອເປັນການລະນຶກເຖິງຄຸນງາມຄວາມດີຂອງຄູລາວຮຸ່ນ ທຳອິດ ແລະຮຸ່ນຕໍ່ໆມາ.

 ສຳລັບກິດຈະກຳທີ່ຈັດຂຶ້ນໃນຄັ້ງນີ້ປະກອບມີການເດີນສວນສະໜາມ, ການຟ້ອນ,ການຮ້ອງເພງ, ການແຂ່ງຂັນບານເຕະລະຫວ່າງ ຄູ-ອາຈານ ແລະນັກສຶກສາ, ແຂ່ງ ຂັນດຶງເຊືອກ, ການແຂ່ງຂັນແລ່ນສົ່ງໄມ້ລະຫວ່າງຄູ-ອາຈານ ແລະນັກສຶກສາ, ນອກຈາກການຈັດກິດຈະກຳດັ່ງກ່າວແລ້ວພາຍໃນງານຍັງໄດ້ມອບໃບຍ້ອງຍໍໃຫ້ກັບບັນດາຄູ-ອາຈານສອນດີສອນເດັ່ນຈຳນວນ 8 ຄົນ ນຳອີກ.

----------------------

ໜັງສືພິມເສດຖະກິດ-ສັງຄົມ

• 09/10/2019